Read Lelemi Mateo 26 Bible Online

Mateo 26 - Lelemi bible

Mateo 26

¹Uwi ɔni na Yesu ɔ́wɔlɔ ala amɛni ƒui bɔtina ni, ɔ́su nwuna batɛyane ɔnini,

²“Bɛgyi ka kébu emeyi anyɔ na bɔdi limeyi lɛni bɔɔlɔ Kukpi Lili Bɔvia Limeyi. Na badubuti ami, Ukyuli Ɔyawine Ubi, bete na bakana-mi bamana ugyii lɛlɔ.”

³Amu na bakpane benengu ku ɔma benengu bátása na Ɔkpane Unengudi Kaiaƒa kaduli.

⁴Na béti kasusu kalɛ na beƒie Yesu na bɔbɛ kemmo na badu-nwu.

⁵Nsu básu lɛnɔ banii, “Buleƒie-nwu na limeyi bɔdi kemmo, ɔsika bekyuli badubɔta babakyaku-bu unyeƒi.”

⁶Na uwi ɔmmɔ kemmo ni, Yesu ɔ́kya Betania na ɔnana ɔdi baalɔ Simon ɔni na úƒi ɔlɛgyie kesii.

⁷Uwi ɔni na Yesu ulie ɔɔdi ni, uleku ɔdi úbo-nwu kudɔ mmɔ. Ɔda nnɔmii ku ɔsii ɔdi. Na buunwenyi ƒɛƒɛɛ na bɔ́ƒɔ kuye geen. Na úwilimi-mu úwi Yesu lili lɛlɔ.

⁸Ka nwuna batɛyane bánu ɔmɛni ni, útayɔ-ma kaƒɔ. Béye lɛlɔ banii, “Bi ɔsu na uubile nnɔmii bɔmɛni lɛni?

⁹Ɔdubɔkana na uti nnɔmii bɔmɛni uye kuye bonwu na uti egulabi ammɔ ute bawabane.”

¹⁰Ka Yesu únu lɛla lɛni na badaku bɔsu ni, ɔ́su-ma ɔnini, “Bi ɔsu na bilaya na uleku ɔmɛni ɔkɛ atu kesekɔ? Ɔ́bla lɛla lɛbuni úte-mi.

¹¹Bawabane bakya-mii akɔ uwi biala. Nsu ami ni, ɔɔɔdi uwi biala na ndubɔkya-mii kudɔ.

¹²Uleku ɔmɛni úti nnɔmii bɔmmɔ úwi-mi lɛlɔ úse úte mina bɔva.

¹³Na mɔɔsu-mii geen ka ni, kesi kesii na badubɔkɔ litemi buni lɛmɛni lɛlɔ lɛsa na kayawi mɛni ni, badubuti lɛla lɛni na uleku ɔmɛni ɔ́bla mɛni basu batina na beti benyimo-nwu.”

¹⁴Amu na basiakune leevu-inyɔ bammɔ akɔ unwi ɔni baalɔ Yuda Iskariot úsie bakpane benengu kudɔ.

¹⁵Na úye-ma ɔnini, “Bi na bɛdubute-mi si lɛ́kya Yesu kakya na lídie-nwu lite-mii?” Mmɔ ni, bátuna ka badubute-nwu sika ɔƒualadi ebi avlaatɛ.

¹⁶Na ɔ́si uwi ɔmmɔ lɛlɔ úsela ni, úse kalɔ ɔkya ɔɔwia uwi ɔbuni ɔni lɛlɔ na ɔsia na udie Yesu ute-ma.

¹⁷Amu na limeyi lideedi lɛni lɛlɔ na baadi Bodobodo Ɔni Néteƒu Limeyi ni, batɛyane bammɔ bébo Yesu kudɔ banii, “Wɛ na aayɔ́ ka butáklibi Kukpi Lili Bɔvia Limeyi bɔdi adila bute-ɔ?”

