Read Lelemi Bumomo Bɔka 35 Bible Online

Bumomo Bɔka 35 - Lelemi bible

Bumomo Bɔka 35

¹Amu na Unwoti útemi úte Mose na Moab kalɔ kani nwi ƒiaa na Yordan Ketu kakɛ kani nde Yeriko ɔnini,

²“Kɔ lɛsa na asu Israelƒuɔ ka kadikɔ kani badubo-ma bute mmɔ ni, bedie lɛma lɛmmɔ lɛdi bete Lewiƒuɔ na ama lɛnɔ basɔ belie-ni kemmo. Na basɔ bete-ma kalɔ kani livo lɛkya-ka kemmo na lɛma lɛni nkya amadɔ mmɔ na beti babla bana bebuo kadikɔ.

³Na mmɔ na badubo bulie na beti kalɔ kammɔ babla bana bebuo kadikɔ.

⁴“Na bebuo kadikɔ kalɔ kani ndubo buwi bɔmana lɛma lɛni na bɛdubute Lewiƒuɔ bammɔ ɔ́si lɛma lɛmmɔ awodu kudɔ úsie kama ɔbla lɛgba bɔkɔku eti avlaatɛ.

⁵Na akɔku lɛgba mpim ɛtɛ asi ɔma ɔmmɔ keyi kakɛ na ɔƒɛ katukɔ mpim ɛtɛ na ɔƒɛ kanukɔ mpim ɛtɛ na katɔ kakɛ mpim ɛtɛ na kada kakɛ lɛnɔ na ɔma ɔmmɔ ɔkya ntɛ. Na ɔmmɔ ndubɔbla lɛma lɛmmɔ bebuo kadikɔ.

⁶“Lɛma ɛku na lɛma lɛni na adubute Lewiƒuɔ kemmo lɛdubɔbla katamikukɔ lɛma lite-ma kalɛ na ukyuli ɔni na ɔ́du ukyuli ɔdi na tati tati kemmo ukeli utábɛ nina ɔdi kemmo. Na asɔ ete-ma lɛma aavlene-inyɔ bamba ebunku.

⁷Na Lewiƒuɔ bammɔ lɛma lɛdubɔbla aavlene-maane ku bana bebuo kadikɔ kɔlɔ.

⁸Na lɛma lɛni bɛdubo Lewiƒuɔ bammɔ bute bɛsiku kalɔ kani na Israelƒuɔ badubo bule kemmo ni, bile-ka bite Lewiƒuɔ bammɔ kalɛ kaba biala bumomo buse. Na bidie lɛma pii bɛlɛku kaba kani bekyuli na bana lɛma limomo kemmo. Na bidie lɛma blii bɛlɛku kaba kani na lɛma blii suɛ na bebo kemmo.”

⁹Amu na Unwoti ɔ́sɔ ɔ́su Mose ɔnini,

¹⁰“Kɔ lɛsa na asu Israelƒuɔ anini, ‘Si bɛ́via Yordan Ketu na bítéduo Kanaan kalɔ lɛlɔ ni,

¹¹na bidie lɛma lɛdi bise kalɛ na si ukyuli ɔdi ɔ́du ɔkpanadi nsu útati útese asa na úbo lɛni ni, ɔkana ukeli usie nina ɔdi kemmo.

¹²Lɛma lɛmmɔ lɛdubɔbla katamikukɔ ute ukyuli ɔni mɔɔwia ukeli bani mɔɔwia ka bedie kasi kudɔ, kalɛ na ukyuli ɔni nádu ɔkpanadi ɔmmɔ ulekpi asa na batɛku-nwu litemi.

¹³Na lɛma ɛku lɛni bídie bísie mɛni ndubɔbla bina katamikukɔ lɛma.

¹⁴Bidie lɛma ɛtɛ na Yordan ɔvi kakɛ na bidie lɛma ɛtɛ lɛnɔ na Kanaan na biti-ni bɛbla katamikukɔ lɛma.

¹⁵Na lɛma ɛku lɛmɛni ndubɔbla katamikukɔ ute Israelƒuɔ ku baƒɔ ku ukyuli biala na ɔkya-mii akɔ kalɛ na si ukyuli ɔdi ɔ́du ɔkpanadi ɔni na útati útese na ɔkana na ukeli usie mmɔ utátamiku.

¹⁶“ ‘Na si ukyuli ɔdi úti lɛbuala na ɔ́ƒiɛmi ɔkpanadi na úkpi ni, ukyuli ɔmmɔ ɔdi ukyuli ɔdune na ɔlɛka anwu lɛnɔ badu-nwu.

¹⁷Na si ukyuli ɔdi ɔ́gyu lɛtabi lɛni na lɛkana lɛdu ukyuli na úƒwimi-ni na ɔ́du ukyuli ɔdi ni, ɔdi ukyuli ɔdune na ɔlɛka anwu lɛnɔ badu-nwu.

