Read Lelemi Bumomo Bɔka 21 Bible Online

Bumomo Bɔka 21 - Lelemi bible

Bumomo Bɔka 21

¹Uwi ɔni na Kanaanƒuɔ ɔga ɔni mɔɔdi Arad lɛlɔ na uli Negev kalɔ kemmo únu ka Israelƒuɔ bákɛ ulu ɔni na úti úsela Atarim ni, ɔga ɔmɛni úsie na útékpoku Israelƒuɔ na úƒie badi ɔ́tɔlɔku.

²Mmɔ na Israelƒuɔ bése kenye béte Unwoti básu-nwu banini, “Unwoti, si adubuti Kanaanƒuɔ bamɛni akya-bu enu kemmo ni, bɔdubɔyila bana lɛma linengudi ƒui udu kede kede.”

³Ɔmmɔ ɔsu Unwoti únu Israelƒuɔ kenye kani bése mmɔ. Na Unwoti úti Kanaanƒuɔ bamɛni ɔ́kya Israelƒuɔ enu kemmo. Na békpo bádi-ma lɛlɔ na báyila bana lɛma ƒui udu, anwuɔsu básia ntɛ mmɔ lɛnyi banii Horma, na nwuna kalɔ ndi Kebiekɔ.

⁴Uwi ɔni na Israelƒuɔ bésie bási Hor Kɔbi lɛlɔ na Ɛpugyie ulu lɛlɔ bétédu Edom na bésela ni, Israelƒuɔ bamɛni basɔ balakɛ kayi lɛnɔ.

⁵Ɔmmɔ ɔsu bétemi béwi Mose ku Unwoti na básu banini, “Bi ɔsu na bɛ́da-bu bídie Egyipte kalɔ lɛlɔ na bubekpi bɔkya ketele kalɔ kakwiidi kamɛni kemmo? Kesii kani na bodobodo ku ntu buuubo? Na adila ani bɔɔdi mɛni éedu-bu ɔkwɛ!”

⁶Na ɔmmɔ ɔsu Unwoti údie balakpi bani mbo ugyulo ukpidi ɔkya-ma na bádu Israelƒuɔ badu kaduɛ.

⁷Mmɔ na bekyuli bammɔ bákpɛ bede Mose na básu-nwu banini, “Bɔ́bla likpidi na awɔ ku Unwoti anumi, ɔsika bútemi buwi-mii. Anwuɔsu buuvele na akpali Unwoti na ɔda balakpi bamɛni udie-bu akɔ.” Ɔmmɔ ɔsu Mose ɔ́kpali Unwoti na úvele ute bekyuli bammɔ.

⁸Amu na Unwoti ɔ́su Mose ɔnini, “Vɔ kɔlakpi udu ɔdi na akɔliku-nwu aƒala ugyii ɔdi eli. Na ukyuli biala na kɔlakpi kɔ́du-nwu na unwini ɔnu kɔlakpi kɔni nƒa ugyii lɛlɔ mmɔ na nwuna ɔlɛ ɔba-nwu.”

⁹Anwuɔsu Mose úti lɛbualagyie na ɔ́vɔ kɔlakpi na úti-nwu ɔ́ƒala ugyii lɛlɔ. Mmɔ na si kɔlakpi kɔ́du ukyuli ɔdi na ɔ́talaku nwuna lili ɔ́nu kɔlakpi kɔmmɔ pɛ na nwuna ɔlɛ ɔ́ɔba-nwu.

¹⁰Amu na Israelƒuɔ bésie na betédu Obot.

¹¹Na básɔ báta na betédu Iye-Abarim ketele kalɔ kakwiidi kani nkya Moab anumi na ɔƒɛ katukɔ kakɛ lɛlɔ.

¹²Na ka básɔ báta mmɔ ni, basɔ bétédu Sared Kɔwɛ kemmo.

¹³Na ka básɔ bási mmɔ ni, bakɛ lɛgya lɛgya na betédu Aron ketele kalɔ kakwiidi kani nkɛ utédu Amoriƒuɔ ɔmii lɛlɔ. Na Arnon ndi Moabƒuɔ ɔmii ɔni nkya Moabƒuɔ ku Amoriƒuɔ ntɛ.

¹⁴Ɔmɛni ɔsu na bénweni bákya Kekpo Ɔku kemmo banini, “Waheb ɔma ɔni nkya Suƒa ku Arnon Kɔwɛ

¹⁵ku kɔwɛ kɔni náyu kútédu Ar, na ɔkɛ étédu Moab.”

¹⁶Ka bási mmɔ ni, bésie bétédu kesii kani baalɔ banini, Beer. Mmɔ na Unwoti ɔ́su Mose ɔnini, “Sala bekyuli bammɔ ƒui lisu na ndubo-ma ntu bute na bani.”

¹⁷Uwi ɔmmɔ na Israelƒuɔ bátu kɔgya kɔmɛni. “Abiɔ, bitaayu ntu pii, na bɔdubo kɔgya buti bɔkya-mii kenye.

