Read Lelemi Hosea 8 Bible Online

Hosea 8 - Lelemi bible

Hosea 8

¹“Vwi kakpɛɛ na ebo Israelƒuɔ ɔda na ete-ma bɔti anii bekisine bakɛ bana eli baatú-ma na badubo bebéyu-ma batu aani kasangbii ka bébile mina bunyimi na báta bénye mina ɔda bubo lɛlɔ ɔsu.

²Baava taakpali-mi banii bagyi-mi aani bana Unwoti ku Katɔti!

³Nsu bina bekisine badubo-mii bɔbɔku ka bíni bunyimi bɔbuni bɔni na ami ku-mii búnyimi ɔsu.

⁴Bɛ́ƒuna baga ku batɔnkune bíte lɛlɔ, na bíteye-mi kasusu. Na bíti sika ugyiedi ku ɔƒualadi bɛ́bla baƒiɔ bíte lɛlɔ, na ama nákpanku-mii bátákya bɔkywi kemmo.

⁵Na líti kɔnyi lɛ́kya awɔ Samaria ɔma unengudi ɔmmɔ na ƒula baƒiɔ bani na ávɔ na ɔmantɛ akɔ ubi udu kenye mmɔ ɔsu. Uwi ɔmani na aakali ka adubɔsɔ abla sɛɛn na mina anumi?

⁶Na Israelni ɔdi nébo úbavɔ baƒiɔ bammɔ úte-ɔ. Nsu ami kani ndi Katɔti unwi ɔmmɔ, anwuɔsu baƒiɔ bammɔ badubo bɔbwɛ bugyingya.

⁷“Ɔsika si ágya ɔƒɛƒɛɛ ni, ɔƒɛƒɛɛ ɔni mɔɔkya ligede na adubo bɔnu. Na kamu kani nátakya ebi kalayu taabla ligyie na bekulo-ka bababla lɛdila lɛdi. Na si ina kákya ebi muedi ni, bekisine badubo-ka buyu bɔtɔlɔku-mii kudɔ ƒui.

⁸Israel amii ɔdi ɔ́sa, na kadi bamba bekyuli badubo-mii bɔnu ka bɛɛɛdi lɛla lɛdi.

⁹Na bílieku ebuo atuɔkplune aani akwa. Anwuɔsu na bíkeli bísie Asiriaƒuɔ kudɔ bɛnii bitáblaku-ma unwi na bɛwia kebunku.

¹⁰Ngyi kesii kani na ndubo-mii bɔkɛ, ina bi kuye na amii ku kalɔ bamba bekyuli bammɔ bɛ́kya ka bɛƒɔ bite-ma, ɔsika bana baga ku benengu bammɔ kani ndubo-mii bususu.

¹¹“Israelƒuɔ, bɛ́tu akpabi pii bíte lɛlɔ kesii kani na bɛɛkpá bina ekpidi bɔbla akpala. Na akpabi ammɔ énwini ekpidi kablakɔ akpabi.

¹²Na ka mɔɔwia ka bɛbla akpala bite-mi ɔsu ni, lɛ́ya na bénweni-nya nwaa bése béte-mii, nsu bíni-nya aani lɛla lɛni naaakɛ-mii.

¹³Bɛɛdú bina bebuo babuni ƒui taabla akpala na bɛɛdi akpala ammɔ lɛnɔ, nsu ami Unwoti anwu muuní bina akpala ammɔ. Mina anumi adubɔsia bina ekpidi lɛlɔ na lɛni-mii kɔtu na bɛsɔ binwini bisie Egyipte.

¹⁴Israelƒuɔ, ami nédie-mii, nsu bɛ́yiƒala-mi. Na awɔ ku Yuda ƒui bɛ́tu baga kuliekɔ bonwu bonwu ku lɛma linengudi pii lɛni mbo kɔgyumanakɔ bíte lɛlɔ. Nsu ndubo bɔya na ogya ubo ubakyula lɛma lɛmmɔ ku kɔgyumanakɔ kɔmmɔ ƒui na ubile lɛla biala.”