Read Lelemi Bumomo Bɔka 15 Bible Online

Bumomo Bɔka 15 - Lelemi bible

Bumomo Bɔka 15

¹Amu na Unwoti ɔ́su Mose ɔnini, “Kɔ lɛsa na asu Israelƒuɔ anini,

²‘Si bísie na bítéduo kalɔ kani kemmo na lɛ́su ka meti mete-mii na biti-ka bɛbla bina keliekɔ

³na ɔdi ɔɔyɔ́ ka uti ebuo ɔdi ɔsiku nwuna bebuo lidu akɔ ɔbla bɔkyula akpala ƒɛƒɛɛ ani mɔɔyɔ́ ami Unwoti kaƒɔ, iye kenye kadi na úse na ɔnii ɔɔbla akpala iye kayi ƒaa akpala iye akpala ani ndanku emeyi bɔdi ni,

⁴na ukyuli ɔmmɔ uti ɔlaaƒɔ buni lɛkyami linwi ɔni na básala ku nnɔ ɔsii unwi uboku aani edula ebi akpala.

⁵Koƒonu kɔkɔdi biala na ɔdi úti ɔɔbla bɔkyula akpala ni, na uti ntɛ ɔsii bonwu unwi ɔbla ntɛ akpala.

⁶“ ‘Na koƒonu kɔgyani kunengudi biala na ɔdi úti ɔɔbla akpala ammɔ ni, na uti ɔlaaƒɔ buni akyami anyɔ ɔni na básala ku nnɔ ɔsii bonwu unwi ku kakɛ uboku aani edula ebi akpala,

⁷ku ntɛ ɔsii bonwu unwi ku kakɛ aani ntɛ akpala. Na uti-nya ɔbla akpala ɔnyi ƒɛƒɛɛ ɔni mɔɔyɔ́ Unwoti kaƒɔ.

⁸“ ‘Na si ɔmantɛ akɔ na ɔdi úti ɔɔbla bɔkyula ute Unwoti, iye kenye buse kayu bɔƒɔ akpala iye unwi bɔbla akpala adi ni,

⁹ɔlɛka ɔwia ɔlaaƒɔ buni akyami atɛ ku kakɛ ɔni na básala ku nnɔ lɛsii bonwu inyɔ ku kakɛ uboku aani edula ebi akpala,

¹⁰ku ntɛ lɛsii inyɔ na uti ɔbla bɔkyula akpala ammɔ na ɔnyi ƒɛƒɛɛ ɔmmɔ ɔyɔ Unwoti kaƒɔ.

¹¹Na akɔ iye koƒonu kɔgyani iye koƒonu kɔkɔdi iye ese ɔkɔdi ɔdi biala ni, ulu ɔmɛni lɛlɔ na badubɔbla-nwu basiaku ute akpala ammɔ bɔbla.

¹²Ina dɛ na bebuo bammɔ bemomo ni, lɛni kani na ɔlɛka babla ɔdi biala.

¹³“ ‘Na ukyuli biala na ɔdi Israelni ubi geen na úti nwuna akpala úboku ka ubakyula na nwuna ɔnyi ƒɛƒɛɛ ɔyɔ Unwoti kaƒɔ ni, ɔlɛka ɔbla akpala amɛni ɔsiaku ulu ɔmɛni lɛlɔ.

¹⁴Na si uwi biala na baƒɔ bani na belie-mii kudɔ ɔdi ɔɔyɔ́ ka uboku akpala adi ubakyula na ɔnyi ƒɛƒɛɛ ɔmmɔ ɔyɔ Unwoti kaƒɔ ni, lɛni kani na ɔdubɔbla-nya ɔsiaku pɛpɛɛpɛ úsela uwi ƒui na ulavumana. Ɔlɛka anwu lɛnɔ ɔbla ɔsiaku kalɛ kani líbo-mii ɔda.

¹⁵Na ɔda bubo bɔni na buse bute-mii ni, amu kani lɛlɔ na ɔlɛka baƒɔ bammɔ lɛnɔ badi, na bunyimi bɔmɛni buse búsela uwi ƒui ku bina bawɔ bani mebo akɔ.

¹⁶Ɔda bubo bɔmɛni buunyimi amii ku baƒɔ bani na bakya-mii akɔ ƒui.’ ”

¹⁷Amu na Unwoti ɔ́su Mose ɔnini,

¹⁸“Kɔ lɛsa na asu Israelƒuɔ anini, ‘Si bítéduo kalɔ kani lɛlɔ na líti-mii líselaku kemmo

¹⁹na bɛɛdi-ka edula ni, na bidie adi bise na biti bɛkpa bite Unwoti.

²⁰Na ɔlaaƒɔ udeedi ɔni na bɛdubo bɔkɔ bɔsiku bina mmo edula ebi edeedi ani na bɛdubo buwiile buse kakpa ni, biti-nwu bɛbla bodobodo bɛbla akpala bite-mi.

²¹Na ɔ́si ɔƒɛni úsela uwi ƒui ku bina bebi ku bawɔ akɔ ni, ɔlɛka biti akpala amɛni biboku Unwoti ɔsiku bina edula ebi edeedi ɔlaaƒɔ udeedi ɔni na bɛdubɔkɔ kemmo.

