Read Lelemi Bumomo Bɔka 6 Bible Online

Bumomo Bɔka 6 - Lelemi bible

Bumomo Bɔka 6

¹Amu na Unwoti ɔ́su Mose ɔnini,

²“Kɔ lɛsa na asu Israelƒuɔ anini, ‘Si ɔnana ɔdi iye uleku ɔdi ɔɔyɔ́ ka use kenye kadi na kenye kammɔ kaatina ka ɔɔyɔ́ ka udie lɛlɔ lɛti sɛsɛɛ use ute Unwoti na bataalɔ-nwu banii, Nasareni ni,

³ɔlɛka ɔda lɛlɔ udie ntɛ bɔni mbo ɔkplu bɔni kemmo. Na utalɛka ɔni egyiibi ntɛ bɔni na bébulo, na utalɛka ɔni lɛla lɛni mɔɔda kenye, iye egyiibi lidu biala ntu bɔni na bámana ebi ammɔ bédie iye ɔdi-nya muedi.

⁴Uwi ɔni na ɔmu ɔdi Nasareni mɛni ni, utalɛka uti lɛla lɛni nási egyiibi kemmo aani ntɛ utuku kenye, ina nwuna ebi iye egyiibi lɛna lɛmmɔ muedi.

⁵“ ‘Na uwi ɔni na údie lɛlɔ lɛti sɛsɛɛ úse úte Unwoti mɛni ni, utalɛka ukpeyi lili. Ɔlɛka ɔbla kedee ute Unwoti úti útédu ka uwi ɔni na ɔ́su ka wedie lɛlɔ lɛti sɛsɛɛ wetédu mmɔ údu. Na ɔlɛka ɔnyonu nwuna kuli linwini na line gyɔlɔɔ.

⁶Na ɔ́si uwi ɔni na údie lɛlɔ sɛsɛɛ úse úte Unwoti mɛni ni, utalɛka ɔni ude ukpine ɔdi.

⁷Ina nwuna ɔti iye uni iye ɔnwani ɔnana iye uleku úkpi ni, útalɛka ubile lɛlɔ ɔ́si ama ɔsu. Ɔsika nwuna lɛlɔ budie buse bute Katɔti likposela lɛsia-nwu lili.

⁸Nwuna lɛlɔ budie buse lɛti bɔmɛni bɔɔtina ka ɔ́bla lɛlɔ sɛsɛɛ kedee úte Unwoti.

⁹“ ‘Na si úbo úte ka ukyuli ɔdi úkpi kɔnakunwi na nwuna anumi na ɔkɛnku ɔmmɔ ɔsu na úbile linwini lɛni na ɔ́bla sɛsɛɛ kedee úte Unwoti mmɔ ni, ɔlɛka ukpeyi kuli kɔmmɔ ƒui na lɛlɔ bɔbla sɛɛn ɔdi limeyi lɛni ndi limeyi maatɛdi lɛlɔ.

¹⁰Na limeyi maanedi lɛlɔ ni, ɔlɛka ɔwia babloduma inyɔ iye bamangbɛ inyɔ na uti-ma usienku ɔkpane na Unwoti Adi Kevo kayakun.

¹¹Na ɔkpane ɔmmɔ ɔdubuti aasɛ unwi ɔbla likpidi lili buvele akpala na uti unyɔdi ɔbla bɔkyula akpala ute Unwoti na nwuna likpidi lili kayu bɔƒɔ. Ɔsika úlie bekyuli bani muuwulo ukpine akɔ ɔsu ɔ́bla likpidi. Na limeyi lɛmmɔ kani lɛlɔ ni, ɔlɛka ɔsɔ ɔbla nwuna lili linwini kedee sɛsɛɛ use ute Unwoti.

¹²Na ɔlɛka ɔsɔku lɛlɔ ɔbla sɛsɛɛ kedee ute Unwoti na uwi ɔni ɔ́ƒuna ka udie lɛlɔ lɛti use ute Unwoti mmɔ utédu kenye. Na ɔlɛka ɔwia koƒonu ubi kɔni nákɛ lɛkwa linwi uboku na beti-ku babla kɔtɔ bukpi akpala. Na uwi ɔni návi na nka údie lɛlɔ lɛti mmɔ uuubunku, ɔsika uwi ɔmmɔ kemmo na úbile lɛlɔ na uusé lɛlɔ mmɔ.

