Read Lelemi Malakai 2 Bible Online

Malakai 2 - Lelemi bible

Malakai 2

¹“Ami, Unwoti Ɔyikune Ƒui, mbo lɛla bamba na lɛsu amii bakpane.

²Si bɛ́vumana na bɛɛsia anu teete-mi ɔbu ɔni námanku-mi ni, ɔdia-mii utulo. Si ɔɔɔdi lɛni ni, ina kusɛ kusɛ ɔdi bina ɔdi ni, ndubɔya na unwini ewida. Na geen ni, líise kalɔ ndaku ɔmɛni bɔbla, ɔsika bíteti bina bakpane kabla bítakya kayi kalɛ na bɛbla bina kabla ulu lɛlɔ.

³“Ndubo bina bebi ku bawɔ kɔtu bɔni. Na ala ani na bɛ́kpɛ bídie bebuo bani na bíbakpa bíte-mi livo kemmo ni, ndubuti-ni lisusu-mii anumi na lidie-mii atu na bɛyii udu.

⁴Mɔɔsu-mi ɔmɛni kalɛ na lɛkana kenye kani na líse bina ati kuuku Lewi lɛlɔ butaadi.

⁵Líte-nwu kusɛ kusɛ ka ulie ngba gyɔlɔɔ aani kalɛ na líse-nwu kenye líse. Na ɔ́bla nwuna kakɛ, na ɔ́di bunyimi bɔmmɔ lɛlɔ ɔni na ɔ́bu-mi na úmwi-mi lɛnyi.

⁶Ɔ́tina litemi geen lɛmmɔ na útanyi ɔkɔ útatɔlɔ bekyuli. Ɔ́tɔnku bekyuli pii na bénwini kama bákya bana ekpidi, ɔsika únu-mi litemi na úlie ngba bɔbuni.

⁷“Amii bakpane, ɔlɛka bina inye bugyingya lɛlati, na ukyuli biala ubo-mii kudɔ ubenu bɔlɛ, ɔsika amii mɔɔtɛmi teete ami, Unwoti Ɔyikune Ƒui.

⁸Nsu bínwini kama bɛ́kya-mi. Na bina ala ani bɛɛtina mmomu mɔɔkpanku bekyuli na beesié taatábla ala ekpidi. Na bíbile bunyimi bɔni na línyimiku bina ati kuuku Lewi.

⁹Anwuɔsu na lɛ́ya na ukyuli biala uukisi-mii na béni-mii. Ɔsika bítenu-mi litemi na bɛɛnu bekyuli anumi taatɛ etemila.”

¹⁰Bɛɛɛgyi bɛnii bula ƒui ɔti ndi Katɔti? Na ɔɔɔdi Katɔti unwi ɔmmɔ kani nédie bula ƒui? Na bi ɔsu na bɛɛnya lɛlɔ taakya na bilábu bunyimi bɔni na Katɔti únyimi ku bina bati kuuku?

¹¹Amii bani nkya Yuda ku Yerusalem kalɔ lɛlɔ bilásiaku Unwoti kama siin. Na bíbile kakpakɔ kani na Unwoti ɔɔyɔ́ mmɔ ekisila na bɛɛbla ala ani muusé-nwu lɛlɔ na amii ku baƒiɔkpane biiti lɛlɔ.

¹²Muuvele nnii Unwoti ɔsɔ utaya na bekyuli bani na báƒiɔ ulu ɔmɛni lɛlɔ basɔ babla nwuna bekyuli akɔ badi lɛnɔ si ina baawia kpakplaa ka beti etela adi beboku-nwu.

¹³Na lɛla bamba lɛni na bɛsɔ bɛɛbla ndi keku kani na biiwulo teewi nwuna lɛkpabi ka Unwoti úni ɔnii uláƒɔ bina akpala ka átaƒɔ-nwu anu ɔsu.

¹⁴Bi ɔsu na akpala ammɔ átayɔ-nwu kaƒɔ? Ɔsika ɔgyi ka bina akɔ ɔdi biala ɔɔɔsiaku lɛkloƒu uwi uleku ɔni na úti kama siin, mmomu bɛ́lɛ-ma kama ina ka bíse kenye ka ama kani ndubɔbla bina beleku na bilálɛ-ma kama, nsu bíbile linyese lɛmmɔ.

¹⁵Budie na Katɔti údie awɔ ku ƒ'ulekudi ka bɛbla aani ukyuli unwi. Na bi ɔsu na ɔ́bla lɛni? Ɔdi ka bɛwɔ bebi na bɛtɔnku-ma na benwini Katɔti bekyuli. Anwuɔsu bɛda bina ngba kaduɛ, na bitalɛ bina lɛkloƒu uwi uleku kama kudii.

¹⁶Unwoti Katɔti Ɔyikune Ƒui ukisi ukyuli ɔni nábla ulikplu ɔni udu na ɔ́kana na ɔ́nyonu ulekudi. Anwuɔsu bɛda bina ngba kaduɛ, na bitalɛ lɛlɔ kama.

¹⁷Bɛ́ɛya na Unwoti ɔ́nɔ-mii lɛlɔ ku bina etemila. Nsu bɛmu biiye bɛnini, “Ulu ɔmani lɛlɔ na bɔ́sia bɔ́bla ala ammɔ?” Ulu ɔmmɔ ndi ɔni na bɛɛsu bɛnini, “Likpidi bablane baada Unwoti kubiti, na ɔɔɔdaku-ni ka ɔtɛ litemi lɛmɛni ani.”