Read Lelemi Seƒania 1 Bible Online

Seƒania 1 - Lelemi bible

Seƒania 1

¹Unwoti ɔ́su Seƒania kenye kadi uwi ɔni na Yosia, Amon ubidi, ɔɔdi lɛga na Yuda kalɔ lɛlɔ. Na Seƒania ɔti ndi Kusi ɔni ɔti ndi Gedalia ɔni ɔti ndi Amaria ɔni ɔti ndi Hesekia.

²“Ami Unwoti líse kenye ka ɔƒɛni amu ni, ndubo lɛla biala bɔkyula na kalɔ lɛlɔ.

³Bekyuli ku bebuo ku baasɛ ku kɔbɛ bamɛni akɔ ɔni lɛlɔ na likpidi lɛkya ni, ndubo-nwu udu bɔyila na kalɔ kammɔ lɛlɔ. Na lɛkyula bekyuli bammɔ ƒui lidie kalɔ lɛlɔ.

⁴Ndubo mbani Yuda ku Yerusalem kɔtu na lɛla biala lɛsɔ lilébu na banu bati na Baal baƒiɔ lɛlɔ. Na bana bakpane ƒui ɔdi ɔsɔ ulenyimo-ma.

⁵Na bani ƒui muulie bana lɛtɔ katɔ taakpali ayabi iye baakya lili kalɔ teete Milkom baƒiɔ, nsu baanyi ɔkɔ ka basiaku-mi kama siin ni, ndubo bana ƒui udu bɔyila.

⁶Bekyuli bani ƒui nénwini kama bákya-mi na basɔ balani teede-mi ka bebenu-mi litemi ni, ndubo-ma lɛla biala bɔyila kede kede.

⁷“Ami ndi Unwoti Katɔti, anwuɔsu bibile bina inye kpoo! Ɔsika uwi ɔmmɔ úude. Na ndaku lɛlɔ bɔklibi ka liti mina bekyuli aani lɛkpa na lɛlɔ mina bekyuli ƒui bani lɛ́klibi líse.

⁸Na ndubo batɔnkune ku bagabi ƒui kɔtu bɔni na limeyi lɛmmɔ lɛlɔ ku bani ƒui nsiaku kadi bamba ɔdi bɔbla kama.

⁹Amii bani nsiaku kadi bamba baƒiɔ kama bɛɛkpá-ma, na bɛsiaku baga kesii bakutine belikplune bani néti bana kenyekɔ baabla likyulikpi ala kama ni, ndubo-mii kɔtu bɔni.

¹⁰“Ami Unwoti líse kenye ka limeyi lɛmmɔ lɛlɔ ni, bekyuli badubo keku buteewulo momoomo geen bɔsi ɔma ɔmmɔ kesii kani baalɔ banii Kɔbɛ Ɔban Kayakun ku Ɔma Ɔwɔdi na beteebuli taaƒɛ lɛlɔ ɔ́si abi atɔdi ammɔ lɛlɔ.

¹¹Na ukyuli biala ɔni nli kuye kemmo badubo kanyana buteewulo momoomo, ɔsika Unwoti ɔdubo beyedine ku egulabi bavumanane ƒui udu bɔyila.

¹²Ndubo asogya buti na lɛwia Yerusalem ƒui lɛvi na lɛni bekyuli kɔtu, bani nli ƒaa na balábla kasusu kadi taasiku ɔmɛni lɛlɔ na baakali mmomu banini, ‘Unwoti ɔɔɔdubo lɛla lɛdi bɔbla na lɛdi likpidi iye lɛbuni.’

¹³Badubo-ma ala buƒie bɔƒɔ na bana kɔduli kɔbwɛ kɔbla aani kebu alakpi. Na baaadubo lɛtɔ lɛni na bátu kemmo bɔkɛ bulie. Na adingyii ani mmo bése lɛnɔ ni, baaadubo ebi bude babla ntɛ bani.”

¹⁴Unwoti limeyi linengudi lɛmmɔ lɛdubo na uwi ɔsɔ uletu. Na ɔgbankpi limeyi lɛmmɔ lɛlɔ ni, bekyuli badubunu bekpone bani lɛlɔ mbo liƒu kɔku ku lɛsɛ yoo na kesi kesii.

¹⁵Limeyi lɛmmɔ lɛdubɔbla kɔnyi ku lɛbibo ku ɔlɛ bunu pii, ɔsika limeyi lɛmmɔ lɛdanku ɔgbankpi ɔni ndubo bekyuli bɔyila. Na lɛdisa lɛdubɔƒɔ lɛla biala na bekyuli bayila lɛnunsia biala. Na liƒlukutu lɛdubɔya na ɔyuli ubi lɛla biala na ɔƒɛƒɛɛ kpakplaa uteekpo.

¹⁶Na badubo kekpo kɔkpɛɛ butaavwi na beteedie kekpo lɛnu taaka taamana lɛma lɛni na bátu awodu bámana ku kɔgyumanakɔ kpakplaa bényene.

¹⁷Bekyuli bani ƒui nábla likpidi báƒiɔ Unwoti ni, uubó-ma ɔda teese ɔnini, “Ndubo-mii bubo bɔbwɛ na bɛkɛ biteebo enu aani banumbwɛne na ubugya ɔdubo-mii lɛƒɛnyi butaalɛ aani kalɛ na ukyuli ɔɔdala na bina ɔlɔna unwini adila ute kalɔ.

¹⁸Uwi ɔni na ami, Unwoti, ndubɔkɛ kɔnyi na mbada lɛlɛ-mii lɛlɔ mmɔ ni, bina sika ɔƒualadi ku sika ugyiedi ƒui muedi ulakana-mii bɔƒɔ na limeyi lɛmmɔ lɛlɔ. Ndubo kɔnyi bɔkɛ geen na libile ala aani kalɛ na ogya ɔɔda momoomo teekeyi lɛla biala ku bekyuli.”