Read Lelemi Mika 1 Bible Online

Mika 1 - Lelemi bible

Mika 1

¹Unwoti ɔ́su Mika Moresetni kenye kadi, na ala amɛni adanku Samaria ku Yerusalem lɛma linengudi lɛmmɔ na uwi ɔni na Yuda baga Yotam ku Ahas ku Hesekia bélie bádi lɛga ɔdi biala ku nwuna uwi kemmo.

²Amii kalɔ lɛlɔ bekyuli ƒui binu! Bise atu kaduɛ na binu, ɔsika Unwoti Katɔti uudie-mii bɔƒiɔ taasiku nwuna keliekɔ kedee na nwuna kakpakɔ mmɔ.

³Na ɔdubo bɔsi bubo bubanya bɔvi abi ku abinkpo ammɔ ƒui eli.

⁴Abi ƒui adubo bɔyɛɛlɛ aani kalɛ na kɔma kɔɔyɛɛlɛ na ogya kudɔ. Na lɛbonka libendi lɛyii lɛkya aani kalɛ na ntu bɔɔgbá taayu ɔkwalɛ ɔdi taatɔlɔ.

⁵Yakob kaba kemmo bebi bábla ekpidi pii ɔ́si kalɛ na Samariaƒuɔ bátɔnku-ma ɔsu. Lɛni kani na Yerusalemƒuɔ aƒiodu akpabi ani na bátu áya na Yuda ɔ́bla likpidi.

⁶Anwuɔsu na Unwoti ɔdubunye ɔnu na Samaria ɔyii udu na lɛla biala libie lɛbla aani kebu alakpi. Na ɔdubɔta ɔbla aani kesii kani na bálɛ adingyii. Na ɔdubugyingya nwuna lɛtɔ atabi ƒui na ɔgbala-nya utákya ɔkwalɛ na ugyingya awodu ammɔ ɔka ɔni nkya kalɔ kemmo ƒui.

⁷Badubo Samaria baƒiɔ ƒui bubo bɔbwɛ. Na ogya ɔkyula ala ani na bákɛ básiku bana kakpakɔ na nwuna bayalɛ kabla kammɔ kudɔ. Na baƒɔ bani nse aani bana kalɛ kani bebeti bana akɛla ammɔ ƒui na beti betéte bana lɛƒiɔkpa bayalɛ, ɔsika bayalɛ kudɔ na ala ammɔ ási.

⁸Ɔgbankpi ɔmɛni ɔsu na nkɛ lɛgbakplu ku kasɔngya. Na biinú mina kɔvanu aani ebuoƒuala ɔni nkɛ mɔɔkwanyi ku keku kani muuwulo teedumo aani likuku.

⁹Ɔsika Samaria ɔ́ƒɔ ɔlɛ bonwu ɔni na balakana bɔbwi. Na ulu ɔmmɔ kani lɛlɔ na Yuda lɛnɔ ɔkɛ úsela na ɔgbankpi ɔmɛni úudu ɔban kenye na Yerusalem alati.

¹⁰Nsu bitaya na bula bekisine bani nkya Gat benu ɔmɛni iye biwulo muedi na benu-mii kɔku. Mmomu bibo lɛlɔ biminime na ɔtumu akɔ na Bet-Leaƒra na bɛtina ka lɛla lɛdi liikpóku-mii geen.

¹¹Na amii Saƒirƒuɔ, bɛvi bɛtɔlɔ ku kasɔngya ku kɔƒa. Na ka bekisine báka Sanaanƒuɔ bákya ɔsu ni, ɔdi ɔɔɔdubo bɔkana bɔlɛ. Na keku ku kɔvanu kɔni nkya Bet-Esel ɔsu ni, bɛgyi bɛnii mmɔ kaaadi kaatamikukɔ kadi.

¹²Marotƒuɔ benye bagya Unwoti anumi momoomo ka bakɛ bɔƒɔ bɔdi, ɔsika ɔgbankpi ɔmmɔ úudu Yerusalem kabanye suɛlɛ suɛlɛ.

¹³Amii Lakisƒuɔ, bɛbala bapɔnkɔ bammɔ ku kekpo kɛɛkɛ lɛmmɔ. Amii násiku kalala ala amɛni na Israel bíboku bíbatina Yerusalemƒuɔ.

¹⁴Ɔmmɔ ɔsu bɛdubute Moreset Gat bɔkada etela na begyingyaku lɛlɔ. Na Israelƒuɔ baga badubɔnu bati ka Aksib ɔɔɔdi katamikukɔ kani na basia lɛnu ka badubɔkɛ bɔƒɔ.

¹⁵Amii Maresaƒuɔ kadi bekyuli, Unwoti ɔdubo ukisine ɔdi bɔtala bɔkya-mii na ubékpo-mii na uƒie ɔma ɔmmɔ ɔƒɔ. Na Israel batɔnkune ƒui badubukeli na bátábɛ Adulam atakpɛ libu kemmo.

¹⁶Bikpeyi bina eli bitédu aani ka bɔpa na ápa aani begbini na biteewulo kɔnyana na bina bebi bani na bɛɛyɔ́ geen ɔsu. Ɔsika badubo-ma buƒie bɔtɔlɔku ƒui buteesienku kaƒɔ ɔgyu kakaaka.