Read Lelemi Luka 11 Bible Online

Luka 11 - Lelemi bible

Luka 11

¹Limeyi lɛdi ni, Yesu ɔkya likpo lɛdi ɔɔkpali katɔ. Ka ɔ́wɔlɔ ni, nwuna batɛyane akɔ unwi ɔdi úbo-nwu kudɔ, na ɔ́su-nwu ɔnini, “Ati, tina-bu kalɛ na butaakpali katɔ aani kalɛ na Yohane ɔ́tina nwuna batɛyane.”

²Amu na Yesu ɔ́su-nwu ɔnini, “Si bɛɛkpali katɔ ni, na bɛsu bɛnii, “ ‘Ati, balɔ-ɔ lɛnyi buni. Ƒula lɛga kadikɔ kebo-bu akɔ. Babla ƒula lɛƒɔyɔ na kalɔ lɛlɔ aani kalɛ na use na katɔ.

³Te-bu bula limeyi adila limeyi ndi limeyi.

⁴Na eti bula alaekpidi akyiɛ-bu, ɔsika abu lɛnɔ buuti taakyiɛ ukyuli biala ɔni mɔɔƒiɔ́-bu. Na taya na buduo bukpoku taanu kemmo. Na edie-bu alɛku alaekpidi akɔ.’ ”

⁵Amu na Yesu ɔ́su nwuna batɛyane ɔnini, “Si banii bina akɔ ɔdi úsie nwuna ɔkpana ɔdi kudɔ usien ntɛ útásu-nwu ɔnii, ‘Ɔkpana, vo-mi bodobodo ɛtɛ ɔdi,

⁶ɔsika mina ɔkpana ɔdi ɔ́si ulu úbeduo-mi ɔƒɛni kani. Na liiibo lɛdila lɛdi na lite-nwu!’

⁷“Na banii ƒula ɔkpana ɔmmɔ ɔ́su-ɔ ɔnii, ‘Tebete-mi lɛƒɛda lɛdi! Ami ku mina bebi bɔ́ɔtɛ na bɔ́kalɛ ɔtɔ. Nsɔ lɛɛɛdubo bɔkana bɔta ɔƒɛni bubete-ɔ lɛla lɛdi.’

⁸Si úbo úte lɛni ni, bi na adubo bɔbla? Mɔɔsu-ɔ nnii si nka kɔkpana kenye lɛti ɔsu ni, ulata. Nsu kalɛ na enye eevele-nwu taasia kama ɔsu ni, ɔdubɔta na ute-ɔ lɛla biala lɛni na aawia.

⁹“Anwuɔsu mɔɔsu-mii nnii bivele Katɔti na ɔdubuti ute-mii, bɛwia na bɛdubɔkɛ, bibo kɔnu kegbuta na ɔdubɔlɛmi ute-mii.

¹⁰Ɔsika ukyuli biala ɔni muuvele Katɔti ni, uute-nwu. Na ukyuli biala ɔni mɔɔwia lɛla lɛdi ni, ɔɔkɛ́-ni. Na ukyuli biala ɔni muubó kɔnu kegbuta ni, Katɔti ɔɔlɛmi teete-nwu.

¹¹“Na amii bani ndi bebi bati ni, bute na ɔdi ɔdubuti kɔlakpi ute ubidi si úye-nwu kabɛ?

¹²Munuu, katamlukpa na ɔdubuti ute-nwu si úye-nwu akɔkɔ lɛvala?

¹³Ina ka bɛdi alaekpidi bablane ni, bɛgyi kalɛ na biti ala abuni bite bina bebi. Amu na Ati ɔni nkya katɔ nɔɔ? Bi ɔsu na uleti nwuna Kɔyu ulete bekyuli bani muuvele-nwu?”

¹⁴Uwi ɔdi ni, Yesu ɔkya ɔɔgyá kɔyu kɔdi na kulákana butemi. Amu ka kɔyu kɔmmɔ kɔ́vi kɔ́lɛ ukyuli ɔmmɔ lɛlɔ kemmo ni, ukyuli ɔmmɔ úse kalɔ ku butemi. Ɔmɛni ɔ́bla bekyuli bani nnye mmɔ dɛye dɛye.

