Read Lelemi Habakuk 1 Bible Online

Habakuk 1 - Lelemi bible

Habakuk 1

¹Unwoti údie lɛla lɛdi ɔ́tina Kenye Udiene Habakuk.

²Unwoti, uwi ɛlɛ sɔɔn na ndubunye nteevele-ɔ nnii bunku-bu ntédu asa na enu ete-mi? Na uwi ɛlɛ kama asa na adububo ebedie-bu alɛku kalɛ na bekyuli báta benye beekpóku-bu mɛni kemmo?

³Bi ɔsu na áya na nnye mɔɔnu alaekpidi bonwu amɛni ku kalɛ na bekyuli balátɛ etemila ulu siin lɛlɔ ɔmɛni udu? Na éte kuƒi na bekyuli baata teenye-ɔ lɛlɔ na baládi ƒula ɔda bubo lɛlɔ lɛnɔ. Na ekpidi bonwu bonwu bɔbla ku kalala káƒɔ kesi kesii lɛni?

⁴Belenye bekyuli lɛlɔ na badi ƒula ɔda bubo lɛlɔ. Na litemi bɔtɛ ulu siin lɛlɔ amu bɔ́yii udu kula kula. Bakantankpine báka ƒula bekyuli babuni bákya na bátu ƒula ɔda bubo bénwini kalɛ kalɛ na ama baayɔ́.

⁵“Nwini na anu ala ani mɔɔlɛ́ na kadi bekyuli ƒui akɔ na ɔdubɔbla-a kalɛ kadi! Ɔsika ndubo lɛla lɛdi bɔbla na bina uwi lɛni na si ina bínu ka baasu-ni muedi ni, biláƒɔ biladi.

⁶Ndubo Babilonƒuɔ bɔtala na babwɛ bavi kalɔ kammɔ ƒui lɛlɔ ku kɔnyi na badi lɛma linengudi ku libliidi ƒui lɛlɔ.

⁷Bana lɛlɔ libo liƒu na bekyuli baayia-ma geen. Na ama alati bana ɔda bubo bɔni na bényimi béte lɛlɔ kani lɛlɔ na baanu bana bɔdia.

⁸Bana bekpone bani muulie bapɔnkɔ beekeli usi teetulo bebuoƒuala na baabla kɔnyi ala ku ogya teetulo beƒukutu bani mɔɔbwi bebuo bamba si ɔƒɛ ɔ́nu. Na bana usi ɔɔbabala teetulo kɔdigbo aasɛ ɔni na kɔka kɔɔda na ɔɔtu taasi kayaa ka ubeƒie lɛla lɛdi na kalɔ.

⁹Na kalɛ kani na bebile ala ɔsu na bana anumi égyie uwi ndi uwi. Na bákpanku bekyuli bani na béƒie na kekpokɔ bada aani kɔnwinimi ku lɛkɔkɔ.

¹⁰Na kɔlɔ bamba bagadine ku bana kɔgyumakɔ kpakplaa kɔni na bátu ƒui lɛmala kani na ɔdi ute-ma. Ɔsika ama baabla kunyekɔ kɔni nse aani abinkpo taamana kɔgyumanakɔ kɔmmɔ teete lɛlɔ kesii kani na benye na bekpo badi lɛma lɛmmɔ lɛlɔ na beƒie-ma lɛma baƒɔ.

¹¹Na si bekyuli bekpidi bani mɔɔkun lɛmɛne mɛni na baanu bana ɔyikun teetulo lɛla biala báwɔlɔ lɛni ni, na batɔlɔ mmɔ kɔnakunwi aani kalɛ na ɔƒɛƒɛɛ ɔdi uukpó taavi ku usi.”

¹²Unwoti Katɔti Kedee, adi mina katamikukɔ lɛtakpɛ bonwu, na eli ésela uwi ƒui na aaadubo bɔya na likpi. Áya na Babilonƒuɔ bénwini bayikune na baatɛku bekyuli bamba litemi na bani-ma kɔtu.

¹³Nsu alatunaku likpidi munu munu. Anwuɔsu tasɔ tenye tanu bekyuli bamɛni kpoo lɛni na beteebile bekyuli bamba bani na nka badia betulo-ma kukuuku ƒui ngba lɛni.

¹⁴Bekyuli bani na édie ákya kalɔ kamɛni lɛlɔ ni, bese aani ketu kemmo kɔbɛ iye bebuo bamba bani mɔɔkpɛ́ bana kaƒɔ lɛlɔ na beeebo batɔnkune.

¹⁵Anwuɔsu ukisine uuti nwuna lɛsawu ku lɛdaliwa na ubeƒie-ma ɔtɔlɔku ƒui na bekisine bammɔ bataakɛ ebiti.

¹⁶Na beesié taatákpa ala na baanwá teete bana lɛsawu ku lɛdaliwa lɛmmɔ bɔdi ka bákɛ lɛla lɛni na baawia ɔsu.

¹⁷Nsu ni, Unwoti, bunye na adubunye anu na ama beteedie lɛna teeyile bana lɛsawu taayila kadi bamba bekyuli udu lɛni, na alanu bani na beeƒie mmɔ ama kɔnyana?