Read Lelemi Bumomo Bɔka 9 Bible Online

Bumomo Bɔka 9 - Lelemi bible

Bumomo Bɔka 9

¹Unwoti ɔ́tɛmiku Mose na Sinai ketele kalɔ kakwiidi kemmo na lɛkwa linyɔdi kɔbuli kudeedi kemmo ka bálɛ Egyipte kalɔ lɛlɔ. Mmɔ na ɔ́su-nwu ɔnini,

²“Kɔ lɛsa na asu Israelƒuɔ ƒui anii badi Kukpi Lili Bɔvia Limeyi na uwi ɔni na líbo-ma ɔda lɛlɔ.

³Na badi limeyi lɛmmɔ useyi uwi. Na kɔbuli kudeedi limeyi leevu-linedi lɛlɔ. Na badi limeyi lɛmmɔ basiaku kalɛ na líbo-ma ɔda pɛpɛɛpɛ.”

⁴Ɔmɛni ɔsu Mose ɔ́kɔ lɛsa na ɔ́su Israelƒuɔ ƒui ka badi Kukpi Lili Bɔvia Limeyi.

⁵Na sɔsɔ ama lɛnɔ bádi limeyi lɛmmɔ na Sinai ketele kalɔ kakwiidi kemmo na kɔbuli kudeedi limeyi leevu-linedi lɛlɔ useyi uwi. Na Israelƒuɔ bábla básiaku kalɛ kani na Unwoti úbo-ma ɔda.

⁶Nsu bana badi bátakana na badi limeyi lɛmmɔ na bana lɛlɔ ukyuli ɔdi kukpi ɔsu. Ɔmmɔ ɔ́ya na básɔ na basɔ beeese sɛɛn na ukpine ɔmmɔ ɔsu. Anwuɔsu báni béde Mose ku Aaron limeyi lɛmmɔ lɛlɔ kani

⁷na básu Mose banini, “Ka bula ukyuli ɔdi úkpi ɔsu ni, bɔ́nu ka buuuse sɛɛn, nsu bi ɔsu na abu bulakana bula akpala buti busienku Unwoti ku bula bakpana na limeyi lɛni na básu bése mmɔ lɛlɔ?”

⁸Amu na Mose údie kenye na ɔ́su-ma ɔnini, “Bɛkɛ kayi utédu ka lɛ́tɛmiku Unwoti na bina litemi lɛmɛni lɛlɔ.”

⁹Mmɔ na Unwoti ɔ́su Mose ɔnini,

¹⁰“Kɔ lɛsa na asu Israelƒuɔ anini, ‘Si úbo úte ka bina akɔ ɔdi ɔ́sɔ na uuuse sɛɛn ka nwuna lɛlɔ ukyuli ɔdi kukpi ɔsu iye nwuna ulu busie bɔdi ɔsu ni, bamu bebo kuƒi ka badi Kukpi Lili Bɔvia Limeyi.

¹¹Na ɔlɛka badi limeyi lɛmmɔ na kɔbuli kunyɔdi limeyi leevu-linedi lɛlɔ useyi uwi. Na ɔlɛka bakun koƒonu ubi kɔmmɔ ku bodobodo ɔni na bɔnyii buuubo-nwu kemmo ku evete ani mbo ɔdu.

¹²Na betebu ala ammɔ lɛdi betese na kadi kegye-ni lɛlɔ iye babwɛ likubi lɛdi lɛnɔ si baadi. Ɔƒɛni si baadi limeyi lɛmɛni ni, badi bunyimi bɔmmɔ ƒui lɛlɔ kaduɛ.

¹³Nsu ukyuli ɔni na use sɛɛn na útesie ulu ɔdi lɛnɔ na úni limeyi lɛmmɔ bɔdi ni, ɔdi ka bedie-nwu nwuna badi akɔ, ɔsika úni nwuna akpala buti busienku Unwoti na uwi ɔni na bése bése lɛlɔ. Na ukyuli ɔmmɔ ɔlati ɔdubuti anwu ɔlati nwuna ekpidi etila.

