Read Lelemi Yona 2 Bible Online

Yona 2 - Lelemi bible

Yona 2

¹Uwi ɔni na Yona ɔkya kabɛ kamɛni kaƒɔ kemmo na ɛpu ntu kalɔ ni, ɔ́kpali nwuna Unwoti Katɔti na ɔ́su ɔnini,

²“Na mina kɔnyana buwulo kemmo ni, O Unwoti, lɛ́kpali-ɔ na énu-mi bɔkpali. Na líwulo lívele ƒula kebunku ɔ́siku kekpine, na énu-mi bɔkpali.

³Édie-mi ákya ɛpu ntu kalɔ kalɔ ƒui likpo lɛni ntu bɔ́ka bɔ́mana-mi, na ɛpu únwini avlɔvɔ na eebó-mi teesienku lɛƒɛnyi lɛni ƒui.

⁴Lɛ́bu nnii áyila-mi udu ƒui na ƒula anumi, na nsɔ lɛɛɛdubo ƒula kakpakɔ kedee bɔnu kudii.

⁵Ɛpu ntu búƒie-mi na ɛpu ntu kemmo, na alakpi lɛnɔ ákwɛ aka amana-mi lɛlɔ ƒui.

⁶Lɛ́yu lísie ɛpu ntu kalɔ kalɔ na abi enengudi ƒui kalɔ kesii kani na lɛ́bu nnii bébo-mi lɛkpu bákya uwi ƒui. Nsu awɔ Unwoti mina Katɔti áda-mi édie éboku ngba.

⁷“Uwi ɔni na lɛ́bu nnii mina ngba bɔ́sa ƒui ni, lɛ́kpali-ɔ, na awɔ mina Unwoti énu mina bɔkpali na ƒula kakpakɔ kedee mmɔ.

⁸Bani mɔɔkpá baƒiɔ ku bani neeebo kɔsia kɔdi bénwini kama bákya awɔ ɔni mɔɔbla-ma lɛƒɔndia.

⁹Nsu ami ndubɔtu lɛnu limwi-ɔ na liti akpala lite-ɔ na lɛdi mina linyese lɛlɔ! Ɔsika ngba bɔƒɔ bɔɔsí Unwoti kudɔ.”

¹⁰Amu na Unwoti údie lɛdi ka kabɛ kammɔ kadala Yona úbewi ketudɔ. Na úbo lɛni.