Read Lelemi Marko 8 Bible Online

Marko 8 - Lelemi bible

Marko 8

¹Uwi útetu asa na bekyuli pii badi bábasa mmɔ. Na ka lɛla lɛdi lítebu-ma na badi ɔsu ni, Yesu ɔ́lɔ nwuna batɛyane úboku nwuna kudɔ na ɔ́su-ma ɔnini,

²“Bekyuli bamɛni lɛlɔ lɛɛkywí-mi kaƒɔ, ɔsika báakya-mi kudɔ emeyi atɛ sɔɔn. Na ɔƒɛni ni, balakɛ lɛla lɛni badi.

³Si lɛ́nyonu-ma na bátɔlɔ ni, badubusie batátaayila na ulu. Ɔsika bana badi bási kesii kani nágyu.”

⁴Amu na nwuna batɛyane béye-nwu banini, “Ketele kemmo mɛni ni, wɛ na ukyuli ɔdi ɔdubɔkɛ adila bute bekyuli bamɛni na badi bemo?”

⁵Mmɔ na Yesu úye-ma ɔnini, “Bodobodo ɛlɛ na bɛda?” Básu-nwu banini, “Bodobodo maatɛ na bɔda.”

⁶Yesu ɔ́su bana ƒui ɔnii basɔ belie kalɔ. Amu na úti bodobodo maatɛ ɔmmɔ, na ɔ́gya Katɔti enu, na ɔ́bwɛ-nwu kɔkɛ kɔkɛ, na úti úte nwuna batɛyane ɔnii beti bete bekyuli bamɛni ƒui. Ama lɛnɔ béti béle béte-ma.

⁷Ka bánu banii kɔkpaku blii kɔdi lɛnɔ kuse ni, Yesu úti aku lɛnɔ na ɔ́gya enu. Na úti-ku úte nwuna batɛyane ɔnii bele aku lɛnɔ bete-ma.

⁸Bekyuli bamɛni ƒui bádi na bémo. Na banana lɛti bumomo bɔdubɔbla mpim ine. Amu ka bádi báwɔlɔ ni, batɛyane bamɛni bála bodobodo kɔkɛ kɔni nébu ƒui na kúyi kɔgyigyɛ maatɛ. Nwuna kama ni, Yesu údie bekyuli bamɛni ƒui ulu na bátɔlɔ.

¹⁰Amu na Yesu ku nwuna batɛyane béduo ɔkɔlɔ kemmo na bátɔlɔ bésie Dalmanuta kalɔ lɛlɔ.

¹¹Ƒarisiƒuɔ badi bébo Yesu kudɔ na bakya beeye-nwu etemila taakɔku-nwu taanu. Anwuɔsu básu-nwu banii ɔbla akɔla adi na banu ka Katɔti kudɔ na ɔ́si.

¹²Nsu Yesu údumo geen, na úye-ma ɔnini, “Bi ɔsu geen na ɔmwi bekyuli baawia akɔla bataanu? Oowo, mɔɔsu-mii ka lɛɛɛdubo akɔla ani udu na bɛɛwia mɛni bɔbla bɔtina-mii!”

¹³Amu na ɔ́tɔlɔ-ma kudɔ, na ɔ́sɔ útéduo ɔkɔlɔ kemmo na ɔ́via úsie ɛpu ɔmmɔ ɔvi ɔni ngye.

¹⁴Nwuna batɛyane bamɛni báyiƒala bodobodo ɔdi bɔwia bɔda, anwuɔsu bodobodo unwi pɛ na bada na ɔkɔlɔ kemmo mmɔ.

¹⁵Amu na Yesu ɔ́su-ma ɔnini, “Binye kagyumana na bɛnu kaduɛ na Ɔga Herode ku Ƒarisiƒuɔ bɔnyii bɔni na baakya bodobodo kemmo na uuƒu lɛlɔ.”

¹⁶Amu na ama lɛti bákya bátaatɛmiku lɛlɔ taasu banini, “Ɔni na bɔɔɔda bodobodo pii ɔdi ɔsu na ɔɔsu ɔmɛni yoo?”

¹⁷Nsu ka Yesu ɔ́ti litemi lɛni na baasu ɔsu ni, úye-ma ɔnini, “Bi ɔsu na bɛɛtɛmi taasiku bodobodo tada lɛlɔ? Ku ɔƒɛni ni, bilánu na bilenu tɔ kalɔ? Bina atu ebo ɔkplu bɔdi!

¹⁸Bibo anumi, nsu bilánu! Bibo atu, nsu bilenu!

¹⁹Bítanu uwi ɔni na lɛ́ƒɛ bodobodo ɛlɔ líte nkyuli mpim ɛlɔ na bádi? Kɔgyigyɛ ɛlɛ na kɔkɛ wɛlɛ wɛlɛ kɔni nébu kúyi?” Básu-nwu banii, “Kɔgyigyɛ leevu-inyɔ.”

²⁰Yesu ɔ́sɔ úye-ma ɔnini, “Na uwi ɔni na lɛ́ƒɛ bodobodo maatɛ líte nkyuli mpim ine ni, kɔkɛ wɛlɛ wɛlɛ kɔni nébu ni, kɔgyigyɛ ɛlɛ na kúyi?” Básu-nwu banii, “Maatɛ.”

