Read Lelemi Mateo 8 Bible Online

Mateo 8 - Lelemi bible

Mateo 8

¹Uwi ɔni na Yesu ɔ́si ɔ́yu kɔbi kɔmmɔ lɛlɔ ni, bekyuli pii básiaku-nwu kama.

²Amu na ɔnana ɔdi muuƒi ɔlɛgyie úbo úbalɛ akɔnkɔ na nwuna anumi na ɔ́su-nwu ɔnini, “Blɔti! Si aayɔ́ ni, akana na abla-mi sɛɛn.”

³Yesu únene kɔnu útuku-nwu, na ɔ́su-nwu ɔnini, “Mɔɔyɔ́. Lɛlɔ lɛbla-a sɛɛn.” Mmɔ kani ni, ɔlɛ ɔmmɔ ɔ́ba ɔnana ɔmmɔ.

⁴Amu na Yesu ɔ́su-nwu ɔnini, “Nu kaduɛ, na tasu ukyuli ɔdi lɛla lɛdi. Mmomu teesie na eti lɛlɔ atátina Katɔti ɔkpane, na udie-ɔ kenye. Na ete akpala ani na Mose ɔda bubo bɔ́tina. Na ukyuli biala ɔnu ɔti ka ɔlɛ ɔmmɔ ɔ́ba-a sɔsɔ.”

⁵Nwuna kama ka Yesu úduo Kapernaum ni, Romaƒuɔ bekpone unengu ɔdi úbo úbevele-nwu ɔnini,

⁶“Blɔti! Mina kabla ɔblane uuƒi kpakplaa na ɔ́tɛ kaduli ɔni na ulakana bɔta.”

⁷Yesu ɔ́su-nwu ɔnini, “Ndubusie ntábwi-nwu.”

⁸Bekpone unengu ɔmmɔ údie kenye ɔnini, “Blɔti, oowo! Ńtamanku ka ebo mina kaduli. Nsu su litemi lɛdi kani na mina kabla ɔblane ɔmmɔ ɔlɛ ɔdubɔba-nwu.

⁹Ami lɛnɔ ndi ukyuli ɔni nkya benengu badi kalɔ, na bekpone badi lɛnɔ bakya-mi kalɔ. Si lɛ́su ɔdi nnii, ‘Teesie’ ni, uusié. Na si lɛ́su ɔdi lɛnɔ nnii ‘Bo’ ni, uubo. Na si lɛ́su mina kabla ɔblane nnii, ‘Bla ɔmɛni’ ni, ɔɔbla.”

¹⁰Ka Yesu únu ɔmɛni ni, ɔ́bla-nwu kalɛ kadi na ɔ́su bekyuli bani nsiaku-nwu mmɔ ɔnini, “Mɔɔsu-mii geen ka na Israelƒuɔ akɔ muedi ni, ńtanu tɔ bɔƒɔtaadi bɔmɛni udu.

¹¹Mɔɔsu-mii geen ka bekyuli pii badubɔsi ɔƒɛ katukɔ ku kanukɔ bebo Katɔ Ɔga Ɔma limeyi kadikɔ. Badubulie kalɔ na badi ku Abraham ku Isak ku Yakob na mmɔ.

¹²Nsu Katɔti ɔdubɔbɔku Yudaƒuɔ badi bani nka badi bagadine mmɔ utákya kasuudikɔ. Mmɔ na badubuwulo na badu bana anumi.”

¹³Amu na Yesu ɔ́su bekpone unengu ɔmmɔ ɔnini, “Teesie kaduli. Kalɛ na áƒɔ ádi ni, ɔdububo ute-ɔ lɛni.” Na bekpone unengu kabla ɔblane ɔmmɔ ɔlɛ ɔ́ba-nwu uwi ɔmmɔ kemmo kani.

¹⁴Ka Yesu úsie Petro kaduli ni, ɔ́nu ka Petro uleni ɔtɛ uuƒi kpakplaa ɔni na lɛlɔ lɛ́ƒɔ-nwu ogya.

¹⁵Amu na Yesu úƒie-nwu kɔnu ɔ́da na ɔlɛ ɔmmɔ ɔ́ba-nwu kɔnakunwi, na ɔ́ta na ɔ́bla-nwu lɛƒɔ.

¹⁶Na useyi uwi ni, béti bekyuli pii bani na ayu ekpidi eekpóku-ma béboku Yesu. Na ɔ́su lɛlakpa linwi na ɔ́bɔku-nya ɔ́lɛku-ma lɛlɔ kemmo. Na ɔ́bwi bani muuƒi mmɔ ƒui.

¹⁷Ɔ́bla ɔmɛni kalɛ na kenye kani na Katɔti Kenye Udiene Yesaia ɔ́su úse ubo ute lɛni ɔnini, “Anwu ɔlati ɔ́bwi-bu lɛlɛ lɛni na buuƒi ƒui.”