¹⁸Ɔ́tala-ma ɔnana ɔdi kudɔ na ɔ́su-ma ɔnini, “Bisie ɔma kemmo na bitásu-nwu bɛnii, ‘Ala ɔtinane ɔnii, “Mina uwi úudu. Na ƒula kesii na ami ku mina batɛyane bɔdubɔdi Kukpi Lili Bɔvia adila ammɔ.” ’ ”

¹⁹Anwuɔsu batɛyane bamɛni bábla kalɛ na Yesu ɔ́su-ma na bátánwa Kukpi Lili Bɔvia Limeyi bɔdi adila amɛni bése.

²⁰Na ka useyi uwi údu ni, Yesu ku nwuna batɛyane leevu-inyɔ bammɔ bébo bebelie kalɔ.

²¹Na uwi ɔni na belie baadi ni, Yesu ɔ́su-ma ɔnini, “Mɔɔsu-mii ka ni, bina kemmo unwi ɔdubɔkya-mi kakya.”

²²Litemi lɛmɛni lɛ́yu batɛyane bamɛni ɔlɛ geen na bésie kalɔ beeye-nwu unwi unwi banii, “Blɔti, ɔɔɔdi ami na ada, ntu?”

²³Yesu údie kenye ɔnii, “Ukyuli ɔni na ami ku-nwu kɔnu nkya lɛkyami kemmo ndubɔkya-mi kakya.

²⁴Ami Ukyuli Ɔyawine Ubi ndubukpi aani kalɛ na Bunweni Kedee Ɔku ɔ́su. Nsu ni, bɔbuɛ muute ukyuli ɔni na ndubɔkya-mi kakya. Si nka bátawɔ-nwu muedi ni, na nka ɔdia-nwu utulo.”

²⁵Amu na Yuda, ɔni ndubɔkya-nwu kakya mmɔ ɔ́su ɔnini, “Ala ɔtinane, ɔɔɔdi ami na ada, ntu?” Na Yesu údie kenye ɔnii, “Bɔsu na ada.”

²⁶Uwi ɔni na Yesu ku nwuna batɛyane belie baadi ni, úti bodobodo. Na ka ɔ́gya Katɔti enu ni, ɔ́bwɛ-nwu kɔkɛ kɔkɛ na úle-ku úte-ma. Ɔ́su ɔnini, “Bɛƒɔ ɔmɛni na bɛdi. Ɔmɛni ndi mina ɔlɔna.”

²⁷Amu na úti ɔɔƒɛɛ ɔdi, na ka ɔ́gya Katɔti enu ni, úti úte-ma. Na ɔ́su-ma ɔnini, “Bina ƒui bɛni.

²⁸Ɔmɛni ndi mina ubugya ɔni na líti muusé kenye kani na Katɔti únyimi ku nwuna bekyuli likpo. Na ndubuti-nwu liwi kalɔ na bekyuli pii lili, kalɛ na Katɔti uti ekpidi ɔkyiɛ-ma.

²⁹Na mɔɔsu-mii geen ka ni, nsɔ lɛɛɛdubo ntɛ bɔmɛni udu bɔdi bɔni ntu limeyi lɛni na ami ku-mii bɔdubɔni ntɛ bɔwɔdi na Katɔti lɛga kadikɔ.”

³⁰Amu na bátu ɔnu ɔdi béti bemwi Katɔti, na bávi bálɛ bésie Inɔ Egyii Kɔbi lɛlɔ.

³¹Mmɔ na Yesu ɔ́su nwuna batɛyane ɔnini, “Bina ƒui bɛdubukeli-mi kudɔ, na kebu ami lɛti. Ɔsika Bunweni Kedee Ɔku ɔɔsu ɔnini, “ ‘Katɔti ɔdubɔdu baƒonu ɔdane ɔmmɔ na nwuna baƒonu begyingya.’

³²Nsu na mina bɔsɔ bɔta bɔsi bekpine akɔ ni, ndubɔgyu lɛtɔ-mii na Galilea.”

