Read Lelemi Bumomo Bɔka 34 Bible Online

Bumomo Bɔka 34 - Lelemi bible

Bumomo Bɔka 34

¹Amu na Unwoti ɔ́su Mose ɔnini,

²“Kɔ lɛsa na asu Israelƒuɔ anini, ‘Si bíduo Kanaan kalɔ lɛlɔ ni, kalɔ kani na ndubo-mii buti bute na biti bɛbla bina kadikɔ ni, lɛmii lɛmɛni ndubo-ka kemmo bɔkya.

³“ ‘Bina kada kakɛ lɛmii lɛdubɔdanku Sin ketele kalɔ kakwiidi kakɛ kadi na ɔkɛ Edom ɔmii lɛlɔ. Na ɔƒɛ katukɔ kakɛ ni, ɔmii ɔni na kada kakɛ ɔdubɔsi Ɛpugyie ɔmmɔ kawɔlɔkɔ

⁴na ɔ́kɔ úsie Akrabim na úti ɔ́yu úsie kada kakɛ utédu Sin ketele kalɔ kakwiidi, na ɔsia kada kakɛ usie Kades-Barnea. Ɔmmɔ kama ɔdubɔsia Hasar-Adar na ɔvi utédu Asmon,

⁵kesii kani na ɔdubudeyi utádanku Egyipte Ɔkwalɛ kemmo na utédu Ɛpu Bonwu ɔmmɔ.

⁶“ ‘Bina ɔmii na ɔƒɛ kanukɔ ɔkɛ Ɛpu Bonwu kɔtu Na mmɔ ndubɔbla bina ɔƒɛ kanukɔ ɔmii.

⁷“ ‘Na bina ɔmii na katɔ kakɛ ɔkɛ ɔ́si Ɛpu Bonwu ɔmmɔ útédu Hor Kɔbi,

⁸na ɔ́si Hor útédu Hamat. Ɔmmɔ kama ɔmii ɔmmɔ ɔdubɔsia utédu Sedad,

⁹na usie utédu Siƒron na utáwɔ Hasar-Enan. Na ɔmɛni ndubɔbla katɔ kakɛ ɔmii.

¹⁰“ ‘Na ɔƒɛ kanukɔ ɔmii ɔdubɔsi Hasar-Enan utédu Seƒan.

¹¹Na ɔmii ɔmmɔ ɔdubɔsia ɔyu ɔsi Seƒan mmɔ utédu Ribla na Ain ɔƒɛ katukɔ kakɛ na uti ɔsia abi kɔƒɔna na Kineret Ɛpu ɔƒɛ katukɔ kakɛ.

¹²Ɔmmɔ kama ɔmii ɔmmɔ ɔdubɔyu ɔsia Yordan Ketu kɔmadɔ kɔmadɔ na útáwɔ Ɛpugyie. Na ɔmɛni ndubɔbla bina kalɔ ku lɛmii na lɛƒɛnyi lɛmmɔ ƒui.’ ”

¹³Ɔmmɔ ɔsu Mose úbo Israelƒuɔ ɔda ɔnini, “Bɛtu egulabi bɛnu kalɔ kammɔ bule na bile-ka lɛni kani bite kaba yaalenwi ku kakɛ bekyuli bammɔ,

¹⁴ɔsika Ruben ku Gad kaba bekyuli ku Manase kaba kakɛ bekyuli na Israelƒuɔ akɔ ama béete-ma bana kadikɔ kukuuku.

¹⁵Na Yordan Ketu ɔƒɛ katukɔ na Yeriko ɔvi úti úsie ɔƒɛ katukɔ kakɛ na kaba akpa anyɔ ku kakɛ bamɛni báƒɔ bana kadikɔ.”

¹⁶Amu na Unwoti ɔ́su Mose ɔnini,

¹⁷“Bekyuli bani anyi ndubo bɔlɔ mɛni ndubo kalɔ kammɔ bule bute-mii aani bina kadikɔ. Na ama ndi ɔkpane Eleasar ku Nun ubidi Yosua.

¹⁸Na alɛ ɔtɔnkune unwi lɛnimi asiku kaba biala kemmo na ubunku kalɔ kammɔ bule kabla kammɔ.

¹⁹Na kaba batɔnkune bammɔ anyi ndi amɛni. Yuda kaba ɔdi ndi Yeƒune ubidi Kaleb.

²⁰Na Simeon kaba ɔdi ndi Amihud ubidi Semuel.

²¹Na Benyamin kaba ɔdi ndi Kislon ubidi Elidad.

²²Na Dan kaba ɔdi ndi Yogli ubidi Buki.

²³Na Yoseƒ bebi bani ndi Manase ku Eƒraim kaba bebi ndi Eƒod ubidi Haniel.

²⁴Na Eƒraim kaba ɔdi ndi Siƒtan ubidi Kemuel.

²⁵Na Sebulon kaba ɔdi ndi Parnak ubidi Elisaƒan.

²⁶Na Isakar kaba ɔdi ndi Asan ubidi Paltiel.

²⁷Na Aser kaba ɔdi ndi Selomi ubidi Ahihud.

²⁸Na Naƒtali kaba ɔdi ndi Amihud ubidi Pedahel.”

²⁹Na bekyuli bamɛni na Unwoti úbo ɔda ka bele Kanaan kalɔ kammɔ bete Israelƒuɔ.