Read Lelemi Habakuk 3 Bible Online

Habakuk 3 - Lelemi bible

Habakuk 3

¹Ɔmɛni ndi Habakuk katɔ bɔkpali bɔni nkɛnku agyala.

²Unwoti, ngyi kalɛ na áƒɔ lɛnyi, anwuɔsu na ɔ́bla-mi kalɛ kadi ka lɛ́nu ala ani na ábla. Buvele, ya na ƒula kɔnyi kɔyɔ-ɔ, na anu-bu kɔnyana. Na abla ete-bu kalɛ na ábla éte bula bati kuuku.

³Katɔti ɔni nse kedee, ɔ́si Teman kalɔ lɛlɔ na Paran Kɔbi lɛlɔ. Na kalɛ na nwuna bukeye bɔɔtu anumi ni, ɔ́ƒɔ kayaa ƒui. Na bekyuli beemwi-nwu na kalɔ lɛlɔ kesi kesii.

⁴Nwuna bukeye buse aani ɔƒɛ, na nwuna enu aabwɛ ogya taasi kesii kani na nwuna ɔyikun ɔkya mmɔ.

⁵Lɛlɛ buɛ lɛni mɔɔdú bekyuli ntɔ-nwu anumi ku kama ƒui.

⁶Si údi únye ni, kalɔ kammɔ ƒui kaakunku. Na si ɔ́nu ɔnusɛ ni, kadi bekyuli ƒui baatɔ́ kpakpaakpa. Na si ɔ́sia nwuna lilu kuuku lɛmmɔ lɛlɔ ɔɔví ni, abi ku abinkpo ani nnye uwi ƒui mmɔ aanyonu lɛlɔ na aabwɛ.

⁷Lɛ́nu ka Israel bekisine Kus ku Midian bani nli nvo kemmo na kalɔ kakwiidi lɛlɔ béƒu.

⁸Unwoti, ketu bebweyi bammɔ nákya-a kɔnyi ɔni na ási aaví ku ƒula bapɔnkɔ kɛɛkɛ na ɛpu ɔmmɔ lɛlɔ? Oowo, mmomu bɔvi kani na ada ku usi ka atádi lɛlɔ.

⁹Ƒula atula énye kagyumana na bábla lɛla lɛni na bénu ka édie lɛdi éte-ma. Éti ntukpa bunengudi ku bubliidi ƒui na éle kalɔ kammɔ ntɛ akpa anyɔ.

¹⁰Uwi ɔni na áda álɛ ni, abi ammɔ aatɔ́ kpakpaakpa, na ɔnantu ɔɔna taasi liƒlukutu kemmo, na ɛpu uubó avlɔvɔ taakɔ taayu na ɔɔkwanyi ku kɔku bonwu.

¹¹Ɔƒɛ ku kɔbuli ƒui bédi bénye liku linwi kpoo uwi ɔni na aatu ƒula kɔtaminta ku abuala atula taavinku aani kalɛ na kayaa kaabwɛ ogya.

¹²Na ánya kadi bekyuli ƒui ábwɛ ávi na kɔnyi kemmo

¹³kalɛ na etékpo aƒɔ ƒula ɔga ɔƒunadi ɔmmɔ. Na kalɔ kani bekyuli mbo kalala mmɔ ni, ádu bana ɔtɔnkune na égyiile-nwu lɛlɔ ala éwi ɔ́si lili úbedu lɛgba.

¹⁴Bekisine bammɔ bébo aani ɔƒɛƒɛɛ kpakplaa ku kasusu ka begyingya-bu. Na lɛlɔ lɛɛyɔ́-ma ka badubo-bu bɔyila aani kalɛ na baada lɛla lɛdi teedie na ɔsa. Buse na buse búte-ma aani banyanane bani mɔɔbɛ́. Nsu ama alati bana ekpola kani na éti ábwɛ-ma eli.

¹⁵Na ƒula kɛɛkɛ úbwiile ɛpu ntu bɔmmɔ ƒui kalɔ ɔ́vi.

¹⁶Ka lɛ́nu kɔyu kemmo ala budie taatina bɔmɛni ɔ́siku Unwoti linyesia lɛmɛni lɛlɔ ni, liƒu lɛni náda-mi ɔ́ya na lɛ́bla kpɛtɛ kpɛtɛ na mina enyekuli kani mɔɔtɔ́ kpakpaakpa. Na ɔ́bla-mi aani bɔyɛɛlɛ na mina ekubi ada na mina lɛlɔ kemmo, na ɔɔbla-mi gbanta gbanta. Nsu ndubɔkɛ kayi na linye kpoo ntaanu ulu teete limeyi lɛni na Unwoti ɔdubɔkyula bekisine bekpidi bamɛni.

¹⁷Ina adingyii lidu ƒui líbulo bɔnwu, na lɛla lɛdi liiibo na edula ɔƒɛwi na bekyuli baƒɛ bakya linwu, iye bebuo ayu ƒui ese ukpludi na baƒonu iye ɔmantɛ bɔkɔ beeebo-ni kemmo,

¹⁸iye edula ebi adi eeebo muedi ni, lɛlɔ lɛdubɔyɔ-mi na ebiti ada-mi geen na mina Unwoti ɔni ndi mina ɔƒɔne lɛlɔ.

¹⁹Unwoti Ɔyikune Ƒui mɔɔyá na mɔɔkɛ́ ɔyikun. Na mina lɛgba lɛɛyu ɔkplu, na lɛɛta aani kaƒɛ lɛdi, na mɔɔkɛ́ kenyekɔ ƒaa na abi lɛlɔ.