Read Lelemi Bumomo Bɔka 10 Bible Online

Bumomo Bɔka 10 - Lelemi bible

Bumomo Bɔka 10

¹Amu na Unwoti ɔ́su Mose ɔnini,

²“Tu sika ɔƒualadi na eti avɔ kɔkpɛɛ inyɔ, na eteeti-ku taalɔ Israelƒuɔ taasala ku kati bute uwi ɔni na bata bana keliekɔ bayu ulu.

³Si bávwi kɔkpɛɛ inyɔ bɔmmɔ ni, na Israelƒuɔ ƒui ɔlɛka babasiaku-ɔ na Unwoti Adi Kevo kammɔ anumi.

⁴Nsu si bávwi kakpɛɛ kenwi ni, na ɔɔtina ka benengu bammɔ ku baduɔti bammɔ ƒui ɔlɛka babasa-a kudɔ na Unwoti Adi Kevo kammɔ anumi.

⁵Si bénu kɔkpɛɛ bɔku klukwii kunwi kani, ni, na ɔɔtina ka adua ani náda keliekɔ na ɔƒɛ katukɔ kakɛ na ɔlɛka bata bayu ulu.

⁶Na si básɔ bénu-ka bɔvwi lɛni kani kunyɔdi ni, na adua ani náda keliekɔ na kada kakɛ na ɔlɛka bata bana keliekɔ bayu ulu. Kɔkpɛɛ bɔvi klukwii ɔmɛni ndubɔbla kati bute uwi ɔni na bata bayu ulu.

⁷Na bekyuli bammɔ ƒui bɔlɔ bɔsala ni, ɔlɛka kɔkpɛɛ kɔmmɔ bɔvwi bɔvumana ku kati bute kalɛ na bata bayu ulu.

⁸“Na Aaron bebi bani ndi bakpane ndubo kɔkpɛɛ kɔmmɔ butaavwi. Na ɔda bubo bɔmɛni buse bute-mii uwi ƒui ku bina bawɔ bawɔ.

⁹Na si bɛ́ta bɛnii biikpóku bina bekisine bani na banii babaƒɔ-mii kalɔ ni, na bɛvwi kakpɛɛ kammɔ kɔnakunwi. Na bina Unwoti Katɔti ɔdubo-mii bunyimo na ukpo ɔƒɔ-mii na bina bekisine enu kemmo.

¹⁰Na bina lɛlɔyɔ emeyi ku emeyi ani na bɛ́lɛ ugyii bíse aani kɔbuli kɔwɔdi bɔlɛ ku abamba ni, bɛvwi kɔkpɛɛ kɔmmɔ na bɔkyula akpala ku unwi bɔbla akpala ammɔ lili na adubunwini bina lɛlɔ enyimo ete Unwoti na bina lili. Ami ndi bina Unwoti Katɔti.”

¹¹Na lɛkwa linyɔdi kɔbuli kunyɔdi limeyi aavlanyɔdi lɛlɔ ka Israelƒuɔ bálɛ Egyipte kalɔ lɛlɔ ni, liƒlukutu lɛmmɔ lɛ́sɔ lɛ́ta na Unwoti Adi Kevo lɛlɔ.

¹²Amu na Israelƒuɔ báta Sinai ketele kalɔ kakwiidi kemmo mmɔ báyu ulu na bávi ekpo ekpo. Na liƒlukutu lɛmmɔ lítáyu lílie Para ketele kalɔ kakwiidi kemmo.

¹³Na kudeedi kɔmɛni na báta báyu ulu na Unwoti ɔda bubo kenye ɔkɛnku Mose lɛlɔ.

¹⁴Na Yuda kaba bekyuli náka bɔta na bana esu kenye ku bana likposela na Aminadab ubidi Nahason ndi bana ɔtɔnkune.

¹⁵Na Suar ubidi Netaneel ɔtɔnku Isakar kaba bekyuli lisu.

¹⁶Na Helon ubidi Eliab ɔtɔnku Sebulon kaba bekyuli lisu.