³³Amu na Petro ɔ́su Yesu ɔnini, “Si ina bakladi ƒui béni-ɔ muedi ni, ami lɛɛɛdubo-ɔ kama bɔlɛ kudii!”

³⁴Amu na Yesu ɔ́su Petro ɔnini, “Mɔɔsu-ɔ ka usien ɔmɛni asa na akɔkɔ wete kenye muedi ni, adubɔsu kɔtɛ ƒui ka aaagyi-mi.”

³⁵Petro údie kenye ɔnini, “Si ina ɔlɛka badu ami ku-ɔ muedi ni, lɛɛɛdubo bɔsu nnii lɛɛɛgyi-ɔ.” Na lɛni kani na nwuna batɛyane bammɔ ƒui básu.

³⁶Amu na Yesu ku nwuna batɛyane bammɔ bésie kesii kani baalɔ Getsemane, na ɔ́su-ma ɔnini, “Bɛsɔ bilie mɛni na lisie ngye ntákpali katɔ.”

³⁷Úti ku Petro ku Sebedeo bebi inyɔ bammɔ ɔ́da. Na ka bákɛ ni, kɔyɔ kúwi-nwu na lɛƒɛda lɛ́ƒɔ-nwu lɛlɔ kemmo.

³⁸Na ɔ́su-ma ɔnini, “Muunú ɔlɛ na mina kɔyu kemmo geen aani si bukpi nda. Bɛsɔ binye mɛni na bitaagyumanaku-mi.”

³⁹Amu ka úsie lɛtɔtɔ blii ni, ɔ́yu úbi kalɔ na ɔ́kpali katɔ ɔnini, “Mina Ɔti, si wadia ni, na aƒɔ lɛbibo ɔɔƒɛɛ ɔmɛni na mina kudɔ. Nsu ni, tabla mina lɛyɔla, mmomu bla ƒula lɛdi.”

⁴⁰Ka ɔ́sɔ únwini úsie batɛyane ɛtɛ bammɔ kudɔ ni, ɔ́nu ka baalɛɛ. Na úye Petro ɔnini, “Bítakana na binyeku-mi kagyumana ɔdɔ unwi pɛ?

⁴¹Bɛsɔ bilie kagyumana na bɛkpali katɔ kalɛ na bileduo bukpoku taanu kpakplaa kemmo. Kɔyu kɔɔyɔ́ ka kɔbla, nsu ɔlɔna use kpɛtɛ kpɛtɛ.”

⁴²Amu na Yesu ɔ́sɔ únwini úsie kunyɔdi na ɔ́kpali ɔnini, “Mina Ɔti, si lɛbibo lɛni ndubo buti mɛni lilávi-mi lɛlɔ na ɔdi-ɔ lɛƒɔyɔ ka liti-ni ni, ya na ɔlɛ lɛni.”

⁴³Ka Yesu ɔ́sɔ únwini úbo ni, úbanu ka lɛlɛɛ litulo batɛyane ɛtɛ bammɔ na bátakana bana anumi muedi bubimi.

⁴⁴Yesu ɔ́da-ma úse na ɔ́sɔ úsie kɔtɛdi na ɔ́kpali katɔ kalɛ na ɔ́kpali úbavi.

⁴⁵Amu na ɔ́sɔ úbo batɛyane bammɔ kudɔ na ɔ́su-ma ɔnini, “Ɔsu bɔtɛ na bɛmu bɛtɛ bɛɛnwuna lɛni? Ɔƒɛni na uwi ɔmmɔ údu ka beti Ukyuli Ɔyawine Ubi ɔmmɔ bakya bekyuli bekpidi enu kemmo.

⁴⁶Bɛta na buteesie. Bɛnu, kakya ɔkyane ɔmmɔ úude.”

