Read Lelemi Hagai 2 Bible Online

Hagai 2 - Lelemi bible

Hagai 2

¹Na kɔbuli kɔni nsia kɔmmɔ kama na limeyi aavlanyɔ-lideedi lɛlɔ ni, Unwoti ɔ́su Kenye Udiene Hagai ɔnii ɔtɛmiku aban ɔgadine unengu Serubabel ku ɔkpane unengudi Yosua ku kadi bekyuli bammɔ ƒui na uye-ma ɔnini,

³“Bina ɔdi uunyimo kalɛ na kakpakɔ kedeedi kammɔ kéteekeye? Nsu ɔƒaani ni, bɔnu na bɛɛnu ka kadi lɛla lɛdi?

⁴Nsu amii ni, bɛkya ɔkplu na binye kabla kammɔ lɛlɔ! Ɔsika ami, Unwoti Ɔyikune Ƒui, ndubɔkya-mii akɔ mɛni, na libunku-mii na kabla kammɔ kemmo

⁵aani kalɛ na líse bina bati kuuku kenye uwi ɔni na lɛ́kpanku-ma lɛ́lɛku Egyipte kalɔ lɛlɔ. Bitekpoku lɛlɔ. Nkya-mii akɔ mɛni!

⁶Na uwi uletu nsɔ ndubo katɔ ku kalɔ ku ɛpu ku kalɔ kakwiidi kammɔ ƒui bɔkunku.

⁷Ndubo kadi bekyuli ƒui bɔkunku ku bana akɛla ani náƒɔ-ma kuye na beti-nya beboku mɛni. Mmɔ na kalɛ na mina bukeye bɔɔtu anumi bɔdubɔƒɔ kakpakɔ kammɔ kemmo ƒui.

⁸Sika ɔƒualadi ku ugyiedi ƒui ami ɔdi na ɔdi,

⁹na muusé-mii kenye ka kakpakɔ kamɛni kadubo bukeye butulo kedeedi. Na ndubo ɔma ɔmmɔ lɛnɔ kusɛ kusɛ bute na keyi buɛɛ kaƒɔ-nwu kemmo.”

¹⁰Na kɔbuli yaalenwidi na limeyi aavlanyɔ-linedi lɛlɔ ni, Unwoti Ɔyikune Ƒui ɔ́su Kenye Udiene Hagai

¹¹ɔnii uye bakpane kasusu ɔ́siku lɛla lɛni ndubo mɛni lɛlɔ.

¹²Si úbo úte ka ukyuli ɔdanku lɛna lɛni na béti béte ati na lɛkya lɛdiku lɛdi kemmo lítuku bodobodo iye kutu ntɛ iye nnɔ iye adila bamba adi ni, ala ammɔ akana na enwini ala ani na béti anya lɛnɔ béti béte Unwoti? Mmɔ na bakpane bammɔ bédie kenye banini, “Kudi kudii.”

¹³Amu na Hagai úye ɔnini, “Na si úbo úte ka ukyuli ɔdi útuku ukpine na ɔda bubo bɔɔtina ka útamanku ka ɔkpa Unwoti ni, si ukyuli ɔmɛni útuku adila amɛni ni, ɔɔtina ka ala ammɔ lɛnɔ eesé lɛlɔ?” Amu na bakpane bammɔ bédie kenye banini, “Unyeƒi biala uuubo ka ala ammɔ eesé lɛlɔ.”

¹⁴Mmɔ na Unwoti ɔ́su Hagai ɔnii ɔsu bekyuli bammɔ ɔnini, “Lɛni geen na kadi bekyuli bamɛni ƒui bese ɔƒaani. Na lɛla biala na bɛɛbla ku akpala biala na bɛɛbla ni, eesé-mi lɛlɔ na naaaƒɔ-nya.

¹⁵Nsu ɔ́si ɔƒɛni úsela ni, bɛbla kasusu bɛsiku ala ani ndubo abalɛ lɛlɔ asa na bise kalɔ bitaakya kowodu kalɔ ɔka ute Katɔti kakpakɔ kammɔ bɔtu.

¹⁶Bítaavumi anta lisu bonwu ku kasusu ka bɛkɛ aani akyami aavlanyɔ, nsu leevu kani na bɛɛkɛ́. Na si bísie bitéwilimi ntɛ bɔni na bídie bíse ku kasusu ka bɛkɛ lɛsii liti ni, aavlanyɔ kani na bɛɛkɛ́.

¹⁷Ami nébo-mii na líbile-mii kabla ƒui lɛni ɔni na liwulu ɔƒɛƒɛɛ ku etubankɛ áya na bina edula ákwɛ kuyii na ébulo bɔdia. Nsu ɔmɛni ƒui bíni ka binwini bibo-mi kudɔ.

¹⁸Na ɔ́si ɔmwi kɔbuli yaalenwidi limeyi aavlanyɔ-linedi lɛmɛni lɛlɔ ɔni na bákya Unwoti kakpakɔ kowodu kalɔ ɔka mɛni úsela ni, bitaabla kasusu na biye lɛlɔ bɛnii,

¹⁹‘Edula adi asɔ ewi linwu? Na nnɔ egyii ku anwingyie ku adingyii egyii lidu lɛmmɔ ɔdi ɔ́nwu ɔsia?’ Oowo. “Nsu ɔ́si ɔmwi limeyi lɛmɛni lɛlɔ úsela ni, ndubute-mii kusɛ kusɛ.”

²⁰Ɔmmɔ kama ni, Unwoti ɔ́sɔ ɔ́su Hagai kunyɔdi na limeyi lɛmmɔ kani lɛlɔ ɔnini,

²¹“Su aban ɔgadine unengudi Serubabel ku ɔkpane unegudi Yosua anini, ‘Ndubo katɔ ku kalɔ kammɔ bɔkunku.

²²Ndubo lɛga kɔdikɔ agaboku ammɔ budi bubo na lɛbwɛ kadi bakyuli bammɔ lɛga kɔdikɔ kɔmmɔ ƒui. Na lɛtu bana bapɔnkɔ kɛɛkɛ lɛmmɔ libi kalɔ na bapɔnkɔ bammɔ ku bana beliene bammɔ betébi kalɔ ɔni na ama alati ndubo bana banwa banwa lɛlɔ kuwii bɔtu bɔdu.’

²³Na Kadi Ƒui Unwoti ɔnini, ‘Na limeyi lɛmmɔ lɛlɔ ni, ndubuti awɔ Serubabel, mina kabla ɔblane Sieltel ubidi ɔnanabi, lɛbla aani ɔgagyii, ɔsika awɔ na lɛ́ƒuna.’ Lɛni na Unwoti ɔ́su.”