¹⁵Nsu bana akɔ badi básu banini, “Ayu ekpidi ƒui unengu ɔni baalɔ banii Beelsebul muute-nwu ɔyikun ɔmmɔ ɔnii utaagya-ma taalɛku.”

¹⁶Na babambadi lɛnɔ báyɔ ka bakywɛ Yesu kakpagyuɛ ɔsu básu-nwu banii ɔbla akɔla adi na uti udie ɔtina ka Katɔti náƒuna-nwu.

¹⁷Nsu Yesu ɔ́ti lɛla lɛni na badanku na bana kasusu kemmo. Anwuɔsu ɔ́su-ma ɔnini, “Kalɔ kani muule lɛlɔ akpa akpa na beenye teekpoku lɛlɔ ni, kalɔ kammɔ kelétu uwi. Na kaduli kenwi bekyuli bani muule lɛlɔ na beekpóku lɛlɔ ni, bugyingya na beegyingya.

¹⁸Anwuɔsu si Satan lɛga kadikɔ kebo akpa akpa ani muukpóku lɛlɔ ni, dɛ na lɛga kadikɔ kammɔ kadubunye? Bɛɛsu ka mɔɔgyá ayu ekpidi taalɛku ka Beelsebul uute-mi ɔyikun ɔnii mbla lɛni ɔsu.

¹⁹Na si Beelsebul lɛlɔ na mɔɔgyá-ma ni, ɔma lɛlɔ na bina basiakune ama baasia taagya ayu ekpidi taalɛku bekyuli lɛlɔ kemmo? Amii alati bina basiakune muudie taatina-mii ka bɛɛnyi ɔkɔ.

²⁰Oowo! Katɔti ɔyikun kemmo mmomu na mɔɔgyá ayu ekpidi taalɛku. Na ɔmɛni uudie taatina-mii nwaa ka ni, Katɔti lɛga kadikɔ kéebo kébeduo-mii kudɔ.

²¹“Si ɔyikune ɔdi ɔ́klibi nwuna ekpola na unye ɔɔgyumana nwuna kaduli ni, agyi anii nwuna akɛla adi alayii.

²²Nsu si ukyuli ɔni mbo ɔkplu utulo-nwu úbo úbekpoku-nwu na ɔ́di-nwu lɛlɔ ni, uuƒie nwuna ekpola ani lɛlɔ ɔ́sia anu taaƒɔ na anwu ku nwuna bakpana beti ukyuli ɔmmɔ akɛla ani na béyu bele.

²³“Ukyuli ɔni neeenyeku-mi ni, agyi anii ɔ́ta únye-mi lɛlɔ geen. Na ukyuli ɔni neeebunku-mi na bɔsala ni, agyi anii bugyingya na uugyingya.

²⁴“Si kɔyu kukpidi kɔ́vi kɔ́lɛ ukyuli lɛlɔ kemmo ni, kɔɔkɛ taavi ekpo ekpo ani nákwii taawia kesii kani na kulie. Na si útakɛ kadi ni, ɔɔsu lɛlɔ ɔnii, ‘Ndubɔsɔ linwini lisie mina kaduli kani na lɛ́tɔlɔ mmɔ.’

²⁵Anwuɔsu ɔɔsɔ teesie taatánu ka bákpala ɔtɔ ɔmmɔ kemmo sɛɛn na béni ala ƒui.

²⁶Ɔmmɔ ɔsu ni, ɔɔsɔ teenwini teesie na utákpanku ayu ekpidi maatɛ ani mbo kalala ntulo-nwu na bebo bebelie mmɔ. Na kawɔlɔkɔ ni, ukyuli ɔmmɔ ablala eebie teetulo kalɛ na úse kudeedi muedi.”

²⁷Uwi ɔni na Yesu ɔ́su ala amɛni ni, uleku ɔdi ɔ́va ku lɛdi momoomo na bekyuli akɔ mmɔ na ɔ́su ɔnini, “Lɛlɔ lɛyɔ uleku ɔni náwɔ-ɔ na úte-ɔ lɛnyi na ányimi!”

