Read Lelemi Malakai 1 Bible Online

Malakai 1 - Lelemi bible

Malakai 1

¹Unwoti ɔ́su Malakai kenye kadi na kadanku Israel kalɔ.

²“Israel, ami Unwoti lɛ́yɔ-ɔ geen, nsu ɔmmɔ ƒui kama buye na eeye anii ulu ɔmani lɛlɔ na líti lɛ́yɔ-ɔ. Tayiƒala ka ƒula ɔti kuuku ndi Yakob na ɔnwani ndi Esau, nsu Yakob na lɛ́ƒuna

³nsu líni Esau. Lɛ́bla nwuna abi lɛlɔ kalɔ na kénwini kalɔ kakwiidi kesii kani na beƒiebuo beelie.

⁴“Esau bebi ku bawɔ badubɔkana na basu banini, ‘Ina ka bula Edom kalɔ káyii udu ni, bɔdubɔsɔku-ka bɔtu.’ “Nsu ami, Unwoti Ɔyikune Ƒui, líse kenye ka lɛla biala na bátu ni, ndubudi-ni lɛbwɛ liwi kalɔ na bekyuli ƒui banu ka lɛɛɛdubo kɔnyi bɔda buti taakya-ma bɔya na uwi ɔni kemmo na bamu benye bana ekpidi bɔbla lɛlɔ ɔsu.

⁵Na si uwi ɔni na ánu ɔmɛni ni, adubo bɔva na asu anini, ‘Unwoti ɔ́ƒɔ lɛnyi ɔ́kɔ úbo ɔ́vi Israel lɛmii ƒui.’

⁶“Ami, Unwoti Ɔyikune Ƒui, mbo lɛla lɛdi na lɛsu amii bakpane. Bebi baabu bana bawɔne, na kabla bablane baabu bana batɔlati. Na ami ndi Ati ku bina ɔti. Na bi ɔsu na bilábu-mi? Amii bakpane bídumi-mi. “Nsu biiye ɔƒɛni bɛnini, ‘Dɛ na búdumi-ɔ?’

⁷“Biidumi-mi na ɔni na biiti adila ani nátamanku taabasia mina lɛkpabi lɛlɔ ɔsu. “Nsu biiye bɛnini, ‘Bi na bɔ́bla na útamanku ƒula lɛkpabi?’ “Bɛɛbla ɔmɛni na ɔni na bilanu lɛkpabi lɛmmɔ taakya lɛla lɛdi kemmo.

⁸Nsu ni, bɔnu bilánu ka útamanku ka biti ebuo ɔni na lɛnumi lɛ́bwɛ-nwu iye ɔ́sɔ na nwuna lɛlɔ ekpo étedu bɛkpa bite-mi? Amii biti ebuo ɔmmɔ udu bisienku bina aban ɔgadine unengu na bɛnu si kaƒɔ kadubɔyɔ-nwu na ubunku-mii lɛla lɛdi!

⁹“Ngba bukpidi bɔmɛni na bilie, nsu bɛɛkpali teevele kusɛ kusɛ. Amii alati bɛnu si ndubɔnu-mii kɔnyana na ɔbladu ɔmɛni ɔsu. Lɛni na Unwoti ɔ́su.”

¹⁰Unwoti Ɔyikune Ƒui ɔnii, “Mɔɔyɔ́ geen si nka ukyuli ɔdi ɔkalɛ mina kakpakɔ kammɔ na bɛda uwi bubile bɛya bɛnii ogya na bɛɛsala na mina lɛkpabi lɛlɔ bite akpala adi bɔbla. Amii bakpane bammɔ lɛlɔ liláda-mi kubiti, anwuɔsu na líni nnii nsɔ lɛɛɛdubo bina akpala adi bɔƒɔ.

¹¹Ɔ́si ɔƒɛ katukɔ útédu ɔƒɛ kanukɔ ni, bekyuli badubumwi-mi lɛnyi na bakyula oloƒui na kadi biala bekyuli akɔ na kalɔ lɛlɔ, na badubɔbla akpala ani námanku bete-mi.

¹²“Nsu amii bakpane muedi muudumi-mi taasu bɛnini, ‘Bulánu lɛla lɛni náƒɔ kuye na Unwoti lɛkpabi lɛmmɔ lɛlɔ, na akpala ammɔ lɛnɔ eesé-bu lɛlɔ!’

¹³Bina ala bɔbla bɔɔtina ka bɛ́ɛnɔnku ala ammɔ bɔbla na biidie enu taakywɛ-nya ku lɛlɔ bɔtina. “Na si bíti bebuo bani na básɔ bíboku bɛnii bibakpa bite-mi ni, bɔƒɔ na ɔlɛka lɛƒɔ-ma?

¹⁴Biisé-mi kenye ka bɛdububoku-mi bebuo bani námanku, nsu bɛɛvumana teeti bebuo bekpidi mmomu teeboku-mi si uwi údu. Na ndubo ɔgbankpi buti buboku-mii lɛlɔ na ɔmɛni ɔsu, ɔsika ami ndi Ɔga Unengudi Unwoti Ɔyikune Ƒui ɔni na kadi bekyuli ƒui baayia na kesi kesii.”