Read Lelemi Bumomo Bɔka 14 Bible Online

Bumomo Bɔka 14 - Lelemi bible

Bumomo Bɔka 14

¹Usien umodi ɔmmɔ ƒui Israelƒuɔ bákya beewulo momoomo ku kudu.

²Na ɔkɛnku ɔmmɔ ɔsu bekyuli bammɔ bákya baadɔnku Mose ku Aaron kalɔ kalɔ. Na baasu banini, “Si bukpi na búkpi bɔ́kya Egyipte iye ketele kalɔ kakwiidi kemmo mmɔ muedi nka ɔdia utulo!

³Na bi ɔsu na Unwoti úti-bu úboku kalɔ kamɛni kemmo na bubekpi na kewii kenye? Bula bekisine badubo bula beleku ku bebi buƒie bɔtɔlɔku. Ɔɔɔdia-bu uuutulo ka bɔsɔ bunwini buteesie Egyipte mmomu?”

⁴Anwuɔsu básu lɛlɔ ka, “Bɛya na bɔwia ɔtɔnkune na bɔsɔ bunwini buteesie Egyipte.”

⁵Mmɔ na Mose ku Aaron báyu bebi kalɔ na bekyuli bammɔ ƒui anumi.

⁶Na Nun ubidi Yosua ku Yeƒune ubidi Kaleb bani mbunku bekyuli bani nésie bátávi bánu kalɔ kammɔ báni bana lɛwu bábwɛ.

⁷Na básu Israelƒuɔ bammɔ ƒui banini, “Kalɔ kani kemmo na bútávi bɔnu mmɔ kadia geen sɔsɔ.

⁸Na bɔɔsu-mii ka si ɔ́yɔ Unwoti kaƒɔ ni, ɔdubɔtɔnku-bu na butéduo kalɔ kani kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii na kabla bula kadi.

⁹Na bɔta kani na bitata bitenye Unwoti lɛlɔ. Na bitaya na liƒu lɛdi lɛda-mii na bekyuli bani nkya kalɔ kammɔ kemmo lɛlɔ ɔsu. Ɔsika basɔ beeebo bɔgyumana bɔdi, nsu Unwoti uli ku abu na bɔdubo-ma bubweli. Anwuɔsu bitayia!”

¹⁰Na uwi ɔni na bekyuli bammɔ ƒui bábla kasusu ka badubo Yosua ku Kaleb atabi bubo ni, mmɔ na Unwoti bukeye bɔ́bwɛ bɔ́lɛ Unwoti Adi Kevo anumi na Israelƒuɔ bánu.

¹¹Amu na Unwoti úye Mose ɔnini, “Na akɔla ala lidu lidu lɛni na lɛ́bla na bekyuli bamɛni anumi kama ni, uwi ɛlɛ na badubuni-mi bétédu, na baláƒɔ-mi baladi, na bataata teenye taanu-mi anumi lɛni?

¹²Ɔmɛni ɔsu ndubo ɔ́lɛ buɛ ɔdi buti bɔkya bekyuli bammɔ akɔ na lɛyila-ma udu. Nsu awɔ Mose anwu ni, ndubo bɔya na kadi bekyuli pii bani na bemomo betulo bamɛni balɛ basi-ɔ kemmo na bayu ɔkplu lɛnɔ betulo-ma.”

¹³Amu na Mose ɔ́su Unwoti ɔnini, “Awɔ nákpanku bekyuli álɛku Egyipte kalɔ lɛlɔ na ƒula ɔyikun kenye. Na Egyipteƒuɔ bammɔ badubo lɛla lɛmɛni bunu kalɛ na ábla awɔ ɔlati bekyuli.

¹⁴Na badubo bekyuli bani nlie kalɔ kamɛni lɛlɔ lɛla lɛmɛni bɔsu. Kalɔ kamɛni bekyuli béenu kukuuku kalɛ na awɔ Unwoti akya Israelƒuɔ akɔ, na bánu-ɔ anumi ku anumi ku kalɛ na ƒula liƒlukutu lɛ́yu líbelie-ma eli ku kalɛ na aatɔ-ma anumi aani liƒlukutu lɛkpa bonwu kalɛ na ɔƒiiwi, na usien lɛnɔ aani lɛgyavonku bonwu kalɛ.

