Read Lelemi Hosea 5 Bible Online

Hosea 5 - Lelemi bible

Hosea 5

¹“Amii bakpane binu! Amii bani ndi Israel kadi bekyuli ƒui bibimi atu na binu! Amii bani na bɛ́si ɔga kesii! Ami mɔɔtɛ litemi lɛmɛni lɛdu kɔtɔ. Bínwini kakpagyuɛ bíte Mispa ɔma bekyuli na lɛni kani na bise na Tabor Kɔbi lili.

²Na bina ekpidi áya na Sitim ɔma únwini ubu gbion, nsu ndubo-mii kɔtu bɔni ƒui kede kede.

³Ngyi Eƒraim kaba bekyuli bani ndi Israelƒuɔ ablala ƒui kede kede, na ɔdi útabɛ-mi. Ɔƒaani bénwini basɔnɔdine na baabla lɛyalɛ ala, na bébile lɛlɔ, na beesé lɛlɔ lɛnɔ.

⁴“Na bana ekpidi áya na basɔ balakana na benwini bebo ami bana Katɔti kudɔ, ɔsika lɛsɔnɔdi kɔyu kɔ́ƒɔ-ma lɛlɔ kemmo ƒui, na baaagyi ami bana Unwoti.

⁵Israel kadi bekyuli lɛlɔ katɔ bɔkɔliku muudie bana ekpidi keyi. Anwuɔsu na ama bani ndi Eƒraim kaba kemmo bebi mmɔ badubo bubuli, na Yuda kadi bekyuli lɛnɔ bebunku-ma, na bana ƒui badubo bubuli.

⁶Na badubuti bana bebuo lidu lidu bada na babawia ami bana Katɔti ulu, nsu balanu-mi, ɔsika línwini kama lɛ́kya-ma.

⁷Bátadi Unwoti litemi lɛlɔ, na bátáwɔ basɔnɔbi béyile kɔduli. Anwuɔsu kɔbuli kɔwɔdi limeyi kadikɔ na ama ku bana mmo ƒui bɔdubo udu bɔyii kede kede ƒui.

⁸“Vwi kakpɛɛ na alɛ-ma kpakplaa ete-ma bɔti na benu kekpo kɔku na Gibea kalɔ lɛlɔ ku Rama ku Betel kesii kani na likpidi bɔbla bɔ́ƒɔ mmɔ ƒui. Na bibo kudu na Benyamin kadi bekyuli bavi batɔ!

⁹Ami Unwoti ndubo mbani Israel kɔtu na lɛyila-ma udu ƒui. Na ɔmɛni ɔdi kenye kpakplaa kani na muusé teete Israel adua ammɔ ɔdi biala.

¹⁰Yudaƒuɔ batɔnkune bese aani bekyuli bani benye baavumana lɛmingyii kɔlɛkɔ uwi biala. Na ndubo kɔnyi buti bɔkya-ma geen.

¹¹Baƒiɔ bani na Israel kadi bekyuli basiaku baakpá nénwini kɔtɔ bɔdu úte-ma, anwuɔsu na ala enye eekpóku-ma na beesusu-ma lɛni uwi biala.

¹²Na ɔƒaani ni, ami Unwoti ndubɔya na beklubi baƒɔ Israel kadi bekyuli lɛlɔ kemmo na bebun.

¹³“Na uwi ɔni na Israel ku Yuda bekyuli bánu bana ɔlɛ ɔni nda-ma báti ni, békeli bésie Asiria ɔga unengudi kudɔ banii ubunku-ma. Nsu útakana-ma kebunku kadi bute na ɔbwi-ma.

¹⁴Anwuɔsu ndubo-ma lɛlɔ aani gyata ɔni na anumi égyie-nwu geen ku kɔnyi na lɛduli-ma ligyingya kɔkɛ kɔkɛ lɛtɔlɔku. Na ɔdi uuubo na ɔkana-mi lɛla lɛdi buye iye utile-mi kuƒi.

¹⁵Na ndubɔsɔ linwini ntélie mina keliekɔ wetédu uwi ɔni na ama alati báƒɔ enu ka bábla ekpidi na benwini babawia-mi kama ulu. Na ɔkɛnku bana lɛbibo ɔsu ni, badubunwini kayi na basiaku-mi kpakplaa.”