Read Lelemi Bumomo Bɔka 4 Bible Online

Bumomo Bɔka 4 - Lelemi bible

Bumomo Bɔka 4

¹Amu na Unwoti ɔ́su Mose ku Aaron ɔnini,

²“Bɛka Lewiƒuɔ bani ndi Kehatƒuɔ na bana adua ku atɔƒi kenye.

³Na bɛka banana bani ƒui náaƒɔ akwa avlaatɛ útédu akwa liti bani muubo taababla kabla na Adi Kevo kammɔ kemmo.

⁴“Kehatƒuɔ bammɔ kabla na Adi Kevo kammɔ kemmo ndi ka bataanu ala kedee ani nse mmɔ ƒui lɛlɔ.

⁵Na si úbo úte ka bɛta mmɔ bisie kesii bamba ni, ɔlɛka Aaron ku nwuna bebi bananabi besie na batáƒami kakpakɔ bule kɔdi kɔni mɔɔbala Bunyimi Adaka ɔmmɔ na beti benyimi adaka ɔmmɔ lɛlɔ bamana ƒui.

⁶Na beti ketu kemmo bebuo benengudi lɛku buni bebi-nwu eli, na beti kɔdi buluu bebi-nwu lɛlɔ, na beti ligyii lɛni beeti teeti kevo kammɔ bakya-nwu lɛƒɛnyi.

⁷“Na ala kasiakɔ kani nlɛ-mi anumi ni, beti kɔdi buluu bewi-nwu lɛlɔ. Na beti akyami eblidi ku enengudi lidu basia. Na beti lɛsii lɛni kemmo na beewi akpala ntɛ ku bodobodo ɔni ndubɔsia mmɔ uwi ndi uwi basia-nwu lɛlɔ.

⁸Na beti kɔdi kugyiedi bewi ala ammɔ lɛlɔ na beti ketu kemmo bebuo benengudi lɛku buni bebi-nwu lɛlɔ. Na beti ligyii gyɔlɔɔ lɛni na beeti taagyu-nwu bakya-nwu lɛƒɛnyi.

⁹“Ɔmmɔ kama na beti kɔdi buluu benyimi asogya kasiakɔ ugyii ɔmmɔ ku lɛla lɛni na beeti teenyene lɛsogya kɔbuli kɔmmɔ ku ntɔ kuwikɔ ku lɛsogya nnɔmii kuwikɔ lɛsii lɛmmɔ ƒui.

¹⁰Na benyimi-nya ku ana lɛlɔ kabla ala ƒui bakya ketu kemmo bebuo benengudi lɛku kemmo na beti basia ligyii lɛni lɛlɔ na beeti teeti ala ammɔ lɛlɔ.

¹¹“Na sika ugyiedi lɛkpabi lɛmmɔ ni, beti kɔdi buluu bebi-nwu lɛlɔ na beti bebuo ɔku bebi kɔdi kɔmmɔ lɛlɔ na bakya-nwu ligyii lɛni na baagyú-nwu lɛƒɛnyi.

¹²“Na kakpakɔ kabla lɛlɔ ala ƒui na katɔma kedee kammɔ kemmo ni, benyimi ala ammɔ ƒui bakya kɔdi buluu kemmo, na beti bebuo ɔku bebi-nya lɛlɔ ƒui, na bagyu basia ligyii lɛni lɛlɔ na beeti teeti-nya lɛlɔ.

¹³“Bedie ntɔ na lɛbualagyie lɛkpabi lɛmmɔ kemmo na beti kɔdi kɔni náƒɔ kuye geen bebi-nwu lɛlɔ.

¹⁴Na beti anwabui ku akyami ani lɛlɔ kabla na baabla na lɛkpabi lɛmmɔ lɛlɔ basia-nwu lɛlɔ. Ala ammɔ adanku ogya kuwikɔ ku kɔvili kɔni na baatu lɛna ku alakpi kɔlɛkɛ ku akyami bonwu ani kemmo na baakya ntu teewi bekyuli. Beti bebuo lɛku bebi ala amɛni lɛlɔ benyimi na beti ligyii lɛni na beeti taagyu-nwu bakya-nwu lɛƒɛnyi.