¹⁸Iye si ukyuli ɔdi úti kegyiikɛ kani na kakana kadu ukyuli na úti-ka ɔ́ƒiɛmi ukyuli ɔdi na ukpi ni, ɔdi ukyuli ɔdune na ɔlɛka badu anwu lɛnɔ.

¹⁹Ukyuli ɔni bádu mmɔ lɛlɔ ukyuli ubo kuƒi ka ɔdu ukyuli ɔni nádu ɔkpanadi mmɔ udie-nwu kasi. Anwuɔsu si ɔ́nu-nwu ɔlɛka ɔdu-nwu.

²⁰Na si ukyuli ɔdi uukisi ɔkpanadi na ɔmmɔ ɔsu údi-nwu úbo iye úƒwimi lɛla lɛdi ɔ́lɛ-nwu na úkpi,

²¹iye ɔ́ƒiɛmi-nwu kɔnu ku uukisi-nwu ɔsu na úkpi ni, ɔlɛka badu ukyuli ɔmmɔ. Na ukyuli ɔni bádu mmɔ lɛlɔ ukyuli ɔni nde-nwu ubo kuƒi ka udie ukyuli ɔdune ɔmmɔ kasi ɔnu-nwu.

²²“ ‘Nsu si ukyuli ɔdi údi nwuna ɔkpanadi ɔ́ƒiɛmi kalɔ iye úƒwimi lɛla lɛdi ɔ́lɛ-nwu ɔni na útati útese na ɔɔɔdi nwuna ukisine lɛnɔ

²³iye útanu ɔnii ukyuli ɔdi unye na úƒwimi lɛtabi na lítálɛ-nwu na úkpi ɔni a bɔgyi na ɔɔɔgyi uuuse na ɔɔɔdi nwuna ukisine lɛnɔ ni,

²⁴ɔlɛka kadi batɛ ukyuli ɔni nádu ɔkpanadi ku ɔni nékpi mmɔ lɛlɔ bekyuli ntɛ litemi na ɔda bubo ulu ɔni ntɛ nse lɛlɔ.

²⁵Na ɔlɛka kadi bagyumana ukyuli ɔni nátati na ɔ́du ukyuli mmɔ na ukyuli ɔni bádu mmɔ lɛlɔ bekyuli kudɔ, na basɔku-nwu batákya katamikukɔ ɔma ɔmmɔ kemmo. Na ɔdubɔkya mmɔ utédu ka ɔkpane unengudi ɔni na béwi-nwu lili nnɔmii bése-nwu likpo úkpi.

²⁶“ ‘Na si ukyuli ɔdune ɔni náta asa na ɔ́du ukyuli mmɔ ɔ́vi ɔ́lɛ katamikukɔ ɔma ɔni kemmo na úkeli útábɛ mmɔ kemmo

²⁷na ukyuli ɔni na ɔ́du mmɔ lɛlɔ ukyuli ɔ́nu-nwu na ɔ́du-nwu ni, kasi kadi na údie-nwu na útalɛ ka babu-nwu ka ɔdi ukyuli ɔdune.

²⁸Ukyuli ɔdune ɔni nékeli útábɛ katamikukɔ ɔlɛka ɔsɔ ɔkya mmɔ utédu ka ɔkpane unengudi úkpi na ɔmmɔ kama ubo kuƒi na unwini usie nwuna ɔma ku nwuna kaduli.

²⁹“ ‘Na ɔda bubo bɔmɛni buse bute amii ku bina kaba ƒui na kesi kesii bɛdubo bulie.

³⁰“ ‘Si nkyuli inyɔ ku kama bédie kenye ka ukyuli ɔdi ɔ́du ɔkpanadi ni, ɔlɛka badu anwu lɛnɔ Nsu utalɛka badu ukyuli ɔdune ɔdi na ukyuli unwi kenye budie lɛlɔ.

³¹“ ‘Ukyuli ɔdune ɔlɛka anwu lɛnɔ ukpi na kuƒi kɔdi kuuubo ka bete egulabi adi beti baƒɔ kukpi kɔmmɔ kayu.

³²“ ‘Na si ukyuli ɔdi úkeli úsie katamikukɔ ɔma ɔdi kemmo utalɛka bete kuƒi kɔdi na ɔƒɔ egulabi adi uti uye ulu na ɔsɔ unwini uteesie nwuna ɔma uwi ɔni na ɔkpane unengudi ɔni nkya mmɔ útekpi tɔ.

³³“ ‘Bitaya na kalɔ kani lɛlɔ bilie keteese lɛlɔ. Ubugya kalɔ buwi muubile kalɔ na keesé lɛlɔ na lɛla lɛɛdi bɔbla buuubo na bedie kɔtu bɔni bɔmmɔ na kalɔ kammɔ bubile ɔsu. Mmomu ɔlɛka badu ukyuli ɔdune ɔmmɔ lɛnɔ.

³⁴Anwuɔsu bitebile kalɔ kani lɛlɔ na bilie na ami lɛnɔ nkya-mii akɔ, ɔsika ami Unwoti nli Israelƒuɔ akɔ.’ ”