Read Lelemi Bumomo Bɔka 12 Bible Online

Bumomo Bɔka 12 - Lelemi bible

Bumomo Bɔka 12

¹Amu na Miriam ku Aaron bése kalɔ beetemi teewi Mose. Ɔsika Mose úsie útéti Etiopiani uleku ɔdi.

²Na beeye banini, “Mose lɛlɔ lɛti na Unwoti ɔ́tɛmi ɔ́siaku na útatɛmi útasiaku abu lɛnɔ lɛlɔ dii?” Na Unwoti únu lɛla lɛni na básu.

³Na Mose ɔdi ukyuli ɔni use buɛɛ, na úboku lɛlɔ kalɔ útulo ukyuli biala na kalɔ kamɛni lɛlɔ.

⁴Kɔnakunwi Unwoti ɔ́kpali Mose ku Aaron ku Miriam ɔnini, “Bina ɛtɛ ƒui bɛlɛ bibo Unwoti Adi Kevo mɛni.” Anwuɔsu bana ɛtɛ bammɔ ƒui bálɛ bébo.

⁵Amu na Unwoti ɔ́yu úbo kalɔ na liƒlukutu bonwu kemmo, na úbenye Unwoti Adi Kevo kammɔ anumi na ɔ́lɔ Aaron ku Miriam. Ka bálɛ bébo ni,

⁶ɔ́su-ma ɔnini, “Binu etemila ani ndubo-mii bɔsu mɛni. “Si Unwoti kenye udiene ɔdi ɔkya-mii akɔ ni, muudie lɛlɔ taatina-nwu na kɔyu kemmo ala budie bɔtina kemmo iye kɔna kemmo na mɔɔtɛmiku-nwu.

⁷Nsu mina kabla ɔblane Mose anwu ni, ɔɔɔdi lɛni na mɔɔbla-nwu. Ɔdi ukyuli ɔni mɔɔbla ala ulu lɛlɔ na mina kaduli.

⁸Mɔɔtɛmi ku anwu anumi ku anumi, na ɔɔɔdi agyolo kemmo, mmomu atɛ nwaa kemmo, na ɔɔnu kalɛ na Unwoti use ku nwuna anumi. Na bi ɔsu na bítayia ka bɛsu lɛla lɛdi na bɛ́ta bínye mina kabla ɔblane Mose lɛlɔ?”

⁹Mmɔ na Unwoti kɔnyi kúbakɔ katɔ na Aaron ku Miriam lɛlɔ, na ɔ́gyu-ma kudɔ na ɔ́tɔlɔ.

¹⁰Uwi ɔni na liƒlukutu lɛmmɔ lɛ́ta na Adi Kevo ɔmmɔ eli ni, amu na ɔlɛgyie ɔ́lɛ úwi Miriam lɛlɔ, na nwuna ɔlɔna ɔ́ta ɔ́bla ƒututuu aani etubankɛ. Uwi ɔni na Aaron únwini na ɔ́nu ka ɔlɛgyie uwi Miriam lɛlɔ ni,

¹¹ɔ́su Mose ɔnini, “Mina ati, buvele nda-a, tenye tanu na kɔdɔlɔ likpidi lɛni bɔ́bla mɛni lɛtuni lɛsiaku-bu.

¹²Na taya na Miriam únwini ubi ɔni báwɔ na útata ntu kemmo na nwuna ɔlɔna kakɛ kadi lɛnɔ káyii udu.”

¹³Amu na Mose úwulo ɔ́kpali Unwoti ɔnini, “O Unwoti Katɔti, buvele nda-a, bwi Miriam ɔlɛ ɔni nda-nwu.”

¹⁴Amu na Unwoti údie Mose kenye ɔnini, “Si nka bɔbwɛ na ɔti ɔ́bwɛ lisuo úwi Miriam anumi ni, nka kɔƒa kɔɔɔdubo-nwu bukpo emeyi maatɛ? Anwuɔsu biti-nwu bɛlɛku bina kakyakɔ mmɔ emeyi maatɛ. Na ɔmmɔ kama bɛsɔ bitiku-nwu biboku.”

¹⁵Ɔmmɔ ɔsu báda Miriam bédie bana kakyakɔ mmɔ emeyi maatɛ, na bekyuli bammɔ lɛnɔ básɔ bátata bana keliekɔ mmɔ útédu ka emeyi maatɛ ammɔ édu. Na básɔku-nwu béboku.

¹⁶Ɔmmɔ kama bekyuli bammɔ báta Haserot na bétélie Paran ketele kalɔ kakwiidi kemmo.