¹⁵“Ɔƒɛni si uwi ɔni na Aaron ku nwuna bebi bananabi báwɔlɔ ala buti teebi Kevo kammɔ, na báwɔlɔ ala kedee ammɔ ku kana kemmo ala ani nse kedee mmɔ ƒui ala bubi, na báwɔlɔ lɛlɔ bɔklibi ƒui ka bata ni, na Kehat bebi bananabi bani na ɔ́lɛka beti ala ammɔ bebo na bebeti-nya. Nsu bana ɔdi kɔnu kutetuku ala ani nse kedee mmɔ amu badubo bukpi. Kehatƒuɔ bammɔ beti ala ani nse Kevo Kasakɔ kemmo mmɔ.

¹⁶“Aaron ubidi Eleasar ɔni ndi ɔkpane ni, nnɔmii bɔni na beewi asogya ku oloƒui ƒɛƒɛɛ ku limeyi ndi limeyi edula ebi akpala ku likpose nnɔmii ni, nwuna lɛkɔkɔ na ɔ́lɛka akya. Na anwu na ɔlɛka utaanu katɔma kammɔ ku kana lɛlɔ ku kakpakɔ lɛlɔ ala kedee ammɔ ƒui lɛlɔ.”

¹⁷Amu na Unwoti ɔ́su Mose ku Aaron ɔnini,

¹⁸“Bɛnu ka bétekulo Kehat adua ku bana kaba bekyuli bítedie Lewiƒuɔ lɛlɔ.

¹⁹Kalɛ na belekpi si báni beedé ala ani na ese kedee ƒui mmɔ. Anwuɔsu ɔlɛka Aaron ku nwuna bebi beduo katɔma kammɔ kemmo na bele kabla kammɔ bete ɔdi biala ku ala ani na ɔlɛka beti. Ɔmmɔ na ɔlɛka bɛbla bite-ma.

²⁰Nsu Kehat bebi bammɔ beeebo kuƒi ka beduo mmɔ na benye banu ala ani nse kedee mmɔ ina uwi klukwii ɔdi, si ɔɔɔdi lɛni badubukpi.”

²¹Amu na Unwoti ɔ́su Mose ɔnini,

²²“Ka Gersonƒuɔ bammɔ na bana adua ku atɔƒi kenye.

²³Ka banana bani náaƒɔ akwa avlaatɛ útédu akwa liti na beebo taababla kabla na Unwoti Kevo Kasakɔ mmɔ.

²⁴“Na kabla kani na Gersonƒuɔ badubo bɔbla bubunku ala buti kabla kammɔ ndi amɛni,

²⁵Ama ndubo buteeti Adi Kevo kani ndi Kevo Kasakɔ kammɔ ala ani béti bákya ɔtɔ ɔmmɔ kemmo ku ala ani béti bébi ɔtɔ ɔmmɔ kama ku ebuo ɔku buni ɔni béti bébi ɔtɔ ɔmmɔ eli ku lɛdiku lɛni nƒa Unwoti Adi Kevo kammɔ kayakun,

²⁶ku aduni ani nƒa kaduli kammɔ ámana Adi Kevo kammɔ ku lɛkpabi lɛmmɔ ku kayakun kɔdi kɔmmɔ ku kɔbuli kɔmmɔ ku kabla kammɔ lɛlɔ kɔlɛmii ƒui. Na Gersonƒuɔ bammɔ na ɔlɛka babla kabla biala na kadanku ɔtɔ ɔmmɔ lɛlɔ ala amɛni ƒui.

²⁷Na Aaron ku nwuna bebi bananabi na ɔlɛka banu Gersonƒuɔ bamɛni lɛlɔ na babla ala ammɔ ƒui si ala buti na bɔdi iye kabla bamba na kadi. Na ɔlɛka ete-ma ala ani na badubo buti aani bana kabla.

