Read Lelemi Bumomo Bɔka 5 Bible Online

Bumomo Bɔka 5 - Lelemi bible

Bumomo Bɔka 5

¹Unwoti ɔ́su Mose ɔnini,

²“Kɔ lɛsa na asu Israelƒuɔ anii ukyuli biala na ɔlɛgyie ɔni mɔɔví uwi-nwu lɛlɔ iye ntu bukpidi bɔdi buuwi-nwu iye úti kɔnu útuku ukpine ɔdi ni, ɔlɛka bada-nwu bedie bana kakyakɔ kɔnakunwi.

³Bɛda bekyuli bani muusé lɛlɔ uleku iye ɔnana na ɔdi bidie bina keliekɔ kesii kani na nliku-mii na belebile-ka na keteese lɛlɔ.”

⁴Ɔmmɔ ɔsu Israelƒuɔ bése atu na báda balɛne bammɔ ƒui bédie bana kakyakɔ aani kalɛ na Unwoti úbo Mose ɔda.

⁵Amu na Unwoti ɔ́su Mose ɔnini,

⁶“Sɔ kɔ lɛsa na asu Israelƒuɔ anini, ‘Si ukyuli ɔ́lɛ Unwoti kama na útábla ɔkpanadi likpidi lɛdi ni,

⁷Ɔlɛka ukyuli ɔmmɔ ɔsu likpidi lɛni na ɔ́bla na ɔƒɔ likpidi lɛni na ɔ́bla mmɔ kayu ƒui ute ukyuli ɔni na ɔ́ƒiɔ mmɔ. Na ɔsɔ ɔƒɔ kayu kammɔ lɛkpa lɛlɔndi ɔsia kayu kammɔ lɛlɔ ute-nwu.

⁸Nsu si ukyuli ɔni na badubɔƒɔ kayu kammɔ bete úkpi na uuubo lɛlɔ ukyuli ɔdi na baƒɔ kayu kammɔ bete-nwu ni, na lɛla lɛni na nka ɔlɛka baƒɔ mmɔ línwini Unwoti ɔdi na ɔlɛka beti bete ɔkpane ku ɔmantɛ akɔ ɔni na béti baabla likpidi lili kayu bɔƒɔ bɔmmɔ na ukyuli ɔni náƒiɔ mmɔ lili.

⁹Na Israelƒuɔ etela ani na bédie-nya sɛsɛɛ béboku ɔkpane adi ɔkpane ɔmmɔ adi.

¹⁰Na ukyuli biala etela sɛsɛɛ ammɔ adi ukyuli ɔmmɔ ɔlati adi, nsu ani na úti úte ɔkpane adi ɔkpane ɔmmɔ adi.’ ”

¹¹Amu na Unwoti úbo Mose ɔda ɔnini,

¹²“Kɔ lɛsa na asu Israelƒuɔ anini, ‘Ɔƒɛni kalɛ uleku ɔdi ɔ́lɛ ɔgyani kama na ɔ́bɛ

¹³útátɛ ɔnana bamba kudɔ, nsu ɔgyani útati. Na ɔdi lɛnɔ útanu ka uusé lɛlɔ na ɔmmɔ ɔsu, ɔsika ukyuli biala uuubo na údie kenye iye ukyuli ɔdi úteƒie-nwu kɔnu kɔnu.

¹⁴Si lɛla lɛdi lɛ́vi uleku ɔmmɔ ɔgyani lɛlɔ na úse kalɔ uukpó kɔgyulo ka ulekudi ɔ́lɛ-nwu kama na uusé lɛlɔ iye ɔƒɛni kalɛ útalɛ-nwu kama na ulese lɛlɔ mmomu bɔkali kani na ɔɔkali lɛni ni,

¹⁵ɔlɛka ɔkpanku ulekudi usienku ɔkpane kudɔ. Na si úsela ni, ɔlɛka uti bodobodo ɔlaaƒɔ lɛɛƒɛɛ inyɔ ɔda. Na utalɛka uti nnɔ uwi-nwu lɛlɔ iye uti oloƒui ɔsia-nwu lɛlɔ, ɔsika akpala ammɔ adi kɔgyulo edula ebi akpala na adi enyimo kati bute na bɔƒiɔ bɔdi lɛlɔ.

¹⁶“ ‘Mmɔ ni, ɔkpane ɔmmɔ ɔdubɔya na uleku ɔmmɔ ubenye Unwoti anumi.

¹⁷Na udu ntu kedee bɔni buwi libui kemmo mmɔ na ɔma na ɔtumu na Adi Kevo kammɔ kɔmadɔ uwi ntu bɔmmɔ kemmo.

