Read Lelemi Sakaria 13 Bible Online

Sakaria 13 - Lelemi bible

Sakaria 13

¹“Libiɔ lɛdi lɛdubo bɔkya na uwi ɔni mebo kemmo, na nina kemmo na Dawid bebi ku bawɔ badubɔkana na baƒɔ bana ekpidi ku bɔƒiɔ ƒui bedie lɛlɔ.”

²Unwoti Ɔyikune Ƒui ɔnini, “Si uwi ɔmmɔ úbedu ni, ndubo baƒiɔ ƒui udu biala bɔyila na kalɔ kammɔ lɛlɔ, na bekyuli bayiƒala-ma ƒui úti úsela uwi ƒui kemmo. Na ndubo bana kenye bediene ku ayu ekpidi ani na atɔnku-ma mmɔ ƒui udu bɔyila.

³Na si kenye bediene bammɔ udu ɔdi ɔ́sɔ ɔ́da ɔ́lɛ ni, bana bawɔne ɔlɛka babala-ma na basu-ma ka badubo bukpi na ɔkɔ ala ani na baasu na ami Unwoti lɛnyi kemmo ɔsu. Na si bátada bátaya na ɔmɛni lɛnɔ kama ni, ɔlɛka bana bawɔne badu-ma ku kuwii.

⁴“Na kɔƒa kɔdubukpo kenye bediene bammɔ na bana ɔkɔ kɔyu kemmo ala ani na ama alati banii baanu ɔsu, na basɔ balakya bana adala na batɔlɔ ka badi kenye bediene badi.

⁵Mmomu badubɔsu banini, ‘Lɛɛɛdi kenye udiene, mmomu umonsene kani na ndi mina ngba emeyi ƒui kemmo.’

⁶Na si béye bana akɔ ɔdi banii, ‘Bi alɛbi nsia-a lɛlɔ lɛni’ ni, badubo kenye budie banini, ‘Mina ɔkpana ɔdi kesii na ɔmɛni ɔ́lɛ.’ ”

⁷Unwoti Ɔyikune Ƒui ɔnini, “Ya liti mina kewii na likpoku mina baƒonu ɔdane ku mina ɔkpana. Du baƒonu ɔdane ɔmmɔ na baƒonu bammɔ badubugyingya, na ndubudie banamudi bammɔ atu.

⁸Na si béle-ma kemmo akpa atɛ ni, lɛkpa linwi kani na basɔ badubɔnu na kalɔ kammɔ kemmo.

⁹Na ndubɔƒɔ bani nébu mmɔ lɛlɔ na lɛbla-ma kedee na lɛkɔku-ma lɛnu aani kalɛ na baaƒɔ sika ugyiedi ku ɔƒualadi taanu nwuna bɔdia. Na badubo-mi bɔkpali buvele ala na linu na libunku-ma. Na ndubɔsu nnii, ‘Mina bekyuli na bɛdi,’ na ama lɛnɔ badubɔsu banii, ‘Awɔ Unwoti ndi bula Katɔti.’ ”