²⁸Gersonƒuɔ bammɔ bana kabla kadi mmɔ na Unwoti Adi Kevo kammɔ kemmo. Na ɔkpane Aaron ubidi Itamar ndubo bana kabla lɛlɔ bɔnu.

²⁹“Ka Merariƒuɔ bammɔ na bana adua ku atɔƒi kenye.

³⁰Na edie banana bani nákɛ ɔ́si akwa avlaatɛ útédu akwa liti na bámanku ka babla kabla na Unwoti Adi Kevo mmɔ.

³¹Na bana kabla ndi ka ama ndubo ɔtɔ ɔmmɔ ligyii ku lɛtalagyii ku akpa ammɔ ku ligyii lɛni nda kakpakɔ bule kɔdi ana lɛka ƒui buteeti.

³²Na ama kani ndubɔlɛ kaduli kammɔ ƒui ligyii ku akpa ku ana lɛka ku Kevo kammɔ ewele ku kɔbuli ku kevo kammɔ lɛlɔ ala ani ndanku-ka ƒui. Na ete ɔdi biala ku lɛla lɛni na ɔdi ka uti.

³³Kabla kammɔ na Merari adua ammɔ badubo butaabla na Unwoti Adi Kevo mmɔ. Na ɔkpane Aaron ubidi Itamar ndubo kabla kammɔ lɛlɔ bɔnu.”

³⁴Amu na Mose ku Aaron ku Israelƒuɔ baduɔti bammɔ báka Kehatƒuɔ bammɔ na bana adua ku atɔƒi kenye.

³⁵Na banana bani ƒui nákɛ akwa avlaatɛ útédu akwa liti na beebo taababla kabla na Unwoti Adi Kevo mmɔ

³⁶bebo nkyuli mpim inyɔ ku eti leevu-alɔ (2,750) ka báka-ma na bana adua kenye.

³⁷Na bani ƒui nási Kehat ɔtɔ kemmo na baabla kabla na Unwoti Adi Kevo kemmo bumomo na bɔdi mmɔ. Mose ku Aaron báka bekyuli bammɔ kalɛ kani na Unwoti úbo-ma ɔda.

³⁸Báka Gersonƒuɔ na bana adua ku atɔƒi kenye.

³⁹Na banana bani ƒui nákɛ akwa avlaatɛ útédu akwa liti na baabla kabla na Unwoti Adi Kevo kemmo mmɔ

⁴⁰na bana adua ku atɔƒi ammɔ kenye bebo mpim inyɔ ku eti leevu-anyɔ ku avlaatɛ (2,630).

⁴¹Gersonƒuɔ bani mɔɔbla kabla na Unwoti Adi Kevo kemmo bumomo na bɔdi mmɔ na Aaron ɔ́ka-ma kalɛ kani na Unwoti úbo-nwu ɔda.

⁴²Báka Merariƒuɔ na bana adua ku atɔƒi kenye.

⁴³Na banana bani ƒui nákɛ akwa avlaatɛ útédu akwa liti na beebo taababla kabla na Unwoti Adi Kevo kemmo mmɔ

⁴⁴bebo nkyuli mpim ɛtɛ ku eti ene (3,200).

⁴⁵Merariƒuɔ bammɔ bumomo na bɔdi mmɔ na bana adua ammɔ kenye. Na Mose ku Aaron báka-ma aani kalɛ na Unwoti úbo Mose ɔda.

⁴⁶Anwuɔsu Mose ku Aaron ku Israelƒuɔ baduɔti bammɔ báka Lewiƒuɔ ƒui na bana adua ku atɔƒi kenye.

⁴⁷Na banana bani ƒui nákɛ akwa avlaatɛ útédu akwa liti na beesié taatábla kabla na Unwoti Adi Kevo kemmo

⁴⁸bumomo bɔdi mpim maane eti leevu-unwi ku avlaatɛ (8,580).

⁴⁹Na béte ɔdi biala nwuna lɛla lɛni na ɔdi ka ɔbla iye uti. Lɛni na báka bekyuli bammɔ aani kalɛ na Unwoti úbo Mose ɔda.