¹⁸Uwi ɔni na ɔkpane ɔmmɔ ɔ́ya na uleku ɔmmɔ úbenye Unwoti anumi mmɔ ni, ɔkpane ɔmmɔ ɔdubɔƒɛnimi uleku ɔmmɔ lili linwini, na uti bunyimo akpala ani ndi edula ebi akpala ani nnye nte kɔgyulo mmɔ ute uleku ɔmmɔ na ɔda. Na ɔkpane ɔmmɔ uti ntu bɔni mbo ɔdu na ɔdanku ewida mmɔ ɔda.

¹⁹Mmɔ ni, ɔkpane ɔmmɔ ɔdubɔya na uleku ɔmmɔ ɔkpali ala na ɔkpane ɔmmɔ ɔkanti ɔkya ɔnini, “Si ɔnana bamba ɔdi ku awɔ bítatɛ kudii iye átalɛ ƒula ɔgya kama kudii ɔmmɔ ɔsu ƒula lɛlɔ lilese lɛlɔ ɔ́si uwi ɔni na élieku ƒ'ɔgyani ni, ntu ku ɔdu bɔni ndanku ewida mɛni butabla-a lɛla lɛdi.

²⁰Nsu si álɛ-nwu kama na ébile lɛlɔ ka awɔ ku ukyuli bamba bɛ́tɛ ɔsu ni,”

²¹mɛni ɔkpane ɔmmɔ ɔdubo uleku ɔmmɔ buti bɔkya Unwoti ewida kalɔ na ɔsu ɔnii, “Unwoti ɔ́ya na enwini ewida ukyuli ete bina bekyuli na ɔya na ƒula kaƒɔna kaƒɔ ɔlɛ na kaƒɔ kasia-a na asɔ alakana bɔwɔ.

²²Ɔ́ya na ntu bɔmɛni buduo-ɔ kaƒɔ kemmo na ƒula kaƒɔna kaƒɔ ɔlɛ na liƒi lɛsia-a na ukulo-ɔ kɔwɔ.” “ ‘Mmɔ na uleku ɔmmɔ ɔdubɔsu ɔnii, “Ɔsia lɛni.”

²³“ ‘Mmɔ na ɔkpane ɔmmɔ ɔdubo ewida etemila ammɔ bunweni bɔsia kakunkɛ kadi lɛlɔ na ɔƒɔ-nya uwi ewida ntu ku ɔdu ɔmmɔ kemmo.

²⁴Na ɔya na uleku ɔmmɔ ɔni ntu ɔdu ɔdu bɔni nnye nte ewida mmɔ. Na si ɔ́ni ntu bɔmmɔ ni, ɔdubɔya na uleku ɔmmɔ uteebo abi geen.

²⁵Na ɔkpane ɔmmɔ ɔdubɔƒɔ kɔgyulo edula ebi akpala ammɔ ɔsiku uleku ɔmmɔ enu kemmo na ɔkɔliku-nya katɔ ɔtina Unwoti asa na uti-nya usienku lɛkpabi lɛlɔ.

²⁶Ɔmmɔ kama ɔkpane ɔmmɔ ɔdubɔma edula ebi akpala ani béti bababla akpala mmɔ lɛkɔkɔ linwi na uti ɔbla enyimo adila bɔsia akpala na ɔkyula-nya na lɛkpabi lɛlɔ. Na ɔmmɔ kama na ɔkpane ɔmmɔ ɔya na uleku ɔmmɔ ɔni ntu bɔmmɔ.

²⁷Na si uleku ɔmmɔ úbile lɛlɔ na ɔ́lɛ ɔgyani kama ni, si báya na ɔ́ni ntu bɔni ndanku ewida mmɔ ni, ɔdubɔya na uteebo abi. Na ɔya na nwuna kaƒɔna keƒu na ɔsɔ ulakana kaƒɔ bɔda na ɔwɔ. Na ɔdubunwini ukyuli ɔni na ewida asiaku-nwu na nwuna badi akɔ.

²⁸Nsu si uleku ɔmmɔ útebile lɛlɔ na lɛla lɛdi lɛɛɛda-nwu ka use sɛɛn ɔsu ni, ɔdubɔkana na ɔwɔ bebi.

²⁹“ ‘Na ɔmɛni ndi kɔgyulo bukpo ɔda bubo bute uleku si ɔ́lɛ ɔgyani kama na útátɛ ɔnana bamba kudɔ uwi ɔni na uli kɔgya

³⁰iye si lɛla lɛdi liikpóku ɔnana ɔdi na ɔɔbla-nwu aani ulekudi ɔ́di kɔsɔnɔ. Ɔkpane ɔmmɔ ɔdubɔya na uleku ɔmmɔ ubenye Unwoti anumi na ɔbla-nwu ɔdi ɔni na ɔda bubo bɔmmɔ bɔɔtina mɛni.

³¹Ɔnana ɔmmɔ útaƒiɔ si ɔ́bla ɔmɛni mmomu uleku ɔmmɔ ɔdubɔkɛ nwuna likpidi kɔtu bɔni biala.’ ”