¹⁵Na si ádu bekyuli bamɛni ƒui kɔnakunwi ni, kadi bamba badubo ƒula litemi lɛmɛni bunu na badubo bɔsu banii,

¹⁶‘Unwoti útakana nwuna linyese lɛlɔ bɔdi na ɔkpanku bekyuli bamɛni usienku kalɔ kani kenye na ɔ́su-ma use mmɔ lɛlɔ. Ɔmmɔ ɔsu na ɔ́du-ma ɔ́kya ketele kalɔ kakwiidi kemmo mmɔ.’

¹⁷“Ɔmɛni ɔsu muuvele-ɔ, O Unwoti, die ƒula ɔyikun unengudi keyi aani kalɛ na ásu ése anii,

¹⁸‘Ami Unwoti ndi Katɔti ɔni mɔɔnu kɔnyana, na mɔɔbla lɛƒɔndia uwi ƒui, na neeeti kɔnyi pla pla. Mmomu mɔɔyɔ́ mina bekyuli na muuti bani nénwini kama bákya bana ulikplu ala ku bani mɔɔta teenye-mi lɛlɔ ku ekpidi ƒui taakyiɛ. Nsu mɔɔní bekyuli bani mɔɔƒiɔ́-mi ƒui kɔtu. Naaayiƒala kudii ka lɛni bana bebi ku bawɔ kɔtu utédu kaba katɛdi ku kenedi lɛlɔ ɔ́si ekpidi ani na bana bawɔne bábla ɔsu.’

¹⁹Na ɔkɛnku ƒula lɛƒɔndia bonwu ɔsu ni, ti bana ekpidi kyiɛ-ma aani kalɛ kani na eeti takyiɛ-ma ɔ́si uwi ɔni na bɔ́lɛ Egyipte kalɔ lɛlɔ úbedu ɔƒaani.”

²⁰Amu na Unwoti údie kenye ɔnini, “Líti lɛkyiɛ-ma na kalɛ na évele-mi kenye.

²¹Nsu mɔɔsu geen ka ni, ami Unwoti ɔni nli ngba na mina bukeye bɔ́ƒɔ kayawi ƒui mɛni ni,

²²bekyuli bani nánu mina bukeye na bánu mina akɔla búdie taatina lidu lidu lɛni lɛ́bla na Egyipte kalɔ lɛlɔ ku ketele kalɔ kakwiidi kemmo, nsu báta benye mina litemi lɛlɔ na bákɔku-mi bánu leevu sɔɔn ni,

²³bana kemmo ɔdi biala ulanu kalɔ kani líse kenye ka meti mete bana bati kuuku mmɔ. Na ukyuli biala nétenu-mi litemi na ɔbu-mi uleduo mmɔ.

²⁴Nsu ka mina kabla ɔblane Kaleb anwu úbo kɔyu kɔni návumana na úti nwuna kayi ƒui ɔsiaku-mi kama ɔsu ni, ndubuti anwu ku nwuna kaba bekyuli na betéduo kalɔ kammɔ kemmo na badubo kalɔ kammɔ ala bɔdi.

²⁵Na ka Amalekƒuɔ ku Kanaanƒuɔ belie bésie kɔwɛ kemmo ɔsu ni, kɔnaadi binwini bitásia ketele kalɔ kakwiidi ulu ɔni na úti anumi ɔɔtina Ɛpugyie mmɔ lɛlɔ.”

²⁶Amu na Unwoti ɔ́su Mose ku Aaron ɔnini,

²⁷“Uwi ɛlɛ geen na bekyuli bekpidi bamɛni badubunye bataadɔ bana lɛlɔ kemmo kalɔ kalɔ na mina lɛlɔ betédu? Línu ala ani na benye baaká taadɔnku-mi.

²⁸Anwuɔsu kɔ lɛsa na asu-ma anini, ‘Ami Unwoti nnii na ami ɔni nli ngba mɛni anumi ni, lɛla lɛni na línu lɛ́siku-mii kenye kemmo mɛni na ndubɔya na lɛlɛku-mii.

