Read Lelemi Amos 2 Bible Online

Amos 2 - Lelemi bible

Amos 2

¹Unwoti ɔnini, “Ndubo Moabƒuɔ kɔtu bɔni na bana ekpidi pii ɔsu na lɛɛɛdubo mina kasusu bɔvumana. Bákyula Edom ɔga ekubi bénwini ntɔ na bátabu-nya.

²Anwuɔsu ndubɔya na ogya ubakyula Keriot kɔgyumanakɔ kɔni na ɔ́tu. Na bekyuli badubunu kekpo kɔvanu ku ese ani na baavwi si uwi ɔni na mɔɔkyula Moab ɔma

³ku nwuna baga ku batɔnkune bammɔ. Ami Unwoti násu!”

⁴Unwoti ɔnini, “Ndubo Yudaƒuɔ kɔtu bɔni na bana ekpidi pii ɔsu, na lɛɛɛdubo mina kasusu bɔvumana. Béni mina ala ani mɔɔtina-ma na banii baladi mina litemi lɛlɔ. Na baƒiɔ bani na bana bati kuuku bákpa na baaadi lɛla lɛdi bákpanku-ma na báyii ulu.

⁵Anwuɔsu ndubɔya na ogya ubakyula Yuda ɔma na ubile kɔgyumanakɔ kɔni na bátu na Yerusalem.”

⁶Unwoti ɔnini, “Ndubo Israelƒuɔ kɔtu bɔni na bana ekpidi pii ani ɔsu na lɛɛɛdubo mina kasusu bɔvumana. Béti mina bekyuli babuni bani mɔɔdi mina litemi lɛlɔ béye báƒɔ egulabi. Na béye bani mɔɔyaki ala na lɛgbanvuo kuye kenye.

⁷Na bébo bawabane báva kalɔ na bédi bani na mɔɔwia kebunku bése kɔmadɔ. Na báya na bekyuli balábu mina lɛnyi lɛni nse kedee, ɔsika ubi ku ɔti ƒui baatɛ ugblebi unwi kudɔ na baayá na mina lɛnyi liisé lɛlɔ.

⁸Na adala ani na báƒɔ ɔkpa básiku bekyuli kudɔ na kayu kenye na baavá taatɛ na kakpakɔ biala. Na kɔyu kɔni na bákya bekyuli ni, beeti egulabi ammɔ teeye ntɛ na baaní-mu muedi na Unwoti kakpakɔ mmɔ.

⁹“Israel, Amoriƒuɔ lɛnɔ benye mmɔ uwi ɔni na bíduo Kanaan. Bekyuli bammɔ badi bekyuli bani na bákuku aani egyii enengudi ani na ebo ɔkplu geen. Nsu lɛ́bɔku-ma lídie mmɔ ƒui lidu ku lidu.

¹⁰“Lɛ́ƒɔ-mii lɛ́siku Egyipte kalɔ lɛlɔ, na akwa aavlene sɔɔn na lɛ́da-mii na lɛ́nu-mii lɛlɔ na ketele kalɔ kakwiidi kammɔ kemmo. Na líti Amoriƒuɔ kalɔ líte-mii.

¹¹Lɛ́bla bina bebi bananabi badi na badi mina kenye bediene. Na lídie bana badi líse sɛsɛɛ úte mina kabla na baalɔ-ma Nasareƒuɔ. Ala amɛni ƒui amii Israelƒuɔ bɛgyi ka adi litemi geen. Ami Unwoti násu!

¹²Nsu bítile kenye bediene bammɔ kuƒi ka batasu mina kenye. Na bínye Nasareƒuɔ bammɔ lɛlɔ ka bataani ntɛ bɔni na lítile-ma kuƒi ka batani.

¹³“Anwuɔsu ndubo-mii etila butile na bɛƒɛ biwi kalɔ aani kalɛ na baatɛ ala teetuloku kɛɛkɛ na ɔɔƒɛ teewi kalɔ.

¹⁴Ina dɛ na bina lɛgba lɛɛta ni, bilakana bukeli. Na ina dɛ na bibo ɔlɔkplu ni, ndubutile-mii ala na libile-mii ɔlɔkplu ɔmmɔ na bikpi muedi, na ina dɛ na adi ukpone ni, alakana lɛlɔ budie.

¹⁵Ɔƒɛni ina dɛ na kataminta ku atula bubo bɔ́ma-mii ni, bilakana kekpo kammɔ kenye bunye. Nsu bilakana bukeli bɔtɔlɔ lɛnɔ ku lɛgba iye bapɔnkɔ na ɔdi ɔkɛ ngba.

¹⁶Ina dɛ na bibo kayi ku ɔlɔkplu ni, badubo-mii bɔbɔku bɔtɔlɔku na bedie-mii kasɔngya kede kede. Ami Unwoti násu!”