Read Lelemi Obadia 1 Bible Online

Obadia 1 - Lelemi bible

Obadia 1

¹Unwoti ɔ́su kenye kadi ɔ́siku Edomƒuɔ lɛlɔ na údie ɔ́tina Obadia ɔnini, “Ami Unwoti lɛ́tala ɔtu ɔdi ku kenye kadi, na líbo ɔda ka kadi bekyuli ƒui betékpo Edom.”

²Na Unwoti ɔ́su Edomƒuɔ ɔnini, “Ndubo-mii bɔbla na bɛsɔ na kadi ƒui akɔ na balabu-mii balakya lɛla lɛdi akɔ.

³Lɛmɛnɛ likpludi kani na bilie bɛɛkun na abi eli, na atakpɛ akɔ kesii kani na bɛɛkali bɛnii bɛ́kɛ kagyumanakɔ mmɔ na bɛɛsu bɛnii, ‘Ukyuli ɔdi ulakana-bu bɔni bɔsiku mɛni buboku kalɔ na ɔdi-bu lɛlɔ.’

⁴“Nsu ina dɛ na bíveyi bɛ́kɔ katɔ katɔ aani kɔdigbo aasɛ na bɛ́bla bina ayu na ayabi lɛlɔ muedi ni, ndubo-mii kalɔ buboku. Ami Unwoti násu!

⁵“Si beyune bábwɛ béduo kaduli kadi usien ni, lɛla lɛni na baawia kani na beeti. Na si bekyuli béde egyiibi adi ni, ana ƒui alasa bɔla na egyii kalɔ.

⁶Ƒula akɛla ani náƒɔ-ɔ kuye geen mmɔ ƒui badubo-nya buti bɔtɔlɔku kede kede.

⁷Ƒula bebunkune bani na benye-ɔ kama baaadi bekyuli bani na basia lɛnu. Budi na bédi-ɔ bálɛku ƒula ɔma bétédu ɔmii lɛlɔ. Na ƒula bakpana bammɔ bálɛ-ɔ kama na básia lɛlɔ bákɛ bana kɔsia. Ama bani na awɔ ku-ma bɛɛsála taadi. Na baakya-a lɛlɔ lɛma teeye banii wɛ na nwuna lɛnunda ƒui lɛkya.”

⁸Unwoti ɔnini, “Si limeyi lɛmmɔ lídu ni, ndubo-ɔ udu bɔyila na lɛdu ƒula banundane ƒui ku bana kɔkwɛ ƒui.

⁹Liƒu bonwu lɛdubo Teman ɔma unengudi ɔmmɔ bekpone buƒie, na badubɔdu amii Edomƒuɔ ƒui.

¹⁰Bɛ́bla bina lɛlɔ bekyuli bani ndi Yakob kaba kemmo bebi kalala. Anwuɔsu ɔƒaani ni, bɛdubo kɔƒa bɔdi uwi ƒui na badi-mii lɛlɔ.

¹¹Bínye bɛ́nu uwi ɔni na kadi bamba bekyuli béduo Yerusalem na béti ala ani ƒui na baayɔ́ bátɔlɔku. Na bátu egulabi bánu na Yerusalem lɛlɔ. Na geen ni, bina ɔbladu ɔ́tina ka bítavumanaku baƒɔ bammɔ.

¹²Bi ɔsu na lɛlɔ lɛɛyɔ́-mii si ɔgbankpi ɔmɛni udu ɔ́lɛku bina lɛlɔ bekyuli? Na bi ɔsu na ebiti aada-mii lɛni si Yudani biala uubó abi amɛni udu?

¹³Mina bekyuli na badi, nsu amii bɛɛbla-ma kalala. Bításia-ma lɛma kemmo ƒui bɛ́vi na bɛɛpii-ma taama. Na bíyu ala akladi ani nébu na bana lɛma kemmo ƒui.

¹⁴Uwi ɔni na bakya lɛbibo kemmo ni, utalɛ ka bílie bani muukeli ulu lɛlɔ na bíƒie-ma bíte bana bekisine bani muukpó-ma.

¹⁵“Limeyi lɛdubo lɛni na ami Unwoti ndubɔtɛku kadi ƒui litemi. Na amii Edomƒuɔ ni, bɛdubɔƒɔ kayu kani ƒui na bɛda na bina ablala kenye.

¹⁶Línye Yudaƒuɔ lɛlɔ na báni mina kɔnyi aani ntɛ na mina kɔbi kedee lɛlɔ. Na uwi uletu kadi bamba bekyuli lɛnɔ badubɔkɛ ama ɔdi na bayii ku udu ku udu ɔni na basɔ belénu bana ɔdi kɔku lɛnɔ kudii.

¹⁷Na Unwoti bekyuli bani ndubɔlɛ ɔgbankpi ɔmmɔ kemmo badubulie Sion Kɔbi kedee lɛlɔ. Na Yakob kaba kemmo bebi bammɔ badubɔsɔ baƒɔ bana kalɔ kani na nka kadi bana ɔdi mmɔ basiku bekyuli bani néƒie-ka báƒɔ mmɔ kudɔ.

¹⁸Na Israel ɔdubunwini aani ogya na ɔkyula Edom ɔni na ndubɔbla aani lɛtɔ lɛni ndubɔda ogya. Ami Unwoti násu!”

¹⁹Na Israelƒuɔ bani na beli Negev kalɔ kemmo badubuti Edomƒuɔ abi lɛlɔ kɔlɔ kɔmmɔ. Na bani na beli abi lɛlɔ lɛnɔ beti Ƒilistiƒuɔ ku Eƒraim ku Samariaƒuɔ kɔlɔ. Na Benyamin kɔdua beti Gileadƒuɔ kɔlɔ.

²⁰Na bani na kekpo kéƒie asa na básɔ bénwini bébo lɛnɔ beti Kanaanƒuɔ kalɔ útálɛ Sareƒat. Na bekyuli bani na béƒie básiku Yerusalem na béti-ma bésienku Seƒarad ni, badubɔdi lɛma lɛni nkya Negev mmɔ lɛlɔ.

²¹Na bani Unwoti ɔ́ƒɔ mmɔ badubɔkya Sion Kɔbi lɛlɔ na badi Edom lɛlɔ. Na lɛga kadikɔ kammɔ ƒui kenwini Unwoti kadi.