²⁸Amu na Yesu údie kenye ɔnini, “Bekyuli bani muunú Katɔti litemi na baabla taasiaku-ni lɛlɔ mmomu na lɛlɔ lɛyɔ!”

²⁹Amu ka bekyuli bammɔ beemomo Yesu kudɔ teebu ni, úsie anumi na ɔ́su-ma ɔnini, “Bɛnu kalɛ na ɔmwi limeyi bekyuli bebo likyulikpi! Akɔla budie bɔtina na baawia banu, nsu balanu budie bɔtina bɔdi uti utulo Yona bɔdi.

³⁰Kalɛ kani na Katɔti Kenye Udiene Yona ɔdi likposela ute Niniweƒuɔ ni, lɛni kani na Ukyuli Ɔyawine Ubi lɛnɔ wenwini likposela wete ɔmwi limeyi bekyuli.

³¹Na litemi bɔtɛ limeyi ni, Uleku Ɔga ɔni nási kada kakɛ ɔdubɔta unye na ubo-mii lɛnimi enwu, ɔsika ɔ́ta ɔ́si nwuna kalɔ úsie ɔgyu kakaaka ɔnii úténu Ɔga Salomo lɛnunda ala bɔtina. Nsu mɔɔsu-mii nnii ukyuli ɔni ntulo Salomo ɔkya mɛni.

³²Niniweƒuɔ badubɔta benye na bebo-mii lɛnimi enwu na litemi bɔtɛ limeyi. Ɔsika uwi ɔni na Yona ɔ́su-ma Katɔti litemi ni, bávumana udu na bénwini bana ekpidi kudɔ. Nsu mɔɔsu-mii geen ka ni, ukyuli ɔdi ɔkya-mii akɔ mɛni na utulo Yona!

³³“Ukyuli ɔdi ulátu asogya na uuti taabɛla iye ubi-nwu ala. Mmomu buti na uuti taasia likpo lɛni na bekyuli bani muuduo mmɔ banu nwaa.

³⁴Buse na ukyuli anumi ese aani asogya ute nwuna ɔlɔna. Si anumi aanu-ɔ kaduɛ ni, awɔ ukyuli umodi ɔmmɔ ni, use-ɔ nwaa ɔ́ka ɔ́mana. Nsu si ƒula anumi aaadia ni, agyi anii awɔ ukyuli ɔmmɔ akya lɛdisa kemmo.

³⁵Anwuɔsu sia lɛlɔ anu na ati ka bukeye bɔni na bɔkya-a lɛlɔ kemmo bɔɔɔdi lɛdisa.

³⁶Si bukeye bɔ́ƒɔ-ɔ lɛlɔ ƒui na ƒula kakɛ kadi kaaakya lɛdisa kemmo ni, agyi anii kesii biala kadubo bukeye kalɛ kani na si asogya ɔɔda na nwuna bekeye buuwi-ɔ na use kalɛ.”

³⁷Uwi ɔni na Yesu ɔ́wɔlɔ butemi ni, Ƒarisini ɔdi ɔ́lɔ-nwu bɔdi na nwuna kaduli. Amu na úsie útélie kalɔ na ɔtɔ kemmo na baadi.

³⁸Ɔ́bla Ƒarisini ɔmmɔ dɛye dɛye ka ɔ́nu ka Yesu útaƒɔ kɔnu kalɛ na ɔdi ɔmmɔ ɔɔtina asa na úse kalɔ ku bɔdi.

³⁹Anwuɔsu Blɔti ɔ́su-nwu ɔnini, “Ɔƒaani ni, amii Ƒarisiƒuɔ bɛɛƒɔ bina akyami ku lɛɛƒɛɛ kama, nsu bina lɛlɔ kemmo geen anwu ni, likyulikpi ku kalala bɔbla bɔ́ƒɔ-ni ƒui.

⁴⁰Badɔlɔdi! Ɔɔɔdi Katɔti ɔmmɔ kani na ábla ala ƒui kemmo ku kama yoo?

