Read Lelemi Sakaria 4 Bible Online

Sakaria 4 - Lelemi bible

Sakaria 4

¹Ɔtu ɔni nnye muudie ala amɛni kalɔ teete-mi ɔ́kunku-mi na lɛ́ta na ɔ́bla-mi aani si bɔlɛɛ na nda.

²Amu na úye-mi ɔnini, “Bi na ánu?” Mmɔ na lídie kenye nnini, “Asogya kasiakɔ sika ugyiedi ugyii na kalɛkɛ kani kemmo na beewi nnɔmii bɔsia-nwu katɔ kakɛ. Na ugyii ɔmmɔ lɛlɔ ni, lɛsogya maatɛ lise lɛɛda, na asogya biala uudie ogya linyemi maatɛ.

³Nnɔ kugyii kunwi kunye nnɔ kalɛkɛ kammɔ kɔdianu kakɛ na kunwi lɛnɔ kunye kɔmiinu kakɛ.

⁴Nsu ni, Ati, bi na ala ani mɔɔnu mɛni adanku?”

⁵Amu na anwu lɛnɔ únwini na úye-mi ɔnini, “Aaagyi lɛla lɛni na adanku?” Amu na lídie kenye nnii, “Oowo.”

⁶Anwuɔsu ɔtu ɔmmɔ ɔ́su-mi ɔnii, “Lɛla lɛmmɔ lɛdanku kenye kani na Unwoti ɔ́su Serubabel ɔnini, ‘Ami ndi Unwoti Ɔyikune Ƒui. Utalɛ ka eti ƒula anu asia ƒula ɔyikun iye kenyekɔ kadi lɛlɔ, mmomu mina kɔyu ɔyikun lɛlɔ.’

⁷“Na kɔbi kɔni na aanu na ƒula anumi mmɔ ni, badubo-ku bɔbwɛ búwi kalɔ kpɛtɛ kpɛtɛ. Na edie kakpakɔ lɛtabi lɛni náƒɔ kuye geen litulo ƒui mmɔ alɛku, na bɛdububo kudu momoomo bɛnini, ‘Unwoti ɔ́bla-bu lɛƒɔndia, na lɛtabi lɛmmɔ lɛdia geen!’ ”

⁸Ɔmmɔ kama ni, Unwoti ɔ́sɔ ɔ́tɛmiku-mi na ɔ́su-mi ɔnini,

⁹“Serubabel nákya kakpakɔ kammɔ kowodu ɔka kalɔ buse, na anwu kani ndubo-nwu bɔwɔlɔ. Na ɔmmɔ ndubɔya na bekyuli ƒui banu bati ka ami, Unwoti Ɔyikune Ƒui, nátala-a lɛ́kya-ma.

¹⁰Na bekyuli bani ƒui nátanu limeyi lɛmɛni bátabu na kalɛ na ala amɛni eesié kalɔ blii mɛni ɔsu ni, ama ndubo babadi limeyi uwi ɔni na badubɔnu ka Serubabel ɔda lɛtabi lɛni náƒɔ kuye geen mɛni. Na lɛsogya maatɛ lɛmmɔ linye lite ami Unwoti anumi ani náka ámana kalɔ kammɔ ƒui, na aanu lɛla biala kemmo nwaa.”

¹¹Mmɔ na líye ɔtu ɔmmɔ nnini, “Na nnɔ egyii ani nnye mmɔ anya nɔɔ? Bi na enye ete?

¹²Na bi na egyii kɔgba kɔni kemmo na nnɔgyie bɔni nse aani sika ugyiedi bɔɔgbá taalɛ lɛkpɛmii kemmo mmɔ aku kunye kute?”

¹³Amu na úye-mi ɔnini, “Aaagyi lɛla lɛni na kunye kute?” Amu na lídie kenye nnini, “Oowo, Ati, lɛɛɛgyi.”

¹⁴Amu na ɔ́su-mi ɔnini, “Kɔgba kɔmɛni kunye kute batɔnkune inyɔ bani na béwi-ma lili nnɔmii na báƒuna-ma mmɔ na benye bayawine ƒui Unwoti kudɔ.”