¹³“ ‘Ɔƒɛni Nasareni ɔni nédie lɛlɔ lɛti úse úte Unwoti úte uwi ɔdi na uwi ɔmmɔ údu ni, ɔda bubo bɔmmɔ ndi ka bakpanku-nwu bebenyene Unwoti Adi Kevo kammɔ kayakun.

¹⁴Mmɔ ni, ɔlɛka uti koƒonu kɔkɔdi kɔni nákɛ lɛkwa na kútasɔ kesii kadi uboku na babla bɔkyula akpala, ku koƒonu kuledi kɔni nátasɔ kesii kadi na beti babla likpidi lili buvele akpala ku koƒonu kɔgyani kɔni na kútasɔ kesii kadi na beti babla unwi bɔbla akpala.

¹⁵Na si ɔdubo ubabla akpala ammɔ ni, ɔlɛka uboku edula ebi ku nwuna lɛlɔ ntɛ akpala ku bodobodo kagyigyɛ ɔni kemmo na bɔnyii buuubo na bábla-nwu ku ɔlaaƒɔ ɔni nse sɛɛn na básala-nwu ku nnɔ ku bodobodo bɛbɛ ɔni na bésusu nnɔ nwuna lɛlɔ.

¹⁶Na ɔkpane ɔmmɔ ɔdubuti ala ammɔ uboku Unwoti anumi mmɔ na uti ɔbla likpidi lili buvele akpala ku bɔkyula akpala ammɔ.

¹⁷Na uti bodobodo kagyigyɛ ɔni na bɔnyii buuubo-nwu kemmo mmɔ lɛnɔ uboku na beti koƒonu kɔgyani kɔmmɔ babla unwi bɔbla akpala bete Unwoti, ubunku edula ebi ku ntɛ akpala ammɔ.

¹⁸“ ‘Na Unwoti Adi Kevo kayakun mmɔ ni, Nasareni ɔmmɔ ɔdubo nwuna lili linwini lɛni na ɔ́bla sɛsɛɛ kedee úte Unwoti mmɔ bukpeyi na uti linwini lɛmmɔ ɔkya unwi bɔbla akpala ogya ɔni mɔɔda mmɔ kemmo.

¹⁹“ ‘Na si Nasareni ɔmmɔ úkpeyi nwuna linwini lɛni na ɔ́bla sɛsɛɛ kedee úte Unwoti mmɔ ɔ́wɔlɔ ni, ɔkpane ɔmmɔ ɔdubuti koƒonu kɔmmɔ lɛmangba lɛni béƒulo ɔkya-nwu kɔnu na udie bodobodo geen ku bodobodo bɛbɛɛbɛ na kagyigyɛ kemmo ubunku ute-nwu

²⁰na ɔkpane ɔmmɔ ɔdubɔkɔliku ala ammɔ katɔ ɔtina Unwoti ubo-nya kudu na adi ala ani nse kedee na adi ɔkpane adi ku ebuo ɔmmɔ kayi ɔvu kani na ɔ́kɔliku katɔ ɔ́tina Unwoti mmɔ ku nwuna libuli lɛni béti béboku mmɔ. Na ɔmmɔ kama ni, Nasareni ɔmmɔ ɔkana na ɔni ntɛ ƒaa.

²¹“ ‘Ɔmmɔ ndi ɔda bubo ute Nasareni ɔni nédie lɛlɔ lɛti na ɔ́bla lɛlɔ sɛsɛɛ kede úte Unwoti na úbo uudie lɛlɔ, nsu ɔkana na ute ala bamba utulo amɛni ƒaa na nwuna ɔyikun kenye.’ ”

²²Amu na Unwoti úbo Mose ɔda ɔnini,

²³“Su Aaron ku bebi anini, ‘Bitaasia ulu ɔmɛni lɛlɔ teete Israelƒuɔ kusɛ kusɛ bɛnini,

²⁴“ ‘Unwoti ute-mii kusɛ kusɛ na ɔda-mii,

²⁵Unwoti ɔya na nwuna anumi eteekeye teewi-mii na ɔnu-mii ku lɛƒɔndia,

²⁶Unwoti unwini nwuna anumi ɔtina-mii na ute-mii keyi buɛɛ.’ ”

²⁷“Anwuɔsu badubɔkpali-mi lɛnyi bete Israelƒuɔ kusɛ kusɛ na ɔdububo-nwu kemmo lɛni.”