⁴⁷Yesu ɔmu unye ɔɔtɛmiku-ma asa na Yuda ɔni ndi leevu-inyɔ bammɔ akɔ unwi ɔ́da úbalɛ. Ɔdanku bekyuli lisu lɛni na bakpane benengu ku batɔnkune bédie. Na bada lɛkɛɛ ku ligyii.

⁴⁸Kakya ɔkyane ɔmmɔ ɔ́ya na báti bése ɔnini, “Ukyuli ɔni na makya kɔgbu ni, anwu ndi ukyuli ɔni na bɛɛwia. Biƒie-nwu.”

⁴⁹Ka Yuda ɔ́nya ɔ́nu Yesu kani na úsie-nwu kudɔ na ɔ́su-nwu ɔnini, “Ala ɔtinane, keyi buɛɛ kasiaku-ɔ.” Amu na ɔ́kya-nwu kɔgbu.

⁵⁰Yesu údie kenye ɔnini, “Ɔkpana, bi na aawia mɛni?” Amu na bekyuli bammɔ bébo Yesu kudɔ na béƒie-nwu na báda-nwu kpakplaa.

⁵¹Na bani nsiaku Yesu mmɔ kemmo unwi ɔ́ni nwuna ɔkɛɛ ɔ́kpa na úbeyi ɔkpane unengudi kabla ɔblane kɔtu úkulo.

⁵²Amu na Yesu ɔ́su-nwu ɔnini, “Ti ƒula ɔkɛɛ kya nwuna kakyakɔ. Bekyuli bani mɔɔgyumana lɛlɔ ku lɛkɛɛ ni, lɛkɛɛ kenye na beekpi.

⁵³Munuu aaagyi anii lɛkana na livele mina Ɔti na ubebunku-mi? Na mmɔ kani ɔdubuti Katɔti batu bekpone limomo lɛni ntulo akpa leevu-anyɔ umene-mi!

⁵⁴Nsu si bébo na békpo béte-mi ni, na Bunweni Kedee Ɔku etemila ammɔ elebo aani kalɛ na Katɔti ɔ́su úse lɛni na ɔdi ka ɔlɛ.”

⁵⁵Ɔmɛni kama ni, Yesu úye bekyuli lisu lɛmmɔ ɔnini, “Bi ɔsu na ɔlɛka biti ligyii ku lɛkɛɛ bibo bɛnii bibeƒie-mi aani si lɛ́ta línye aban lɛlɔ? Lɛ́tina bekyuli ala limeyi biala na Katɔti kakpakɔ na bíteƒie-mi.

⁵⁶Nsu ala amɛni ƒui álɛ lɛni kalɛ na ala ani na básu bése na Bunweni Kedee Ɔku kemmo ébo éte lɛni.” Amu na nwuna batɛyane ƒui békeli bátɔlɔ-nwu kudɔ.

⁵⁷Amu na ama bani néƒie Yesu mmɔ bétiku-nwu bésienku Ɔkpane Unengudi Kaiaƒa kaduli, kesii kani na bakpane benengu ku ɔma benengu ku ɔda bubo ala batinane bása belie.

⁵⁸Petro anwu ɔkpɛ kama buɛɛ na úbavi útéduo kaduli kammɔ kemmo. Útélie kalɔ na bagyumanane bammɔ kudɔ na ɔnu kalɛ na litemi lɛmmɔ lɛdubɔwɔ.

⁵⁹Bakpane benengu bamɛni ku litemi batɛne bani nlie mmɔ ƒui báyɔ ka bawiaku Yesu litemi lɛdi lɛni lɛlɔ na basia na bakɛ-nwu badu.

⁶⁰Nsu ina ka bekyuli pii bébo bábada-nwu kenye muedi ni, bátakɛ lɛla lɛdi. Nkyuli inyɔ badi bébo

⁶¹na básu banii, “Ukyuli ɔmɛni ɔ́su ɔnini, ‘Ndubɔƒɛ Katɔti kakpakɔ. Na emeyi atɛ kama ni, ndubɔsɔku-ka lɛtu.’ ”

⁶²Ɔkpane unengudi ɔ́ta unye na úye Yesu ɔnini, “Eenú etemila ani na baasu na ƒula lɛlɔ mɛni? Bi na ebo na adubɔsu?”

