Read Lelemi Mika 7 Bible Online

Mika 7 - Lelemi bible

Mika 7

¹Litemi lɛmɛni bunu ɔ́ya na lɛ́bla ƒaaƒaa aani ukyuli ɔni na kɔka kútulo-nwu na ɔɔwia egyiibi ani na ɔdi, nsu béde-nya bédie egyii ammɔ ƒui lɛlɔ kede kede, na ina unwi ɔsɔ ɔɔɔsia, na egyii ammɔ ese ukpludi ku ani na muuyile bɔnwu mmɔ muedi.

²Naaanu ukyuli ɔdi na ɔsiaku Katɔti kama siin. Na ɔdi lɛnɔ ulábla lɛla lɛbuni lɛdi. Ulikplu ku kalala kani nkya ukyuli biala na kalɛ na bebile bana bakpana ngba lɛlɔ kagyumana kani na ɔdi biala unye.

³Bekyuli baasála lɛlɔ taabla unwi ka babla alaekpidi na bana ablala ɔsu. Litemi batɛne ku bana benengu baawia ka baƒɔ ala basiku bekyuli kudɔ na bɔbɛ kemmo. Na lɛlɔ badine baanya bekyuli taakya na litemi katɛkɔ.

⁴Bekyuli babuni ƒui bani na bakya-ma akɔ muedi betulo liyu alakpi ani náka ámana lɛla lɛdi. Kenye bediene ku bani mɔɔnu bana ablala taasu béte bɔti ka bana bɔkyula uwi údu na bábla gyuma gyuma na béƒu ku bɔyia.

⁵Uuubo ɔni na ɔdi ɔsɔ ɔƒɔ ɔkpanadi ɔdi ina dɛ na biidúku. Anwuɔsu si ɔdi aatɛmiku ƒula ɔyɔne muedi ntu ánu kaduɛ.

⁶Bebi bananabi béni na basɔ balábu bana bati, na belekubi lɛnɔ báta bénye bana beni lɛlɔ. Na bebi bele béni bana begyieni. Na ukyuli ukisine geen ni, ɔdubɔsi anwu ɔlati nwuna kaduli kemmo.

⁷Nsu mina anu ƒui asia Unwoti Katɔti lɛlɔ ka ɔƒɔ-mi ngba, na anwu kani na ndubunye ntaanu ulu teete ka unu-mi bɔkpali na ubunku-mi.

⁸Mina bekisine, bitakun tɔ lɛmɛnɛ na mina lɛlɔ. Use ka líbuli bɔdi, nsu nsɔ ndubo bɔta. Ina ka ɔƒɛ ɔ́sa ɔ́kya-mi ni, Unwoti ndi mina bukeye.

⁹Lɛ́bla likpidi lɛ́ƒiɔ Unwoti, anwuɔsu na lɛkana libo abi si nwuna kɔnyi kúbo-mi lɛlɔ wetédu uwi ɔni na ɔ́nu-mi kɔnyana na ɔ́sɔ ɔ́klibi ami ku-nwu ntɛ na ɔ́ƒɔ-mi. Na ngyi ka ɔdubɔsɔku-mi ubenyene mina kenyekɔ kabuni kammɔ lɛlɔ na lɛnu nwuna bukeye na udie-mi.

¹⁰Amii mina bekisine bani mɔɔsu bɛnii, “Unwoti ɔɔɔdubo-nwu bɔkana bubunku” ni, bɛdubɔnu ɔmɛni na kɔƒa kukpo-mii. Na ami mmomu ndubo bɔnu kalɛ na bɛdubo bubuli na banya-mii bavi aani ulu ntɛ aba.

¹¹Uwi ɔdubo ɔni na Unwoti ɔdubɔya na basɔku amii Yuda lɛma awodu ƒui batu na ɔya na bina lɛmii lɛnɔ lisie kama na bina kalɔ kabɛbɛ kebu.

¹²Bekyuli badubɔta na bana limomo kemmo basi Asiria ku Egyipte ku Babilon kɔlɔ lɛlɔ ku kesii bamba ƒui bebo-mii kudɔ.

¹³Na ɔkɛnku ala ani na bábla-mii ɔsu ni, kɔlɔ kɔmɛni bekyuli badubo abi bubo na ɔgbankpi lidu lidu kemmo.

¹⁴Unwoti, tɔnku ƒula kadi bekyuli bani nlie lɛti na lɛku kemmo, na ada ama bani na áƒuna éte lɛlɔ aani baƒonu ɔdane kalɛ asiaku kalɔ kabuni kemmo kesii kani na badubɔkɛ livo lɛbuni na Basan ku Gilead kalɔ kemmo aani kalɛ na úse kuuku.

¹⁵“Ami Unwoti ndubo akɔla budie taatina bɔbla aani kalɛ na lɛ́bla uwi ɔni na bɛ́si bɛ́lɛ Egyipte kalɔ kemmo.

¹⁶Kadi bamba bekyuli badubo ɔmɛni bɔnu na beti enu bebi kenye na betile bana atuƒi ku kɔƒa geen, ɔsika bana bekpone badi balakana lɛla lɛni udu na lise lɛni bɔbla.”

¹⁷Badubɔdi lɛti na bakɛ bataakpɛ taavi kalɔ aani balakpi ku bana udu bamba. Na badubo bukeli bɔsi bana kɔkyakɔ na balɛ basi bana kɔbɛkɔ kpakplaa ƒui bebo ku liƒu kpakpaakpa na Unwoti bula Katɔti bɔyia ɔsu.

¹⁸Unwoti Katɔti, beleti baƒiɔ badi balákɔku-ɔ, ɔsika eeti likpidi taakyiɛ abu ƒula bekyuli baƒunadi ɛlɛɛ bani nébu, na eléti kɔnyi taakya-bu uwi ƒui, mmomu aayɔ́-bu uwi ndi uwi.

¹⁹Ɔdubɔyɔ-ɔ kaƒɔ ka asɔ anu-bu kɔnyana na anya bula ekpidi esusu kalɔ na ebo-nya ƒui avaakun atákya ɛpu kemmo.

²⁰Adubo ƒula litemi kama bɔsia siin na alálɛ bula Nana Yakob ku Abraham kama kudii aani kalɛ na ése bula bati kuuku kenye ése uwi ɔni návi kukuuku kemmo.