¹⁸Libiɔ lɛni na bagadine béku, na bekyuli bammɔ batɔnkune bátu kɔgya. Béti bagadine ɔyikun ugyii lɛbuala ku batɔnkune ligyii lɛdadi béku.” Na báta bási ketele kalɔ kakwiidi kemmo bésie Matana.

¹⁹Na bási Matana bésie Nahaliel na bási Nahaliel bésie Bamot.

²⁰Na bási Bamot bésie kɔwɛ kɔni nkya Moab kesii kani Pisga uwi katɔ kakɛ na akana enye anu ketele kalɔ kakwiidi kammɔ.

²¹Amu na Israelƒuɔ bátala batu bákya Amoriƒuɔ Ɔga Sihon ka,

²²ute kuƒi na basia nwuna kalɔ lɛlɔ bavi. Na beledeyi belésie kemo iye adingyii kemo kadi. Na baláni nwuna abiɔ ntu bɔdi lɛnɔ. Na Ɔga Ulu Unengudi ɔmmɔ lɛlɔ kani badubo busie bɔvi útédu ka bɔ́via nwuna ɔmii.

²³Nsu Sihon útete kuƒi na bavi nwuna kalɔ lɛlɔ. Ɔmmɔ ɔsu ɔ́sala nwuna bekpone ƒui na bésie ketele kalɔ kakwiidi kemmo ka betékpo-ku Israelƒuɔ. Na ka bédu Yahas ni, békpoku Israelƒuɔ.

²⁴Na Israelƒuɔ bádu-ma kaduɛ. Ɔmmɔ ɔsu béti bana kalɔ ɔ́si Arnon útédu Yabok. Na ɔmmɔ ɔdi Amonƒuɔ kakɛ. Ɔsika Amonƒuɔ bágyumana bana ɔmii kaduɛ.

²⁵Na Israelƒuɔ békpo báƒɔ Amoriƒuɔ lɛma linengudi ƒui na béti-ni ku Hesbon ku lɛma lɛni nde-ni ƒui.

²⁶Na Hesbon ndi Amoriƒuɔ Ɔga Sihon ɔma unengudi. Anwu nékpo ku Moabƒuɔ ɔga ɔkukudi na úti nwuna kɔlɔ ƒui útédu Arnon.

²⁷Ɔmmɔ ɔsu na baatu asugba kɔgya banini, “Bibo na bɔsɔ bɔda Hesbon ɔma. Na bɛya bɔsɔku Ɔga Sihon ɔma unengudi use aani kalɛ use kuuku.

²⁸Dii ni, Hesbon ɔma unengudi ɔmɛni Sihon bekpone báta aani kalɛ lɛgyavonku lɛsala. Na útáyila Moabƒuɔ ɔma Ar na bése bétebile ala na abi ani nkya Arnon katɔ kakɛ.

²⁹Amii Moabƒuɔ bɔbuɛ ɔdi bina ɔdi. Amii kadi bekyuli bani mɔɔkpá Kemos baƒiɔ bɛyii ku udu. Bɛya na bina bananabi bekeli betenwini kadi bamba bekyuli. Na bina belekubi ni, Amoriƒuɔ Ɔga Sihon ɔdubo-ma buƒie bɔtɔlɔku.

³⁰Nsu búgyingya-ma ƒui na Hesbon ɔ́yii udu útédu Dibon. Na bɔ́yila-ma butédu Noƒa laa útédu Medeba.”

³¹Ɔmmɔ ɔsu Israelƒuɔ báda keliekɔ na Amoriƒuɔ kalɔ lɛlɔ.

³²Ɔmmɔ kama Mose ɔ́tala bekyuli badi ka batánu Yaser ɔma. Na Israelƒuɔ békpo na báƒɔ kɔlɔ kɔni nkya amadɔ mmɔ. Na bábɔku Amoriƒuɔ bani nlie mmɔ bene.

³³Ɔmmɔ kama bénwini na bátásia ulu ɔni úti úsela Basan. Amu na Og ɔni ndi Basanƒuɔ ɔga úti nwuna bekpone ka betékpoku Israelƒuɔ na Edrei.

³⁴Amu na Unwoti ɔ́su Mose ɔnini, “Tayia bekyuli bammɔ, ɔsika líti ɔga ɔmmɔ ku nwuna bekpone ku kalɔ kammɔ ƒui lɛ́kya-a enu kemmo na kalɛ na ábla Sihon ɔni ndi Amoriƒuɔ ɔga ɔni nádi lɛga na Hesbon lɛni kani na ɔlɛka abla Ɔga Og.”

³⁵Ɔmmɔ ɔsu bádu ɔga ɔmmɔ ku nwuna bebi bananabi ku bekpone bammɔ ƒui ɔni na ukyuli unwi muedi utebu. Na béti bana kalɔ kammɔ.