Read Lelemi Nahum 3 Bible Online

Nahum 3 - Lelemi bible

Nahum 3

¹Unwoti ɔ́su ɔnini, “Ɔma unengudi ɔni na likyulikpi bɔbla bɔ́ƒɔ-nwu kemmo mmɔ ni, ɔdubɔyii udu. Mmɔ na baadú bekyuli na baanyi ɔkɔ na beeƒie bekyuli ala taaƒɔ.

²Se kɔtu na enu ƒula kawɔlɔkɔ. Adubunu ka bada mpile beeƒwimi, na kɛɛkɛ ebi akɛ ku usi, na eenwíni lɛlɔ adubo. Na bapɔnkɔ baaƒulu, na kɛɛkɛ lɛmmɔ lɛɛgyú taawɔ ku kɔku momoomo.

³Na bekpone bani nli bapɔnkɔ lɛlɔ beeƒwimi bana kuwii na baatu bana atula. Na bekpone bani nkɛ lɛgba baanya bekpine bani nwi esu esu taagbanta.

⁴Bítavumana ku bayalɛ bani na uwi ɔni na bɛkya biidie bekyuli anumi ku bina evo ekpidi ku mbɔ bɔni na bɛda, na bɛɛkywɛ kadi bekyuli ƒui kɔkpagyuɛ ka bɛni-ma biboku lɛlɔ kudɔ.

⁵Nsu ami, Unwoti Ɔyikune Ƒui, línwini bina ukisine ɔƒɛni amu. Ndubo bina lɛwuku bɔni budie-mii lɛlɔ, na lɛya na kadi bekyuli ƒui ku lɛga kadikɔ ƒui banu bina kasɔngya.

⁶Ndubo kebu alakpi bɔbuma buwi-mii lɛlɔ, na ntaanu amii ku ala ammɔ ƒui aani kebu alakpi, na lisusu-mii lɛkya alakpi ammɔ akɔ.

⁷Na ukyuli biala ɔni manu ɔmɛni ɔdubudie lili na ɔva ɔsu ka Niniwe ɔdi ɔ́sa! Na beye si ukyuli ɔdi ɔdubuwulo-nwu kɔnyana na ubunku-nwu iye ɔsia-nwu kɔnu?

⁸“Niniwe, aabu anii awɔ ɔdi adubuse-ɔ buɛɛ utulo Tebes ɔma unengudi ɔdi? Nil Ketu bonwu nwi ɔ́ka ɔ́mana-nwu aani kɔwodu kɔni mɔɔgyumana-nwu.

⁹Tebes úti nwuna anu ƒui ɔ́sia Kus kalɛkɛ kani nkya Egyipte kalɔ lɛlɔ bekpone ɔyikun bonwu lɛlɔ ku Put ku Libia kɔlɔ bekpone bani násala lɛlɔ lɛlɔ.

¹⁰Nsu béƒie-nwu na béti-nwu bésienku kaƒɔ kalɔ lɛlɔ. Na bádu nwuna bebi béwi lɛblɔnu lɛkɔkɔ ƒui lɛlɔ. Na bekyuli bani ndi bagadine ƒui ni, bádi-ma kuye na kadi bekyuli anumi. Na bakutine benengu ƒui bébo-ma kɔgba enu ku lɛgba.

¹¹“Niniwe, awɔ lɛnɔ ƒula uwi údu. Adubo ntɛ bukpi na awia ulu ka abɛla lɛlɔ asiku ƒula bekisine kudɔ.

¹²Bina kɔgyumanakɔ kpakplaa kɔni na bibo kuse aani anwingyie ani ebi négyie. Si bɛ́kunku-nya ni, ebi ammɔ adubɔnu eduo-mii nnye bɔni na bíbimi bíwi kemmo.

¹³Ƒula bekpone bese aani beleku, na ogya ɔ́kyula ƒula ɔban kayakun lɛbalala, na kayakun kammɔ kálɛmi kewi kéte ƒula bekisine ka beduo.

¹⁴“Báka ƒula ɔma unengudi ɔmmɔ bákya, na bekisine badubo-nwu bukpoku. Bidu ntu, na bumomo bubu na bɛsɔku bina ɔma kɔgyumanakɔ kɔmmɔ bɛtu. Na bɛnwu lɛti na bikulo atimbɔ.

¹⁵Nsu ina amu badubo-mii bɔkyula ku ogya na badu-mii ku kuwii na bayila-mii udu, na bewiile-mii bewi kalɔ aani kalɛ na bakpɔtilikpɔ beebile edula. Anwuɔsu amii bidie atu na bitaawɔ teemomo aani baalɔlɔ.

¹⁶Beyedine báƒɔ-mii ɔma unengudi ɔmmɔ kemmo betulo ayabi ani nkya kayaa. Nsu buse kani na bese aani baalɔlɔ bani mɔɔdi ala teedie na beveyi batɔlɔ.

¹⁷Bina bagyumanane ku bakutine ƒui bátavumana ku baalɔlɔ. Ɔsika si kɔyɔ kɔkya ni, baayu teelie ɔban ligyii lɛlɔ. Na si ɔƒɛ úse kalɔ ɔɔbi ni, beeveyi taatɔlɔ, na ukyuli ɔdi ulati kesii kani na bésie.

¹⁸“Asiriaƒuɔ ɔga, ƒula bakutine ku benengu ƒui bálɛɛ lɛlɛɛ linwi ɔni na basɔ baaadubo bɔta. Na ƒula kadi bekyuli bakladi ama bégyingya-ma bákya abi lɛlɔ. Na bekyuli bammɔ bese aani baƒonu bani neeebo ɔdane.

¹⁹Bɛ́ƒɔ lɛlɛ bonwu lɛni naaadia bɔnu, na bɛsɔ biiibo lɛnunsia lɛdi. Anwuɔsu bekyuli ƒui bágya enukpɛ uwi ɔni na bénu ƒula lɛlɔ litemi lɛmɛni, ɔsika bina kalala kani na bítaabla taasia kama ɔ́ya na bébo abi pii.”