Read Lelemi Sakaria 3 Bible Online

Sakaria 3 - Lelemi bible

Sakaria 3

¹Bédie lɛla bamba bátina-mi. Na uwi ɔmɛni kemmo ni, lɛ́nu ka ɔkpane unengudi Yosua unye Katɔti ɔtu ɔmmɔ anumi, na Satan lɛnɔ unye kagyumana na Yosua kɔdianu kakɛ ka ɔdu-nwu kɔtɔ.

²Nsu Unwoti ɔ́su-nwu ɔnini, “Satan, awɔ ɔdi mmomu nátatɛ. Mina ɔma unengudi ɔƒunadi ndi Yerusalem. Na ukyuli ɔmɛni ni, budie na bédie-nwu aani ugyii bálɛku ogya livongu kemmo.”

³Na ka Yosua unye Katɔti ɔtu anumi ni, nwuna adala ánwu.

⁴Anwuɔsu Katɔti ɔtu ɔmmɔ ɔ́su bekyuli badi ɔnii bada-nwu adala ani nánwu ammɔ bedie-nwu lɛlɔ. Na únwini na ɔ́su Yosua ɔnini, “Ɔmɛni ɔɔtina ka béti ƒula ekpidi bákyiɛ-ɔ. Na ɔƒɛni ni, ndubɔkya-a ɔkpane bɔdi lɛwu.”

⁵Mmɔ na ami lɛnɔ lɛ́kya litemi lɛmmɔ kenye na lɛ́su nnini, “Biti bakpane lɛdune lɛni nse sɛɛn mmɔ lɛnɔ bibi-nwu lili.” Anwuɔsu bákya-nwu ɔkpane lɛwu lɛmmɔ na béti lɛdune lɛmmɔ lɛnɔ bébi-nwu lili uwi ɔni na Katɔti ɔtu ɔmmɔ unye ɔɔnu.

⁶Ɔmmɔ kama ni, ɔtu ɔmmɔ ɔ́kya Yosua ɔkplu na ɔ́su kenye kani na Unwoti Ɔyikune Ƒui úse ɔnini,

⁷“Si ádi mina litemi lɛlɔ geen ni, ndubuti-ɔ linyene mina kakpakɔ kammɔ kenye na ataanu-ka lɛlɔ ku kana kaduli kammɔ ƒui. Na adubɔkɛ kuƒi ka atɛmiku mina batu bani nnye-mi kudɔ uwi biala kemmo.

⁸“Ɔkpane Unengudi Yosua, se kɔtu kaduɛ na enu ku amii bakpane bamba ƒui lɛnɔ. Amii ndi likposela lɛni nnye ala ani ndubo abalɛ uwi ɔni mebo kenye ɔƒaani. Ɔsika ndubɔsɔku mina kabla ɔblane, Ɔga Ɔƒunadi ɔmmɔ, ɔni baalɔ banii kugyii kagba liboku.

⁹Yosua, líti lɛtabi lɛdi lɛ́va-a anumi na lɛtabi lɛmmɔ libo lɛƒɛnyi maatɛ. Na ndubo lɛla lɛdi bunweni bɔsia lɛtabi lɛmmɔ lɛlɔ. Na limeyi linwi lɛdi lɛlɔ kani na ndubo kalɔ kamɛni bekyuli ekpidi ani na bábla báƒiɔ-mi buti bɔkyiɛ-ma.

¹⁰“Na bina akɔ ɔdi biala ɔdubɔlɔ nwuna bakpana uboku na bilie bina mmo adingyii egyii kalɔ bɛkya lɛlɔ ebiti.”