Read Lelemi Marko 16 Bible Online

Marko 16 - Lelemi bible

Marko 16

¹Kadi kégye useyi uwi ɔni na lɛnwunameyi kadi káyu ni, Maria Magdalene ku Maria ɔni ndi Yakobo uni ku Salome bétéye klobo banii batáwɛɛ Yesu ukpine.

²Amu ka kadi kégye Kwasida ɔtanta ni, báta bésie kaƒiɔtɔ kammɔ kudɔ.

³Uwi ɔni na bakɛ bésela ni, béye lɛlɔ banini, “Ɔma na bɔdubɔkɛ na uminime lɛtakpɛ lɛmmɔ udie na kaƒiɔtɔ kammɔ kenye ute-bu?” Béye lɛlɔ ɔmɛni ɔsika lɛtakpɛ lɛmmɔ líbomo geen. Nsu ka bédu mmɔ ni, bánu ka ukyuli ɔdi úuminime lɛtakpɛ lɛmmɔ údie.

⁵Anwuɔsu ka béduo kaƒiɔtɔ kammɔ kemmo ni, bánu okloƒu ɔdi ka ulie kɔdianu kakɛ. Na ɔda ala aƒualadi sɔɔn! Ɔtɔtɔ ɔ́gyu-ma.

⁶Amu na okloƒu ɔmmɔ ɔ́su-ma ɔnini, “Bitayia. Ngyi ka Yesu Nasareni na bɛɛwia, anwu ɔni na bákana bámana ugyii lɛlɔ. Uuubo mɛni! Ɔ́ta uli ngba! Bɛnu! Mɛni ndi likpo lɛni na béti-nwu bákya.

⁷Anwuɔsu biteesie na bitásu nwuna batɛyane ku Petro lɛnɔ bɛnii, ‘Yesu ɔtɔ-mii na Galilea. Mmɔ na bɛdubɔnu-nwu aani kalɛ na ɔ́su-mii úse.’ ”

⁸Ɔmɛni ɔ́bla beleku bamɛni kalɛ kadi, na bálɛ kaƒiɔtɔ kamɛni kemmo ku lɛlɔ bɔtɔ, na békeli bátɔlɔ. Ɔni bakɛ ulu bésela ni, bátasu ukyuli biala lɛla lɛdi, ɔsika liƒu lɛɛda-ma.

⁹Ka Yesu ɔ́ta ɔ́lɛ kaƒiɔtɔ kemmo na Kwasida ɔmɛni lɛdigye ni, ɔ́ka lɛlɔ budie bɔtina Maria Magdalene ɔni lɛlɔ kemmo na ɔ́bɔku ayu ekpidi maatɛ ɔ́lɛku dii.

¹⁰Anwu nésie útásu Yesu bakpana ka Yesu ɔ́ta uwi ɔni kemmo na ama bakya beewulo kɔnyana na nwuna kukpi ɔsu.

¹¹Na ka Maria ɔ́su-ma ɔnii Yesu ɔ́ta uli ngba na ɔ́nu-nwu ni, bátaƒɔ-nwu bátadi.

¹²Ɔmɛni kama ni, Yesu údie lɛlɔ ɔ́tina batɛyane inyɔ ka bakɛ ulu. Bátanu-nwu bátati na kalɔ kesekɔ.

¹³Nsu kama ka bábati ni, básɔ bénwini bátásu bakladi. Nsu bakladi bammɔ bátaƒɔ-ma bátadi.

¹⁴Kukplodi ni, Yesu údie lɛlɔ ɔ́tina nwuna batɛyane leevu-unwi uwi ɔni na belie baadi. Nsu ɔ́dɔnku-ma ɔsika beeebo bɔƒɔtaadi, na bábla atu ɔkplu bágya, na bátaƒɔ bekyuli bani nánu-nwu ka ɔ́ta ɔ́sɔ úbo uli ngba bátadi.

¹⁵Ɔ́su-ma ɔnini, “Biteesie kayawi ƒui na bitákɔ Katɔti litemi buni lɛmɛni lɛsa na bekyuli ƒui akɔ.

¹⁶Ukyuli ɔni náƒɔ litemi buni lɛmɛni ɔ́di na ɔ́ƒɔ ntu bɔkpila ni, Katɔti ɔdubudie-nwu ɔlɛku ekpidi kɔtu bɔni kemmo. Na ukyuli ɔni nátaƒɔ útadi ni, Katɔti ɔdubɔdu-nwu kɔtɔ.

¹⁷Na Katɔti ɔdubute baƒɔtaadine ɔyikun na babla akɔla lidu lidu. Badubɔgya ayu ekpidi na mina lɛnyi kemmo. Badubutemi adi lidu lidu.

¹⁸Na si béƒie kɔlakpi báda iye báni ugyulo ukpidi ɔdi biala ni, ulabla-ma lɛla lɛdi. Si béti bana enu básia balɛne lɛlɔ ni, badubɔkɛ lɛlɔ ɔkplu.”

¹⁹Uwi ɔni na Blɔti Yesu ɔ́tɛmiku-ma mmɔ kama ni, Katɔti úti-nwu úsienku katɔ na útélie keliekɔ kenengudi kani nsiaku Ɔti kadi.

²⁰Nwuna basiakune lɛnɔ bávi kayawi ƒui na básu litemi buni lɛmɛni. Na Blɔti ɔ́kɛnku-ma lɛlɔ na údie ɔ́tina ka nwuna litemi lɛdi litemi geen ɔ́si akɔla lidu lidu lɛni na bátaabla na nwuna ɔyikun kemmo ɔsu.