¹⁷Ɔmmɔ kama bégyingya Unwoti Adi Kevo kammɔ na Gerson bebi ku Merari bebi bani nti-ka lɛnɔ báyu ulu.

¹⁸Ɔƒɛni Ruben kaba bekyuli násia-ma kama, na bana esu esu kenye, na Seleur ubidi Elisur ɔtɔnku-ma ku bana likposela.

¹⁹Na Surisadai ubidi Selumiel ɔtɔnku Simeon kaba bekyuli lisu.

²⁰Na Deuel ubidi Eliasaƒ ɔtɔnku Gad kaba bekyuli lisu.

²¹Ɔmmɔ kama Kehat kaba bekyuli bani nti Unwoti Adi Kevo kemmo ala kedee basia. Na ɔdi ka balɛ Unwoti Adi Kevo kammɔ asa na ama betédu mmɔ.

²²Ɔmmɔ kama Eƒraim kaba bekyuli nsia na bana esu esu kenye, na Amihud ubidi Elisama ɔtɔnku-ma ku bana likpose aƒlaga.

²³Na Pedahsur ubidi Gamaliel ɔtɔnku Manase kaba bekyuli lisu.

²⁴Na Gideoni ubidi Abidan ɔtɔnku Benyamin kaba bekyuli lisu.

²⁵Amu na kawɔlɔkɔ ƒui ni, Dan kaba bekyuli bakpɛ kama na bana esu kenye aani lisu likplodi. Na Amisadai bidi Ahieser ɔtɔnku-ma ku bana likposela.

²⁶Na Okran ubidi Pagiel ɔtɔnku Aser kaba bekyuli lisu.

²⁷Na Enan ubidi Ahira ɔtɔnku Naƒtali kaba bekyuli lisu.

²⁸Na lɛni na Israelƒuɔ kaba bekyuli esu esu ammɔ béti bésie bana ulu ɔmmɔ ka báyu ulu.

²⁹Amu na Mose ɔ́su ulekudi ɔti Hobab ɔni ndi Midiani ɔni baalɔ Reuel ubidi ɔnini, “Uwi údu ka buteesie kalɔ kani na Unwoti ɔ́su úse ɔnini, ‘Ndubuti-ka lite-mii,’ mmɔ lɛlɔ. Bo na abasiaku-bu, na bɔdubɔda-a kaduɛ, ɔsika Unwoti úse ala abuni kenye úte Israelƒuɔ.”

³⁰Amu na Hobab údie kenye ɔnini, “Oowo, lɛɛɛdubo mmɔ busie, mmomu línwini lísela mina bati ku beni kalɔ lɛlɔ.”

³¹Mmɔ na Mose ɔ́su-nwu ɔnini, “Buvele nda-a tatɔlɔ-bu kudɔ. Ɔsika agyi kesii kani búsela bútáda bula keliekɔ na ketele kalɔ kakwiidi kemmo, na adubɔbla ɔtɔnkune ete-bu.

³²Na si asiaku-bu ni, ala abuni ani na Unwoti ɔdubute-bu mmɔ ni, abu ku-ɔ ƒui bɔdubule-nya.”

³³Ɔmmɔ ɔsu Israelƒuɔ báta Sinai kɔbi kedee kaƒɔna mmɔ na bésie emeyi atɛ. Na Unwoti Bunyimi Adaka ɔtɔ-ma emeyi atɛ ammɔ ƒui kalɛ na utáwia keliekɔ kadi ute-ma na banwuna.

³⁴Na Unwoti liƒlukutu lɛmmɔ lɛɛƒa-ma katɔ ɔƒiiwi ɔ́si ɔni na báta bakɛ ulu.

³⁵Na uwi biala na Bunyimi Adaka ɔmmɔ ɔdubo bɔgyu ni, Mose uudie kudu kɔmɛni, “Unwoti ta! Na ƒula bekisine begyingya. Na aya na bani muukisi-ɔ bekeli na ƒula anumi.”

³⁶Na uwi biala na Adaka ɔmmɔ ɔdubo budi bunye na Mose ɔsɔ udie kudu ɔnini, “Unwoti, yu bo, Israelƒuɔ bekyuli mpim mpim akɔ.”