Read Lelemi Marko 3 Bible Online

Marko 3 - Lelemi bible

Marko 3

¹Nwuna kama ni, Yesu ɔ́sɔ ɔ́tɔlɔ úsie Yudaƒuɔ kasalakɔ. Na mmɔ ni, útánu ukyuli ɔni na kɔnu kunwi kɔ́gogolo-nwu.

²Uwi ɔmmɔ ni, Ƒarisiƒuɔ badi bakya kasalakɔ kammɔ. Na benye baanu si ɔdubɔbwi ɔnana ɔmmɔ na lɛnwunameyi lɛlɔ na bawia-nwu litemi.

³Yesu ɔ́lɔ ɔnana ɔni na kɔnu kunwi kɔ́gogolo-nwu mmɔ ɔnii ubenye bekyuli ƒui anumi.

⁴Amu na únwini anumi ɔ́tina bekyuli bammɔ na úye-ma ɔnini, “Ɔdia ka ukyuli ɔbla lɛbuni na lɛnwunameyi lɛlɔ? Munuu lɛnwunameyi ɔdi limeyi lɛni lɛlɔ na ukyuli ubile lɛla? Ɔdi limeyi lɛni lɛlɔ baaƒɔ́ ngba, munuu ɔdi limeyi lɛni lɛlɔ na beebile ngba?” Nsu bátakana-nwu lɛla lɛdi bɔsu.

⁵Yesu únwini ɔ́nu bana ƒui na kɔnyi kemmo, ɔsika livo líƒi-nwu na bana ukyulikpana kebunku tete ɔsu. Amu na ɔ́su ɔlɛne ɔmɛni ɔnii, “Nene kɔnu boku.” Únene kɔnu. Na kɔnakunwi ni, nwuna kɔnu kɔ́ba-nwu.

⁶Amu na Ƒarisiƒuɔ bammɔ bátɔlɔ na bátása ku Herode lɛkpa badi na básusu Yesu bɔdu lɛlɔ.

⁷Amu na Yesu ku nwuna batɛyane bésie Galilea Ɛpu kudɔ. Na bekyuli lisu pim bani nási Galilea ku Yudea ku Yerusalem ku Idumea ku bani nási Yordan Ketu ɔvi ku bani nási Tiro ku Sidon lɛnɔ básiaku-ma. Ɔsika nwuna akɔla bɔbla búusie ɔgyu kakaaka ƒui, na bekyuli pii baayɔ́ ka beti anumi babanu-nwu.

⁹Lebo lɛmmɔ ka Yesu ɔ́ɔbwi bekyuli pii ɔsu ni, balɛne pii baanwanɛ lɛlɔ ka bebetuku-nwu na lɛlɔ lɛyu-ma ɔkplu. Anwuɔsu Yesu ɔ́su nwuna batɛyane ɔnii bawia ɔkɔlɔ ɔdi bebese ketudɔ kalɛ na si bekyuli bammɔ beemomo taavili ni, na ɔkɔ uduo-nwu kemmo.

¹¹Bekyuli badi bakya bani na ayu ekpidi eli-ma lɛlɔ. Si bánya bánu Yesu ni, beeboku lɛlɔ kalɔ na baava taasu banii, “Awɔ ndi Katɔti Ubi!”

¹²Nsu Yesu ɔ́bala-ma ka bataya bekyuli bati ukyuli ɔni na ɔdi.

¹³Nwuna kama ni, Yesu úsie kɔbi kɔdi lɛlɔ. Na mmɔ ni, ɔ́lɔ nwuna basiakune bani na ɔɔwia.

¹⁴Bekyuli bamɛni bébo-nwu kudɔ na údie leevu-inyɔ na bana akɔ, na úte-ma lɛnyi ɔnii batalane. Ɔ́su-ma ɔnii, “Lídie-mii nnii bɛsiaku-mi uwi biala. Na ndubɔtala-mii na bitátaasu litemi buni.

¹⁵Bɛdubɔgya ayu ekpidi bɔlɛku bekyuli lɛlɔ kemmo.”