⁴¹Biti ala ani ƒui nkya bina akyami ku lɛɛƒɛɛ kemmo mmɔ bite bawabane kalɛ na bina lɛla biala lɛbla sɛɛn.

⁴²“Bɔbuɛ muute amii Ƒarisiƒuɔ! Biiti bina edula lɛkpa leevudi ku kevoma kutu akyala ƒɛƒɛɛ aani evete lidu lidu teete Katɔti. Nsu biiní ka utalɛka bɛnu bekyuli anumi bɛbla ala, na bilayɔ Katɔti lɛnɔ. Amɛni na ɔdi ka bɛbla bibunku ala ani na bɛdaku, na ɔɔɔdi ka bɛda ɔdi bise.

⁴³“Bɔbuɛ muute amii Ƒarisiƒuɔ! Ɔsika bɛɛwia ka bilie kuliekɔ kunengudi na bina kasalakɔ. Na bɛɛwia ka bekyuli bataakya-mii kenye ku ɔbu na kuyeya.

⁴⁴“Bɔbuɛ muute-mii, ɔsika bise aani kɔƒiɔtɔ kɔni na bétese-ku likpo, na bekyuli beesié taavi-ku lɛlɔ ɔsika baaagyi.”

⁴⁵Amu na ɔda bubo ala batinane akɔ unwi ɔ́su-nwu ɔnini, “Ala ɔtinane, si ásu ɔmɛni ni, eedumi abu lɛnɔ.”

⁴⁶Mmɔ na Yesu údie kenye ɔ́su-nwu ɔnini, “Bɔbuɛ muute amii ɔda bubo ala batinane lɛnɔ. Etila ani na bekyuli balakana buti ni, anya bɛɛtɛ taasia bekyuli kama. Na bilábla kasusu bɛnii biibunku-ma na bakana etila ammɔ buti.

⁴⁷“Bɔbuɛ muute-mii geen, ɔsika bɛɛtú kɔƒiɔtɔ kɔbuni teete Katɔti kenye bediene. Nsu Katɔti kenye bediene bammɔ geen na bina bati kuuku bádu.

⁴⁸Na amii alati bɛɛƒɔ́ ɔmɛni enu ka lɛla lɛni na bina bati bammɔ bábla lɛdia-mii. Ama bádu Katɔti kenye bediene na amii bɛ́tu bana kɔƒiɔtɔ.

⁴⁹Ɔmɛni ɔsu na Katɔti lɛnunda lɛ́su lɛnii, ‘Ndubɔtala Katɔti kenye bediene ku batu lɛkya-ma na badubɔdu badi na badubukpoku bakladi.’

⁵⁰Anwuɔsu ɔmwi limeyi bekyuli ƒui ni, badubo-ma kɔtu bɔni na Katɔti kenye bediene bani ƒui na bádu ɔ́si kayawi kamɛni kalɔ kesekɔ ƒui ɔsu.

⁵¹Ɔ́si ɔni bádu Abel úbedu Sakaria ɔni na bádu na lɛkpabi ku kesii kani na baalɔ banii likpo kedee ntɛ. Lɛni geen mɔɔsu-mii ka ni, Katɔti ɔdubo ɔmwi limeyi bekyuli kɔtu bɔni na bana ƒui ɔsu!

⁵²“Bɔbuɛ muute amii ɔda bubo ala batinane! Ɔsika ɔtɔ ɔni kemmo na lɛnunda lɛkya ni, bɛ́kalɛ kayakun kammɔ bíse. Nsu amii alati bini bɛnii bileduo. Na biitile bekyuli bamba bani mɔɔwia beduo lɛnɔ kuƒi.”

⁵³Ka Yesu ɔ́tɔlɔ likpo lɛmmɔ ni, Ƒarisiƒuɔ ku ɔda bubo ala batinane bese kalɔ ku Yesu litemi lɛmmɔ lɛlɔ kɔnyi buti, na beedie-ni bɔƒiɔ taasu ala lidu lidu.

⁵⁴Na bakya baawia ulu ɔni lɛlɔ na basia bakya-nwu litemi kenye na ɔbla likpidi lɛdi.