²⁹Ketele kalɔ kakwiidi kamɛni kemmo na bɛdubo bukpi, amii bani ƒui nákɛ akwa aavlanyɔ ku kama, amu ntu Yeƒune ubidi Kaleb ku Nun ubidi Yosua kani ndubo mmɔ buduo.

³¹“ ‘Na bina bebi bani mmomu na bɛ́kya bɛɛsu bɛnii badubo-ma buƒie batɔlɔku mmɔ ni, ama na ndubo bɔkpanku na betélie kalɔ kani na amii bíni mmɔ lɛlɔ na badi-ka ebi bakɛ ebiti.

³²Nsu amii amu mɛni na bɛdubo bukpi bɔtɛ na kalɔ kakwiidi kamɛni kemmo.

³³Na bina bebi badubo abi bubo na bataaka taamana kalɔ kakwiidi kamɛni kemmo akwa aavlene sɔɔn útédu ka bina ƒui bíkpi bɛ́sa.

³⁴“ ‘Na ndubɔya biti akwa aavlene sɔɔn bibo abi na emeyi aavlene ani na bíti bítávi kalɔ kammɔ kemmo kenye na bina ekpidi ɔsu, na bɛnu bɛti kalɛ na use si ami Unwoti lɛ́kɛ ku bekyuli kɔnyi.’

³⁵Ami Unwoti násu, na ndubɔnu ka ala ani lɛ́su ka mabla bekyuli bekpidi bani nása lili na báta bénye-mi lɛlɔ mɛni ébo lɛni. Na ndubɔnu ka ɔdi biala úkpi na ketele kalɔ kakwiidi kamɛni kemmo.”

³⁶Ɔmɛni ɔsu bekyuli bani na Mose ɔ́tala ka besie na bátávi kalɔ kammɔ kemmo bánu mmɔ, na bénwini bébedie kenye kekpidi básu bekyuli bammɔ ɔsu na baadɔ bana lɛlɔ kemmo kalɔ kalɔ na Unwoti lɛlɔ ni,

³⁷kalɔ kamɛni lɛlɔ litemi likpidi basune ƒui ama ni, Unwoti ɔ́ya na ɔlɛ ukpidi ɔdi ubebo-ma na békpi na Unwoti anumi mmɔ kani.

³⁸Na bekyuli bani ƒui nésie batávi bánu kalɔ kammɔ akɔ ni, Nun ubidi Yosua ku Yeƒune ubidi Kaleb kani nákɛ ngba.

³⁹Amu ka Mose únwini úsie Israelƒuɔ kudɔ na útásu-ma lɛla lɛni na Unwoti ɔ́su-nwu mɛni ni, béwulo bana lɛlɔ geen.

⁴⁰Amu ka kadi kégye ɔtanta tutuutu ni, béyile bésie abi eli na bétévele básu banini, “Unwoti, bɔ́bla likpidi, anwuɔsu buuvele ka bɔdu busie kalɔ kani na awɔ Unwoti ásu ése ka adubute-bu mmɔ kemmo.”

⁴¹Nsu Mose úye-ma ɔnini, “Na bi ɔsu na biládi Unwoti bunyimi lɛlɔ? Lɛla lɛni bɛɛbla mɛni lɛɛɛdubo bɔtɛ bute-mii!

⁴²Anwuɔsu bitesie. Si bísie ni, bina bekisine badubo-mii lɛlɔ bɔdi. Ɔsika Unwoti ɔɔɔsiaku-mii.

⁴³Na si bísie bɛnii bitékpoku Amalekƒuɔ ku Kanaanƒuɔ ni, badubo-mii lɛlɔ bɔdi na badu-mii ku kuwii. Ɔsika Unwoti ɔɔɔdubo-mii kama bɔsiaku ka bíni nwuna litemi na bítadi-ni lɛlɔ ɔsu.”

⁴⁴Ina ka Unwoti Bunyimi Adaka iye Mose útasiaku-ma ni, báyu kayi ɔkplu na báta bésie abi lɛma ka betékpo.

⁴⁵Mmɔ na Amalekƒuɔ ku Kanaanƒuɔ báta na bétékpoku-ma na bádi-ma lɛlɔ na bábi básiaku-ma laa bétédu Horma.