Read Lelemi Mika 4 Bible Online

Mika 4 - Lelemi bible

Mika 4

¹Na uwi ukplodi kemmo ni, kɔbi kɔni lɛlɔ na Katɔti kakpakɔ kenye ndubɔbla kɔbi kɔni náƒɔ kuye kutulo abi ƒui akɔ. Kɔdubɔkuku kɔvia abi ƒui eli na kadi bekyuli ƒui badubukeli besie mmɔ.

²Kadi bekyuli badubɔsi kɔlɔ pii lɛlɔ bebo na babasu banini, “Bɛya na bɔkɔ busie Unwoti, Yakob Katɔti, kɔbi lili na nwuna kakpakɔ na ɔtina-bu nwuna lilu na bɔsia-ni lɛlɔ.” Ɔsika Sion mmɔ na badubɔtina-bu ala na bunu Unwoti litemi bɔsiku Yerusalem.

³Na Unwoti ɔdubɔtɛ litemi na ɔklibi kadi ku kadi bayikune bani nkya ƒui unyeƒi ɔni nkya-ma ntɛ. Na bana kuwii ƒui ni, ama alati badubuti-ku bakywɛ anwami bonwu ani muunwíni kalɔ. Na beti bana atula bakywɛ asaaka. Na kadi ku kadi basɔ balata kekpo, na basɔ balatumini bekyuli belete kekpo lɛnɔ.

⁴Na ukyuli biala ɔdubulie nwuna adingyii kalɔ ɔkɛ bɔnwuna ƒaa na bakɛ keyi buɛɛ. Kenye kpakplaa kamɛni na Unwoti Katɔti Ɔyikune Ƒui úse nwuna bekyuli.

⁵Kadi bamba bekyuli badubɔsiaku bana baƒiɔ, nsu abu amu bɔdubɔsiaku bula Unwoti Katɔti uwi ndi uwi.

⁶Unwoti ɔnini, “Na uwi ɔmmɔ kemmo ni, ndubo mina bekyuli bani na kekpo kéƒie na béti-ma bátɔlɔku ku bani na lɛbibo líduo-ma keliela kemmo ƒui bɔsala.

⁷Na bekyuli bani nébu mɛni na badi balɛne na bani na béƒie bátɔlɔku mɛni kemmo ni, badubunwini mina bekyuli na lɛya na benwini kadi bani na bebo ɔkplu. Na ami Unwoti ndubo Sion Kɔbi lɛlɔ mmɔ bulie na Yerusalem, na ntaadi-ma lɛlɔ úsela uwi ƒui.

⁸Sion Kɔbi na Yerusalem, awɔ ndi mina bekyuli lɛlɔ ɔnune na adubɔsɔ adi lɛga na mina bekyuli lɛlɔ.

⁹“Yerusalem, bi lɛsɛ na bɛɛní? Eeebo ɔga! Na ƒula kasusu bakyane nɔɔ? Bana ƒui bása bukpi? Bi muubo-ɔ lɛlɔ lɛni aani kalɛ na kawɔƒɔ keeƒie ukyuli?

¹⁰“Amii Yerusalemƒuɔ, biteedumo ku ɔlɛ bunu! Si bíkeli bina ɔma unengudi kemmo bísie alakpi akɔ muedi ni, badububo-mii bɔnu buƒie bɔsiku mmɔ busienku Babilon. Nsu kama kama ƒui ni, ndubo mbaƒɔ-mii lɛsiku bina bekisine kudɔ.

¹¹“Sion, ƒula ekpidi ɔsu na kadi bekyuli pii báka bámana-a na banini, ‘Ɔmɛni anwu buletu uwi bɛya na bɔnu ka bana anumi éwi kalɔ.’

¹²“Nsu bekyuli bamɛni baaagyi lɛla lɛni na ami Unwoti mɔɔkali. Ndubo-ma bɔkɔ kpɛtɛ kpɛtɛ aani kalɛ na baakɔ́ antabi.

¹³“Sion, bibo-ma bɛbwɛ biwi kalɔ kɔkɛ kɔkɛ. Ndubo-mii bɔbla aani akɔ ɔgyani ɔni mbo abuala ese na ɔkya abuala egyiedi lɛgbanvuo. Bikpo kadi bammɔ ƒui na biƒie-ma akɛla ƒui bɛƒɔ biboku ami kalɔ ƒui lɛlɔ Unwoti.”