²²“ ‘Nsu si tati tati kemmo na ɔdi anu ávi ɔda bubo bɔni na líte Mose mɛni ɔdi lɛlɔ

²³iye ɔda bubo bamba biala na ɔkɛnku-mi lɛlɔ na Mose úte amii kadi bekyuli bammɔ ɔ́si limeyi lɛni lɛlɔ na Unwoti únyimi-mu úti úsela uwi ɔni mebo ƒui kemmo

²⁴na kadi kammɔ ƒui bátadi-mu lɛlɔ na tati tati ɔsu ni, ɔlɛka bawia akɔ na beti babla bɔkyula akpala na ɔnyi ƒɛƒɛɛ ɔmmɔ ɔyɔ Unwoti kaƒɔ ku nwuna lɛlɔ edula ebi ku ntɛ akpala, aani kalɛ na bényimi bése, ku ketukpa na beti babla likpidi lili buvele akpala.

²⁵Ɔmmɔ kama ɔkpane ɔdubɔbla akpala ute bana likpidi kɔtu bɔni budie na kadi bekyuli bammɔ ƒui lili na badubuti bakyiɛ-ma, ɔsika bátati asa na bábla-ni, na ɔmmɔ ɔsu béboku etela ka bakyula bete Unwoti ku likpidi lili buvele akpala.

²⁶Na ɔmɛni bɔbla kama Unwoti ɔdubuti Israelƒuɔ ku baƒɔ bani nkya-ma akɔ ƒui likpidi ɔkyiɛ-ma, ɔsika likpidi lɛmmɔ lɛda bana ƒui ina bátati asa na bábla-ni.

²⁷“ ‘Nsu si ukyuli unwi ɔ́bla likpidi lɛni na útati asa na ɔ́bla-ni ni, ɔlɛka ɔwia ese uledi ɔni nákɛ lɛkwa linwi na uti ubabla likpidi lili buvele akpala.

²⁸Na ɔkpane ɔlɛka ɔbla akpala ute Unwoti úte ukyuli ɔni na tati tati ɔsu na ɔ́bla likpidi lɛmmɔ na Unwoti ɔdubuti ɔkyiɛ-nwu.

²⁹Na ɔda bubo bɔmɛni buse bute ukyuli biala maƒiɔ ɔni na útati útese asa na ɔ́bla likpidi lɛdi, amii ɔmantɛ bebi ku baƒɔ bani nkya-mii akɔ ƒui.

³⁰“ ‘Nsu si ukyuli ɔdi ɔgyi nwaa asa na ɔ́bla likpidi lɛdi na ɔdi ɔmantɛ ubi iye ɔdi ɔƒɔ ni, ukyuli ɔmmɔ udu ɔlɛka bada-nwu bedie bina akɔ.

³¹Ɔsika útabu Unwoti litemi na ɔ́ta únye nwuna ɔda bubo lɛlɔ, ɔsu ɔlɛka bekulo ukyuli ɔmmɔ udu bedie nwuna bekyuli akɔ kede kede na anwu ɔlati ɔdubuti nwuna likpidi etila.’ ”

³²Uwi ɔni na Israelƒuɔ bákya ketele kalɔ kakwiidi kemmo ni, bekyuli badi bánu ka ɔnana ɔdi ɔkya ɔɔyɔ́ ekyweni na lɛnwunameyi lɛlɔ.

³³Na bekyuli bani nánu-nwu mmɔ béƒie-nwu bésienku Mose ku Aaron ku Israelƒuɔ ƒui anumi,

³⁴na béti-nwu bátákya ɔtɔ, ɔsika balati lɛla lɛni na babla-nwu.

³⁵Mmɔ na Unwoti ɔ́su Mose ɔnini, “Ukyuli ɔni nábla lɛla lɛmmɔ udu ɔ́manku kukpi. Anwuɔsu ɔdi ka kadi bekyuli bammɔ ƒui bakpanku-nwu balɛku bana kakyakɔ na bétébo-nwu atabi bádu.”

³⁶Ɔmmɔ ɔsu bákpanku-nwu bálɛku na bétebo-nwu atabi aani kalɛ na Unwoti úbo-ma ɔda.

³⁷Amu na Unwoti ɔ́su Mose ɔnini,

³⁸“Kɔ lɛsa na ásu Israelƒuɔ anini, ‘Úti ɔ́si ama ku bana kaba lɛlɔ úsela ni, biti linwo lɛni nse buluu na bibo-ni ekpo wɛlɛ wɛlɛ bɛsala bɛda bina adi atu.

³⁹Na adi linwo lɛmmɔ lɛdubɔbla enyimola ute-mii na uwi biala bɛ́nu adi ammɔ ni, bɛdubo buteenyimo mina ɔda bubo na bitaadi-nwu lɛlɔ kalɛ na bilálɛ-mi kama na bitásiaku amii alati ɔbladu kama.

⁴⁰Na adi linwo lɛmmɔ lɛdubɔya na biteenyimo kalɛ na bɛdi mina ɔda bubo lɛlɔ na bɛbla lɛlɔ sɛsɛɛ bise bite bina Katɔti.

⁴¹Ami ndi Unwoti bina Katɔti ɔni nákpanku-mii lɛ́siku Egyipte kalɛ na lɛdi bina Katɔti. Ami ndi Unwoti bina Katɔti.’ ”