⁶³Nsu Yesu úbile kenye na útasu lɛla lɛdi. Ɔkpane unengudi ɔ́sɔ ɔ́su-nwu ɔnini, “Lɛ́kpali Katɔti mɔɔkya-a nnii su-bu si awɔ ndi Ukyuli Ɔƒunadi ɔni ndi Katɔti Ubidi ɔmmɔ.”

⁶⁴Amu na Yesu údie kenye ɔnini, “Ɛɛn. Awɔ násu, na use lɛni sɔsɔ. Na mɔɔsu-mii nnii uwi klukui kemmo ni, bɛdubɔnu Ukyuli Ɔyawine Ubi ɔmmɔ ka ulie Katɔti Ɔyikune Ƒui kɔdianu. Na bɛdubɔnu ka ɔ́si katɔ ɔdubo na ulɔyɔ kemmo!”

⁶⁵Uwi ɔni na ɔkpane unengudi únu ɔmɛni ni, ɔ́ni nwuna awu ɔ́bwɛ na ɔ́va ɔnini, “Binu enyekpi ani na ɔɔtɛmi! Bɔsɔ buláwia kenye bediene badi lɛnɔ!

⁶⁶Bi ndi bina kasusu?” Bana ƒui bédie kenye banii, “Ɔlɛka badu-nwu kukpi kɔtɔ!”

⁶⁷Amu na bétuo lisuo béwi-nwu anumi na bébo-nwu. Na badi lɛnɔ báƒiɛmi-nwu lɛtugya.

⁶⁸Na béye-nwu banii, “Ukyuli Ɔƒunadi ɔmmɔ na adi? Su-bu ukyuli ɔni nébo-ɔ!”

⁶⁹Amu na Petro ɔmu ulie keyi mmɔ asa na ɔkpane unengudi kabla ɔblane ɔni ndi ulekubi úbo mmɔ na ɔ́su-nwu ɔnini, “Awɔ lɛnɔ ásiaku Yesu ɔni nási Galilea kalɔ lɛlɔ.”

⁷⁰Nsu Petro ɔ́tuala na bekyuli bammɔ ƒui anumi ɔnii, “Ńtenu lɛla lɛni na aasu mɛni kalɔ.”

⁷¹Na ɔ́tɔlɔ mmɔ úténye kaduli kammɔ kayakun. Ulekubi kabla ɔblane ɔbambadi lɛnɔ ɔ́nu Petro na ɔ́su bani nnye mmɔ ɔnii, “Anwu lɛnɔ ɔ́siaku Yesu Nasareni ɔmmɔ.”

⁷²Amu na Petro ɔ́sɔ ɔ́tuala na ɔ́kpali ala ɔnini, “Lɛɛɛgyi ukyuli ɔmmɔ!”

⁷³Uwi útetu asa na bani nnye mmɔ bébo bábasu Petro banii, “Útalɛka eni anii aaadi-ma akɔ unwi. Ɔsika ƒula butemi buudie-ɔ keyi nwaa.”

⁷⁴Amu na Petro ɔ́sɔ ɔ́kpali ala momoomo ɔnini, “Katɔti ɔni-mi kɔtu si ɔkɔ na mɔɔnyi nnii lɛɛɛgyi ukyuli ɔmmɔ.” Kɔnakunwi ni, akɔkɔ úte kenye.

⁷⁵Na Petro únyimo lɛla lɛni Yesu ɔ́su ɔnini, “Asa na akɔkɔ ɔdubute kenye ni, adubɔsu kɔtɛ sɔɔn ka aaagyi-mi.” Anwuɔsu ɔ́lɛ keyi na útéwulo geen.