Read Lelemi Mika 2 Bible Online

Mika 2 - Lelemi bible

Mika 2

¹Bɔbuɛ muute amii bani na likpidi kɔkwɛ kani na bɛɛkya na bɛɛtɛ bina atɛla lɛlɔ teeti likpidi kasusu uwi biala. Na si kadi kégye na bɛɛnu ka bɛ́bla lɛla lɛmmɔ, ɔsika bɛɛnu ka bibo ɔyikun.

²Biiƒie mmo ku lɛtɔ lɛni na bɛɛwia taaƒɔ. Bɛɛnya bekyuli taakya na bɛɛƒɔ́ bana kɔduli ku kalɔ.

³Nsu Unwoti ɔ́lɛ ugyii ka ɔbla lɛla lɛdi, na ɔ́su ɔnini, “Lɛ́klibi ɔgbankpi líse-mii. Na ɔbuli ɔdubo-mii amɔ bɔda, na bɔdi kɔƒa ɔgbankpi uwi ɔmɛni kemmo.

⁴Si uwi ɔni na ala amɛni álɛ ni, bekyuli badubo-mii kenye bunye na batu kɔnyana ɔnu ɔmɛni basiku-mii lɛlɔ banini, ‘Bɔ́yii udu! Bɔ́yii udu kede kede! Unwoti ɔ́ƒɔ-bu kalɔ úte bula bekisine.’ ”

⁵Anwuɔsu bɛsɔ bɛɛɛdubo kadikɔ kadi bɔkɛ na Unwoti bekyuli akɔ si uwi ɔni na beele kalɔ kammɔ teete-ma.

⁶Na si mɔɔsu-mii lɛla lɛdi ni, bɛsɔ bitasu bɛnii lɛsa na mɔɔkɔ́ teewi-mii ndubɔya na kɔƒa kukpo-mii. Bitasu bɛnii Katɔti uláya na kɔƒa kukpo-mii.

⁷Bɛɛbu bɛnii ɔmɛni ɔɔdia bunu si beeye banini, “Unwoti uuti kɔnyi na ɔbla ala amɛni udu, na uléwi lɛlɔ na ɔkɛ kayi?” Iye Unwoti uléte bekyuli bani mɔɔbla ala ulu lɛlɔ kusɛ kusɛ uwi ndi uwi?

⁸Unwoti ɔnini, “Bɛ́da mina bekyuli aani bekisine kalɛ. Na bɛɛbla ala aani si bibo ɔyikun ka bɛbla lɛla biala. Na use aani ama bani nási kekpokɔ na bédie-ma adala ani na bakya ɔni na baaagyi beeese.

⁹Bíƒie kɔduli kɔbuni kɔni na kɔdi mina kalɔ lɛlɔ beleku bɛ́ƒɔ. Na bɛ́bɔku bana bebi bɛ́lɛku bana kɔlɔ kemmo na bíti-ma kɔdikɔ kɔni na Unwoti úte-ma bínwini bina kɔdi.

¹⁰“Bɛvi bɛlɛ mɛni, amii bekyuli bekpidi, ɔsika bɛɛɛdubo bɔnwuna bɔdi bɔkɛ na mɛni, na bítamanku lɛnɔ ka bɛbla Unwoti bekyuli. Na bɛdubo udu bɔyii lɛnɔ.

¹¹Kenye Udiene ɔni kani na bɛɛwia ndi ɔkɔ ɔnyine ɔni masu-mii ɔnii bɛdi na bɛni ntɛ bikpi!

¹²“Ami Unwoti lise kenye ka ndubɔkpanku Israelƒuɔ bani nébu liboku mbasala aani kalɛ na baƒonu ɔdane ɔɔsála nwuna baƒonu na beemomo.

¹³Ndubo kayakun kammɔ bubo bɔbwɛ na lɛkpanku-ma lɛlɛku na linwini-ma ɔga.”