Read Lelemi Sakaria 2 Bible Online

Sakaria 2 - Lelemi bible

Sakaria 2

¹Uwi ɔmɛni kemmo ni, lɛ́nu ka ukyuli ɔdi ɔda kabuli kani na baakɔ́ku ala.

²Mmɔ na líye-nwu nnini, “Wɛ na ésela?” Amu na údie kenye ɔnini, “Ntákɔku Yerusalem na lɛnu-nwu bune ku bɔbɛbɛ.”

³Na uwi ɔmmɔ kemmo ni, Katɔti ɔtu ɔni nnye mɔɔtɛmiku-mi mmɔ ɔ́bla aani bɔgyu na ɔda kani na ɔtu ɔbambadi ɔ́si úbalɛ-nwu kudɔ,

⁴na ɔ́su-nwu ɔnini, “Babla na asu ukyuli ɔni nda kabuli kammɔ anii ɔmii ɔdi biala ɔɔɔdubo Yerusalem bɔsia, ɔsika bekyuli ku bebuo badubo bumomo butulo-nwu ɔni na awodu muedi aaadubo bɔdia bɔtu bɔmana-nwu.

⁵Unwoti úse kenye ka anwu ɔlati ndubo kowodu kɔni maka mamana Yerusalem bunwini na utaagyumana-nwu, na anwu kani ndubulie ɔma ɔmmɔ ntɛntɛ na uteekeye na ɔma unengudi ɔmmɔ kemmo.”

⁶Unwoti ɔ́su nwuna bekyuli ɔnini, “Bikeli na bɛtɔlɔ kalɔ kani nkya katɔ kakɛ mmɔ kemmo kesii kani na lígyingya-mii lɛ́kya na lɛƒɛnyi ine bɔmmɔ.

⁷Bɛtɔlɔ Babilon kalɔ lɛlɔ na bɛbla binwini bibo Sion.”

⁸Mmɔ na Unwoti Ɔyikune Ƒui ɔni muukeye údie lɛdi úte-mi ɔnii nsu kadi bekyuli bani nékpo Sion na béyu-nwu ala bátɔlɔku nnini, “Sion ɔ́ƒɔ ami Katɔti kuye geen aani mina lɛnumi. Anwuɔsu lɛla biala na bɛ́bla ɔma ɔmmɔ ni, anwu na bɛ́bla.

⁹Anwuɔsu ɔdubo amii lɛnɔ budie bute na bina kabla bablane badubo-mii bukpoku na beyu-mii ala batɔlɔku. Na ɔmmɔ ɔdubɔya na bɛnu-nwu bɛti ka Unwoti Ɔyikune Ƒui nátala-mi.”

¹⁰Amii Sion ɔma unengudi bekyuli, bidie lɛnu na bɛdi limeyi! Ɔsika Unwoti úse kenye ka ɔdubo ubelieku-mii.

¹¹Na si uwi ɔni na úbo-nwu kemmo lɛni ni, kadi bekyuli pii badubunwini bebo Unwoti kudɔ na benwini nwuna bekyuli na uwi ɔmmɔ lɛlɔ, na badubɔnu bati ka Unwoti kenye udiene na ɔdi sɔsɔ.

¹²Na Yuda lɛnɔ ɔdubunwini kalɔ kedee kammɔ kakɛ kadi, na Yerusalem ɔsɔ unwini Unwoti ɔma unengudi ɔƒunadi ɔmmɔ.

¹³Ɔdi biala ɔbla kpoo na baba lɛsɛ! Ɔsika Unwoti ɔkya-mii akɔ na uusié taasɔ na nwuna kakpakɔ kedee kemmo.