²¹Amu na úye-ma ɔnini, “Asa na bítenu tɔ ukyuli ɔni na ndi kalɔ?”

²²Ka bésie bétédu Betsaida ni, bekyuli badi béti ɔnumbwɛne ɔdi béboku Yesu na bévele-nwu banii utuku-nwu.

²³Yesu ɔ́da ukyuli ɔmmɔ kɔnu na útiku-nwu ɔ́lɛku ɔma kemmo. Ka útuo lisuo úwi ukyuli ɔmmɔ anumi lɛlɔ na úti enu ɔ́sia-nwu lɛlɔ ni, úye-nwu ɔnini, “Aanu lɛla lɛdi?”

²⁴Amu na ukyuli ɔmɛni ɔ́talaku anumi ɔ́nu katɔ na ɔ́su ɔnini, “Ɛɛn, mɔɔnu bekyuli, nsu bese aani egyii. Nsu akɛ eesié taavi.”

²⁵Amu na Yesu ɔ́sɔ útuku-nwu anumi. Uwi unyɔdi ɔmɛni kemmo ni, ukyuli ɔmmɔ úbimi anumi kaduɛ na nwuna anumi ábla-nwu nwaa na ɔɔnu lɛla biala kaduɛ!

²⁶Amu na Yesu údie-nwu ulu ɔnii uteesie kaduli, nsu ɔsɔ utavi ɔma ɔni kemmo na bási bébo mmɔ.

²⁷Ɔmmɔ kama ni, Yesu ku nwuna batɛyane bátɔlɔ mmɔ na bésie akpaklɔ ani nkya Kaesarea Ƒilipi kudɔ. Na ka bákɛ ulu ni, Yesu úye-ma ɔnini, “Bɛsu-mi ukyuli ɔni na bekyuli baasu ka ndi?”

²⁸Básu-nwu banini, “Badi baasu banii awɔ ndi Ntu Ɔkpilane Yohane. Na badi lɛnɔ baasu banii awɔ ndi Elia. Na babambadi lɛnɔ baasu banii adi Katɔti kenye bediene bammɔ kemmo unwi.”

²⁹Amu na Yesu ɔ́sɔ úye-ma ɔnini, “Na amii nɔɔ? Ɔma na bɛɛkali ka ami ndi?” Petro ɔ́su-nwu ɔnini, “Awɔ ndi Kristo ɔmmɔ.”

³⁰Amu na Yesu úbo-ma ɔda ka batasu ukyuli ɔdi biala lɛla lɛni bagyi básiku-nwu lɛlɔ mɛni.

³¹Amu na Yesu úse kalɔ ɔɔtina nwuna batɛyane ala adi. Ɔ́su-ma ɔnini, “Ɔlɛka Ukyuli Ɔyawine Ubi ubo abi pii na ɔma benengu ku bakpane benengu ku ɔda bubo ala batinane enu kemmo na bedumi-nwu. Badubɔdu-nwu, nsu na limeyi lɛtɛdi lɛlɔ ni, ɔdubɔta ulie ngba.”

³²Ɔ́su-ma ɔmɛni nwaa, na bénu kalɔ. Amu na Petro ɔ́kpanku-nwu úsienku kɔƒɛlɛ na ɔ́dɔnku-nwu.

³³Nsu ka Yesu úbo únwini na ɔ́nu nwuna batɛyane ni, ɔ́dɔnku Petro ɔnini, “Satan, gyu lɛgba na mina kudɔ!” Ɔ́sɔ ɔ́su ɔnini, “Aláwia ala ani na Katɔti ɔɔwia, mmomu aawia bayawine ayɔla kani!”

³⁴Amu ka Yesu ɔ́lɔ bekyuli lisu lɛmmɔ ku nwuna batɛyane úboku nwuna kudɔ ni, ɔ́su-ma ɔnini, “Si ukyuli ɔdi ɔɔyɔ́ ka ɔsiaku-mi kama sɔsɔ ni, ɔlɛka udie nwuna lɛlɔ atu, na ubo abi na ɔsiaku-mi kama.

³⁵Ɔsika ukyuli biala ɔni mɔɔwia ka ɔƒɔ nwuna lili ngba ute lɛlɔ ni, ɔdubɔyila-mu. Na ukyuli biala ɔni nányonu nwuna ngba na ami ɔsu ku litemi buni lɛmɛni ɔsu ni, ɔdubɔkɛ ngba geen.

³⁶Bi kɔsia na ukyuli ɔdubɔkɛ si ɔ́kɛ kayawi ala ƒui na ɔ́yila ngba geen bɔmmɔ?

³⁷Munuu bi na ukyuli ubo uti ɔvumana na ɔkɛ ngba geen bɔmmɔ?

³⁸Ɔƒɛni ni, bekyuli pii baabla ekpidi na beenwíni kama taakya Katɔti. Anwuɔsu si ami ku mina ala ani mɔɔtina ƒui ékpo ukyuli ɔdi kɔƒa ni, anwu lɛnɔ ɔdubukpo ami Ukyuli Ɔyawine Ubi kɔƒa uwi ɔni na mebo ku Katɔti batu kedee na Katɔti ɔmmɔ bukeye ƒui kemmo.”