Read Lelemi Mateo 11 Bible Online

Mateo 11 - Lelemi bible

Mateo 11

¹Uwi ɔni Yesu údie nwuna batɛyane leevu-inyɔ bammɔ ulu ɔ́wɔlɔ ni, ɔ́ta mmɔ na úsie utátina ala na utákɔ lɛsa ute lɛma lɛni nkya amadɔ mmɔ.

²Na uwi ɔmmɔ kemmo ni, Ntu Ɔkpilane Yohane ɔtɛ aban ɔtɔ. Únu kabla kani na Kristo ɔɔbla, na ɔ́tala nwuna batɛyane badi ɔ́kya Yesu.

³Na bétéye Yesu banii, “Awɔ ndi ukyuli ɔni na Katɔti ɔ́su úse ka ɔdubo, munuu butaanu ukyuli bamba ulu?”

⁴Amu na Yesu údie kenye ɔnini, “Binwini bisie na bitásu Yohane ala ani na biinú ku ani na bɛɛnu ka mɔɔbla.

⁵Banumbwɛne baanu, na bani náƒɛ bewi kalɔ beesié. Ama bani muuƒi ɔlɛgyie lɛlɔ lɛɛbla sɛɛn na batutine beenú. Bekpine baata na mɔɔkɔ́ litemi buni lɛmmɔ lɛsa teete bawabane.

⁶Lɛlɔ litaayɔ bekyuli bani na bana kasusu kalabla inyɔ inyɔ na mina ala ani mɔɔbla ɔsu.”

⁷Uwi ɔni na Yohane batɛyane bammɔ baatɔlɔ mmɔ ni, Yesu ɔ́su Yohane lɛlɔ litemi ɔ́tina bekyuli bammɔ ɔnini, “Ka bísie ketele kemmo ni, bi na bísie bitánu? Evete ani na ɔƒɛƒɛɛ uubó taavinku?

⁸Munuu bi na bísie bitánu? Ɔnana ɔni nkya lɛwu lɛni mɔɔdia bɔnu? Oowo, bekyuli bammɔ udu ni, ɔga kesii na beelie.

⁹Bɛsu-mi ukyuli ɔni udu na bísie bítánu! Katɔti kenye udiene ɔdi munuu dɛ? Ɛɛn, na sɔsɔ na ɔdi. Nsu mɔɔsu-mii ka bɛ́nu ukyuli ɔni ntulo kenye udiene muedi.

¹⁰Yohane ɔmɛni ndi ɔtu ɔni lɛlɔ na Bunweni Kedee Ɔku ɔmmɔ ɔ́su ɔ́siku uwi ɔni na Katɔti ɔ́su Ubidi ɔnini, “ ‘Ndubɔtala ɔtu ɔdi na ɔgyu ɔtɔ-ɔ na ɔklibi bekyuli ute ƒula bubo.’

¹¹Na mɔɔsu-mii geen ka Ntu Ɔkpilane Yohane ɔ́ƒɔ kuye utulo ukyuli ɔni nélie kayawi kamɛni úbavi. Nsu ni, ukyuli ɔni nátaƒɔ lɛnyi na Katɔ Ɔga Ɔma muedi ni, ɔ́ƒɔ kuye útulo Yohane ɔmmɔ.

¹²Na ɔ́si Ntu Ɔkpilane Yohane uwi úbalɛ ɔmwi ni, bekyuli pii báta ku lɛnungyie batáwia Katɔ Ɔga Ɔma ɔmmɔ beduo. Nsu bekyuli bani anumi egyie-ma geen lɛti na baanwanɛ lɛlɔ ni, ama ndubuduo mmɔ.

¹³Na Mose ɔda bubo ku Katɔti kenye bediene básu Katɔti litemi úbalɛ Yohane uwi lɛlɔ.

¹⁴Na si bɛɛyɔ́ ka bɛƒɔ bana litemi bɛdi ni, Yohane ndi Elia ɔni na básu bése ka webo.

¹⁵Si bɛɛkana ni, biti lɛla lɛni lɛ́su mɛni.