¹⁶Nkyuli leevu-inyɔ bani na údie mɛni anyi ndi Simon ɔni na Yesu ɔ́sia lɛnyi ɔnii Petro ku Yakobo ku ɔnwani ɔnamudi Yohane bani ndi Sebedeo bebi ɔni na Yesu úte-ma lɛnyi ɔnii Boanerges ɔni kalɔ ndi ɔnii beetemi ku ɔyikun aani kalɛ na kayaa kabwɛ ogya ku kɔku bonwu. Na bakladi ndi Andrea ku Ƒilipo ku Bartolomeo ku Mateo ku Toma ku Yakobo ɔni ndi Alƒeo ubidi ku Tadeo ku Simon ɔni nási Kana na nka ɔ́ta únye aban lɛlɔ ku Yuda Iskariot ɔni ndubɔkya Yesu kakya.

²⁰Ka Yesu ɔ́si mmɔ ni, ɔ́tɔlɔ úbo kaduli kadi. Na bekyuli pii badi básɔ bébo-ma kudɔ mmɔ. Anwuɔsu ɔ́yu Yesu ku nwuna batɛyane ɔkplu ka bakɛ kuƒi badi muedi.

²¹Ka nwuna lɛlɔ bekyuli bénu ɔmɛni ni, bésie banii batákpanku-nwu besienku kaduli, ɔsika básu banii, “Kuli kemmo muubie-nwu!”

²²Na ɔda bubo ala batinane bani nási Yerusalem básu banii, “Kɔyu kukpidi kɔkya Yesu lɛlɔ kemmo. Na ayu ekpidi ɔtɔnkune Beelsebul néte-nwu ɔyikun asa na ɔɔkana ayu ammɔ bɔbɔku taalɛku bekyuli lɛlɔ kemmo!”

²³Anwuɔsu Yesu ɔ́lɔ-ma na ɔ́tɛmiku-ma na lɛgba kemmo ɔnini, “Dɛ na wabla asa na Satan wabɔku anwu ɔlati walɛku ukyuli lɛlɔ kemmo?

²⁴Si lɛga kadikɔ kadi kéle lɛlɔ akpa akpa na akpa ammɔ eekpóku lɛlɔ ni, lɛga kadikɔ kammɔ kalakana bunye.

²⁵Si ɔtɔ ɔdi bekyuli béle lɛlɔ ati ati na beekpóku lɛlɔ ni, ɔtɔ ɔmmɔ ulakana bunye.

²⁶Anwuɔsu si Satan ɔ́ta unye uukpóku lɛlɔ na nwuna lɛga kadikɔ kéle lɛlɔ akpa akpa ni, lɛga kadikɔ kammɔ kadubɔbwɛ, na nwuna lɛga bɔdi bubo kawɔlɔkɔ.

²⁷“Na sɔsɔ geen ni, ukyuli ɔdi ulakana na weduo ukyuli ɔni mbo ɔyikun ɔtɔ kemmo na uti nwuna ala ɔtɔlɔku. Amu ntu ɔ́ka ɔyikune ɔmɛni buƒie bunyimi asa na wakana-nwu ɔtɔ kemmo buduo buti nwuna ala.

²⁸“Mɔɔsu-mii geen ka Katɔti ɔdubuti alaekpidi biala na bekyuli bábla ku anyikpi biala ani na bálɔ Katɔti ɔkyiɛ-ma.

²⁹Nsu anyikpi ani na ukyuli ɔdi ɔdubɔlɔ Katɔti Kɔyu ni, Katɔti uleti ulakyiɛ-nwu kudi kudii. Ɔsika ɔdubuti likpidi lɛmɛni aani likpidi lɛni na ulayiƒala kudii.”

³⁰Yesu ɔ́su ɔmɛni ɔsika bekyuli bammɔ básu banii kɔyu kukpidi kɔkya anwu Yesu lɛlɔ kemmo.

³¹Uwi ɔmmɔ ni, Yesu banwani ku nwuna uni bébo mmɔ. Kalɛ bekyuli bemomo mmɔ ɔsu ni, bátala ɔtu na nwuna kudɔ ka baawia-nwu.

³²Amu na bekyuli bani náka bámana-nwu mmɔ básu Yesu banini, “Nu, ƒ'ini ku ƒula banwani benye keyi baawia-a banii bo!”

³³Amu na Yesu úye-ma ɔnini, “Ɔma ndi mina uni? Ɔma bene ndi mina banwani?”

³⁴Amu na únwini ɔ́nu bekyuli bani nlie bámana-nwu mmɔ na ɔ́su ɔnii, “Bɛnu, bamɛni ndi mina uni iye mina banwani!

³⁵Ukyuli biala ɔni mɔɔbla Katɔti lɛƒɔyɔ ni, anwu ndi mina ɔnwani ɔnanabi iye mina ɔnwani ulekubi iye mina uni.”