¹⁴“ ‘Ɔƒɛni si ɔƒɔ ɔdi ɔkya-mii akɔ na ɔɔyɔ́ ka ɔdi Kukpi Lili Bɔvia Limeyi lɛmmɔ ni, ɔkana na ɔdi-ni ƒaa, nsu ɔlɛka ɔdi bunyimi bɔmmɔ ƒui lɛlɔ kalɛ kani na básu. Na bunyimi bɔmmɔ ɔlɛka bɔdi bunwi pɛ bute ɔmantɛ ubi ku baƒɔ ƒui.’ ”

¹⁵Na limeyi lɛni na bálɛ Unwoti Adi Kevo kammɔ ni, liƒlukutu líbebi ɔtɔ ɔmmɔ ƒui lɛlɔ. Na liƒlukutu lɛmmɔ lɛ́ƒɔ ɔtɔ ɔmmɔ ɔ́si useyi uwi útédu kadi bugye ɔtanta na use aani si ogya mɔɔda.

¹⁶Na lɛni kani úse uwi ƒui. Na liƒlukutu lɛmmɔ lɛ́ƒɔ ɔtɔ ɔmmɔ ƒui. Na si useyi údu ni, ɔɔda aani ogya kalɛ.

¹⁷Na uwi biala na liƒlukutu lɛmmɔ lɛ́ta ɔtɔ ɔmmɔ katɔ ni, na Israelƒuɔ lɛnɔ bata bayu ulu. Na kesi kesii na liƒlukutu lɛmmɔ lídi línye ni, na Israelƒuɔ lɛnɔ bada keliekɔ na mmɔ.

¹⁸Unwoti ɔda bubo kenye na baata bana keliekɔ na nwuna ɔda bubo kenye na baasɔ taada keliekɔ. Na uwi ɔni ƒui na liƒlukutu lɛmmɔ lilie ɔtɔ ɔmmɔ katɔ ni, na Israelƒuɔ lɛnɔ baasɔ taakya bana keliekɔ mmɔ.

¹⁹Si uwi ɔni na liƒlukutu lɛmmɔ lɛ́ƒɔ ɔtɔ ɔmmɔ katɔ útu uwi ni, Israelƒuɔ beenú Unwoti lɛdi na ɔdi ulayu ulu.

²⁰Uwi ɔdi liƒlukutu lɛmmɔ lɛdubunye ɔtɔ ɔmmɔ katɔ emeyi alɛɛ adi na Unwoti ubo-ma ɔda na bada keliekɔ na anwu kani ɔsɔ ubo-ma ɔda asa na basɔ bata.

²¹Uwi ɔdi liƒlukutu lɛmmɔ lɛdubudi bunye ɔ́si ɔtanta útédu useyi uwi kani, na si liƒlukutu lɛmmɔ lɛ́ta ɔtanta na ama lɛnɔ bata. Ina liƒlukutu lɛmmɔ lɛta useyi iye ɔƒiiwi iye ɔlɛka ama lɛnɔ bata.

²²Na si liƒlukutu lɛmmɔ lɛ́ƒɔ lɛlɔ linye ɔtɔ ɔmmɔ eli emeyi anyɔ iye kɔbuli iye lɛkwa ni, Israelƒuɔ bammɔ lɛnɔ badubɔsɔ bɔkya bana keliekɔ mmɔ lɛni kani na balata. Nsu si liƒlukutu lɛmmɔ lɛ́nya lɛ́ta na ama lɛnɔ bata.

²³Unwoti muubó-ma ɔda na baadá keliekɔ na anwu kani muubó-ma ɔda basɔ bata bayu ulu. Na bádi ɔda bubo bɔmmɔ lɛlɔ aani kalɛ na Unwoti ɔkɛnku Mose lɛlɔ ɔ́su-ma kalɛ.