Read Lelemi Hosea 12 Bible Online

Hosea 12 - Lelemi bible

Hosea 12

¹Ɔƒɛƒɛɛ kama kani na Israelƒuɔ basia uwi ndi uwi. Na ɔkɔ bɔnyi ku ala bubile ku bekyuli lɛlɔ bɔta teenye kani náƒɔ-ma keliela kemmo na kesi kesii. Ama ku Asiriaƒuɔ muunyimi ala, na ama ku Egyipteƒuɔ baadi nnɔ kuye.

²Unwoti údie Yudaƒuɔ bani ndi Yakob kaba bebi bɔƒiɔ. Na ɔdubo-ma kɔtu bɔni na bana ala bɔbla ɔsu.

³Kaƒɔ kemmo ƒui na Yakob úse kalɔ uukpóku ɔnwani. Na ɔni na ɔ́bi lɛlɔ lɛnɔ ni, anwu ku Katɔti bása kayi na békpoku lɛlɔ.

⁴Na Betel lɛnɔ ni, anwu ku Katɔti ɔtu ɔdi bása kayi na ɔ́di-nwu lɛlɔ, na ɔda imii blabla úvele-nwu ɔnii ute-nwu kusɛ kusɛ. Mmɔ na ɔ́tɛmiku-nwu,

⁵anwu ɔni ndi Unwoti Katɔti Ɔyikune Ƒui. Na Unwoti ndi lɛnyi lɛni na bekyuli baabu.

⁶Anwuɔsu binwini bibo bina Katɔti kudɔ na biwi lɛlɔ buɛɛ na biti bina anu ƒui bɛsia-nwu lɛlɔ. Bɛsu litemi geen na bɛdi nwuna litemi lɛlɔ siin na bɛyɔ-nwu.

⁷Israel, lɛlɔ lítaayɔ-ɔ uwi ɔni na átaanya bekyuli taakya, na átaasia bekyuli lɛlɔ taakɛ kɔsia na bina liyedi kemmo.

⁸Na biiti ɔmmɔ taakun lɛmɛnɛ taasu bɛnii, “Ɔlakɛne na ndi, na ami ɔlati néti mina enu lɛ́bla kabla na lɛ́kɛ egulabi ammɔ, na ńtabla ukyuli ɔdi lɛla lɛdi!”

⁹“Israelƒuɔ, bɛnu bɛti ka ami Unwoti mmu ndi bina Katɔti kalɛ kani na úse kukuuku uwi ɔni na bɛ́kya Egyipte kalɔ lɛlɔ. Na ɔƒaani ni, ndubo-mii lɛlɔ bunye na bɛsɔ bitélie nvo kemmo kalɛ na bílie na kalɔ kakwiidi kemmo bíbavi.

¹⁰Lɛ́tɛmiku mina kenye bediene na lɛ́ya na bánu kɔyu kemmo ala. Na lɛ́sia-ma lɛlɔ líbo-mii agba na líte-mii bɔti na ala pii lɛlɔ.”

¹¹Alaekpidi ani na baabla na Gilgal ábɔ ágya na badubo babayii udu na kawɔlɔkɔ. Baadú ɔmantɛ bakɔ taakpa na bana akpabi ani na béti atabi bátu mmɔ lɛlɔ. Nsu badubo atabi ammɔ ƒui bugyingya bɔ́kya alakpi akɔ na kalɔ kammɔ kemmo.

¹²Yakob úkeli úsie Mesopotamia kalɔ lɛlɔ kesii kani na útánu baƒonu lɛlɔ asa na ɔdubɔkɛ uleku uti na mmɔ.

¹³“Lɛ́tala mina Kenye Udiene Mose nnii ɔtɔnku Israelƒuɔ ɔsiku Egyipte na ɔda-ma kɔkɔɔkɔ na lɛla lɛdi litabla-ma.

¹⁴Nsu bɛ́kya-mi kɔnyi na bɛ́nu-mi anumi, anwuɔsu ndubo-mii kɔtu bɔni na bina ekpidi bonwu ani na bɛ́bla ɔsu.”