¹⁸Uwi ɔni na Yesu ɔ́nu bekyuli pii bani nnye-nwu kudɔ ni, ɔ́su nwuna batɛyane bammɔ ɔnii baya na beteesie ɛpu ɔmmɔ ɔvi.

¹⁹Ɛpu ɔvi mmɔ ni, ɔda bubo ala ɔtinane ɔdi úbo-nwu kudɔ. Na ɔ́su Yesu ɔnini, “Ala ɔtinane, kesii biala na adubusie ni, ndubɔsiaku-ɔ kama.”

²⁰Amu na Yesu ɔ́su-nwu ɔnini, “Beƒiebuo bebo libu lɛni kemmo na baatɛ, na baasɛ bebo ayu. Nsu Ukyuli Ɔyawine Ubi ni, anwu uuubo katɛnkɔ muedi.”

²¹Na ukyuli bamba ɔdi ɔ́su ɔnini, “Blɔti, masiaku-ɔ. Nsu ya na lɛka busie ntáva mina ɔti.”

²²Yesu údie kenye ɔnini, “Siaku-mi kama. Na aya na bani nli aani bekpine ka bátaƒɔ bátadi ɔsu bataava bana bekpine.”

²³Yesu úduo ɔkɔlɔ ɔdi kemmo na nwuna batɛyane lɛnɔ básiaku-nwu kama.

²⁴Kɔnakunwi ni, ɔƒɛƒɛɛ kpakplaa ɔdi úse kalɔ uukpó na ɛpu ɔmmɔ lɛlɔ. Na uubó ntu teewi ɔkɔlɔ ɔmmɔ kemmo, na ɔɔyɔ́ ɔnyi. Nsu uwi ɔmmɔ ƒui ni, na Yesu anwu ɔtɛ ɔlɛɛ.

²⁵Batɛyane bammɔ bátágyila-nwu na básu banii, “Blɔti, ƒɔ-bu! Bɔdaku bukpi!”

²⁶Mmɔ na Yesu úye-ma ɔnini, “Bi ɔsu na bibo liƒu lɛni? Bina bɔƒɔtaadi bɔsɔ.” Amu na ɔ́ta na ɔ́bɔku ɔƒɛƒɛɛ ku ntu bɔni mɔɔnwanɛ lɛlɔ mmɔ ɔnii bɔda bɔya. Na mmɔ ƒui kábla kpoo.

²⁷Amu na ɔ́bla ukyuli biala kalɛ kadi. Na béye lɛlɔ banini, “Bi? Bútanu ukyuli ɔmɛni udu kudii! Ɔƒɛƒɛɛ ku ntu bɔni mɔɔnwanɛ lɛlɔ muedi buunú-nwu litemi!”

²⁸Ka Yesu útéduo Gadara kalɛkɛ na ɛpu ɔvi ni, nkyuli inyɔ badi na ayu ekpidi eekpóku-ma bási bekyuli kavakɔ mmɔ bábasiaku-nwu. Na ka bana lɛlɔ lɛɛda liƒu geen ɔsu ni, ukyuli ɔdi ulásia ulu ɔmmɔ lɛlɔ.

²⁹Kɔnakunwi ni, báva ku lɛdi momoomo na béye-nwu banii, “Bi na awɔ Katɔti Ubidi aawia-bu kudɔ mɛni? Ébo anii abaka-bu kɔtu bɔni asa na uwi ɔni na Katɔti ɔdubɔtɛku-bu litemi wedu?”

³⁰Amu na amadɔ mmɔ ni, baplakuo pii badi benye baadi.

³¹Mmɔ na ayu ekpidi ammɔ évele Yesu anini, “Si anii aabɔku-bu alɛku ni, na abɔku-bu atákya baplakuo pii bammɔ kemmo.”

³²Mmɔ ni, Yesu ɔ́bɔku-ma ɔnii, “Bɛvi bɛlɛ-ma kemmo.” Anwuɔsu bálɛ-ma kemmo bétéduo baplakuo bammɔ kemmo. Na baplakuo bammɔ békeli báyu kɔbi kɔmmɔ lɛlɔ bátánu béduo ɛpu ɔmmɔ kemmo na békpi.

³³Ɔmmɔ ɔsu ni, baplakuo lɛlɔ banune bammɔ békeli bátɔlɔ bésie ɔma kemmo. Na bátásu ala ani ƒui na alɛku baplakuo bammɔ ku bekyuli bani na ayu ekpidi eekpóku mmɔ lɛlɔ.

³⁴Anwuɔsu ɔma ɔmmɔ bekyuli ƒui bésie banii batásiaku Yesu. Na ka bánu-nwu ni, bévele-nwu ka ɔtɔlɔ bana kalɔ lɛlɔ.