¹⁶“Ɔƒɛni ni, bi na ndubuti ɔmwi kadi bekyuli lɛkɔku? Bese aani banamu bani mɔɔƒia na kuye. Na bana bakpana baakpali-ma taasu banii,

¹⁷“ ‘Búdie uleku buti agya búte-mii, nsu bítatɔ. Búdie lɛkwanu búte-mii, nsu bítewulo.’

¹⁸Ɔsika uwi ɔni na Yohane úbo ni, úlie kɔka na útani ntɛ. Na ukyuli biala ɔ́su ɔnii uukpi libuo.

¹⁹Nsu uwi ɔni na ami ɔni ndi Ukyuli Ɔyawine Ubi líbo ni, lɛ́di na lɛ́ni. Na ukyuli biala ɔ́su ɔnii, ‘Bɛnu ɔdivone ɔmɛni! Uukpi ntɛ! Anwu ku kuyi baƒɔne ku bekyuli bekpidi muusié.’ Nsu takpete-ma. Katɔti lɛnunda lɛdubudie lɛlɔ keyi na lɛla lɛni na ukyuli ɔɔbla kemmo.”

²⁰Na lɛma lɛni kemmo na Yesu ɔ́bla akɔla pii ni, bekyuli bammɔ bétenwini kama bátakya bana ekpidi. Anwuɔsu úse kalɔ na ɔɔdɔnku-ma.

²¹Ɔ́su ɔnini, “Bɔbuɛ muute awɔ Korasin! Na bɔbuɛ muute awɔ Betsaida! Si lɛma likpidi Tiro ku Sidon na nka lɛ́bla akɔla budie taatina ani lɛ́bla na bina akɔ ni, badubɔda adala ani mɔɔtina ka béni bana ekpidi.

²²Na mɔɔsu-mii geen ka limeyi lɛni na Katɔti ɔdubɔtɛku bayawine litemi ni, ɔdubɔnu Tiro ku Sidon lɛma kɔnyana utulo amii.

²³Na awɔ Kapernaum ni, aakali ka Katɔti ɔdubɔtalaku-ɔ katɔ? Oowo! Katɔti ɔdubɔyulaku-ɔ kalɔ usienku lɛgyavonku kemmo. Ɔsika akɔla budie taatina ani lɛ́bla na bina akɔ ni, si Sodom na lɛ́bla-nya ni, nka ɔmu ɔdi ɔma úbalɛ ɔmwi.

²⁴Bɛnu ɔmɛni bɛti geen ka limeyi lɛni na Katɔti ɔdubɔtɛku bayawine litemi ni, ɔdubɔnu Sodom kɔnyana utulo awɔ.”

²⁵Uwi ɔmmɔ kemmo ni, Yesu ɔ́sɔ ɔ́kpali katɔ ɔnini, “Ati, katɔ ku kalɔ Unwoti, mɔɔgyá-a enu. Éti ala amɛni ábɛla banundane ku bakutine, na édie-nya átina bani nétesie anumi na lɛlati lɛdi kemmo.

²⁶Sɔsɔ Ati, lɛni na aayɔ́ ka ɔlɛ.”

²⁷Na ɔ́sɔ ɔ́su ɔnini, “Mina Ɔti úti ala ƒui úte-mi. Na anwu lɛti ngyi ukyuli ɔni udu na ndi. Na ami lɛti ngyi ukyuli ɔni na mina ɔti lɛnɔ ɔdi. Na mɔɔƒuna bekyuli badi bani na medie-nwu matina.

²⁸“Amii bani nti etila bonwu na lɛlɔ líitu-mii ni, bibo-mi kudɔ na ndubɔya na bɛnwuna.

²⁹Bibo bɔda kɔda, na bɛtɛya bɛsiku-mi kudɔ. Nse buɛɛ na muuboku lɛlɔ kalɔ, na bɛdubɔkɛ bɔnwuna.

³⁰Ɔsika kabla kani na mete-mii ni, keeebo ɔkplu. Na mina etila lɛnɔ ese ƒaa ƒaa.”