Read Lelemi Bumomo Bɔka 8 Bible Online

Bumomo Bɔka 8 - Lelemi bible

Bumomo Bɔka 8

¹Amu na Unwoti ɔ́su Mose ɔnini,

²“Su Aaron anini, ‘Si éti lɛsogya maatɛ lɛmmɔ aalɛ ni, na anu ka lɛsogya lɛmmɔ bukeye bɔɔtina anumi kakɛ.’ ”

³Aaron ɔ́bla lɛni na ɔ́lɛ lɛsogya lɛmmɔ na ɔya na nwuna bukeye bɔɔtina anumi kakɛ aani kalɛ kani na Unwoti úbo Mose ɔda.

⁴Ulu ɔni lɛlɔ na básia bábla lɛsogya lɛmmɔ ugyii ɔmmɔ ndi ka bétu sika ugyiedi bávɔ-nwu ɔ́si nwuna ɔka útédu kesii kani na bákya-nwu bɔdia ku egyii anwula. Na bávɔ asogya ugyii ɔmmɔ na ulu ɔni kani lɛlɔ na Unwoti ɔ́tina Mose.

⁵Amu na Unwoti ɔ́su Mose ɔnini,

⁶“Die Lewiƒuɔ lɛku Israelƒuɔ bammɔ akɔ na abla-ma lɛlɔ bɔbla sɛɛn ɔdi.

⁷Na ulu ɔmɛni lɛlɔ na adubɔsia na abla-ma sɛɛn ɔdi ɔmmɔ. Kuna sɛɛn bɔbla ntu bɔmmɔ wi-ma lɛlɔ, na aya na bana ɔdi biala ukpeyi nwuna ɔlɔna linwini ƒui udie lɛlɔ na baƒɔ bana adala ƒui, na bana lɛlɔ lɛdubɔbla sɛɛn.

⁸Ɔmmɔ kama na beti akɔ ɔkɔdi ku edula ebi ɔlaaƒɔ buni sɛɛn ɔni na básala ku nnɔ, na asɔ aƒɔ akɔ ɔkɔdi bamba ute likpidi lili buvele akpala.

⁹Na aya na Lewiƒuɔ bammɔ bebenye Unwoti Adi Kevo kammɔ anumi, na asala Israel kadi bekyuli bammɔ ƒui.

¹⁰Na aya na Lewiƒuɔ bammɔ ƒui bebenye Unwoti anumi. Na Israelƒuɔ bammɔ beti bana enu basia-ma lɛlɔ.

¹¹Na Aaron ɔdubuti Lewiƒuɔ bammɔ ɔkya Unwoti enu aani kadi bammɔ akpala ani na bákɔliku katɔ bátina-mi bébo-nya kudu.

¹²“Ɔmmɔ kama na Lewiƒuɔ bammɔ béti bana enu basia bakɔ bammɔ eli lɛlɔ. Na edie unwi abla likpidi lili buvele akpala ete Unwoti na eti unyɔdi lɛnɔ abla bɔkyula akpala ute Lewiƒuɔ likpidi kɔtu bɔni budie bana lɛlɔ.

¹³Na aya na Lewiƒuɔ bammɔ benye Aaron ku nwuna bebi anumi na eti-ma akya Unwoti lɛkɔkɔ aani kudu bubo akpala.

¹⁴Ulu ɔmɛni lɛlɔ na adubudie Lewiƒuɔ sɛsɛɛ asiku Israelƒuɔ akɔ ete-mi na benwini mina badi.

¹⁵“Uwi ɔni na ábla-ma sɛɛn ɔdi ɔmmɔ áwɔlɔ na éti-ma ákya-mi kɔnu aani kudu bubo akpala kama ni, na aya bebo mina Adi Kevo kemmo babataabla bana kabla.

¹⁶Na ama ndi Israelƒuɔ bani na ndubunwini mina badi na ulu biala lɛlɔ. Na líti-ma línwini aani ami ɔlati badi na Israelni uleku ubi ɔnanabi udeedi biala na ɔdubɔwɔ kenye.

¹⁷Israelni ubi ɔnanabi udeedi iye ebuo ubi ɔgyani udeedi ɔni na báwɔ ɔdi mina ɔdi. Ɔsika uwi ɔni na lɛ́du Egyipteni ubi udeedi biala ni, uwi ɔmmɔ na lídie-ma líse líte lɛlɔ.

¹⁸Na lɛ́ƒɔ Lewiƒuɔ bammɔ muunyene Israelƒuɔ bebi bedeedi bammɔ kenye.

¹⁹Na Israelƒuɔ bammɔ ƒui akɔ na líti Lewiƒuɔ bammɔ muute Aaron ku nwuna bebi aani bana litela ka bataabla kabla na Adi Kevo kammɔ kemmo na Israelƒuɔ bammɔ ƒui kenye na bataabla akpala ute bana likpidi kɔtu bɔni budie kalɛ na ɔlɛ ukpidi ɔdi ulebo-ma lɛlɔ si uwi ɔni na báni béde Unwoti kakpakɔ kammɔ.”

²⁰Mose ku Aaron ku Israelƒuɔ ƒui ku Lewiƒuɔ bammɔ bábla básiaku kalɛ na Unwoti úbo Mose ɔda mmɔ pɛpɛɛpɛ.

²¹Lewiƒuɔ bábla lɛlɔ sɛɛn bɔbla ɔdi ɔmmɔ na báƒɔ bana adala. Ɔmmɔ kama Aaron ɔ́kpanku-ma na útéti-ma ɔ́kya Unwoti lɛkɔkɔ aani kudu bubo akpala bana lili úte bana likpidi kɔtu bɔni budie kalɛ na ɔbla-ma sɛɛn.

²²Ɔmmɔ kama Lewiƒuɔ bammɔ bésie na bétése bana kabla kalɔ na Unwoti Adi Kevo kammɔ kemmo na Aaron ku nwuna bebi lɛlɔ bɔnu kalɔ. Na béti Lewiƒuɔ bammɔ bábla kalɛ na Unwoti úbo Mose ɔda.

²³Amu na Unwoti ɔ́su Mose ɔnini,

²⁴“Lɛla lɛni ndubo mɛni lɛdanku Lewiƒuɔ kani. Banana bani nákɛ akwa aavlanyɔ-ɛlɔ ku kama ni, ama námanku ka bebo Unwoti Adi Kevo kemmo na bababla kabla.

²⁵Nsu si bédu akwa liti ni, ɔlɛka bakɛ bɔnwuna na bada kabla bɔbla baya.

²⁶Bebo kuƒi ka bete bana banwani kebunku na Unwoti Adi Kevo mmɔ, nsu utalɛka ama basɔ benye kabla kadi kenye ama alati. Anwuɔsu ulu ɔmmɔ lɛlɔ na adubɔsia na ele kabla ete Lewiƒuɔ bammɔ.”