Read Lelemi Luka 2 Bible Online

Luka 2 - Lelemi bible

Luka 2

¹Na uwi ɔmmɔ kemmo ni, Ɔga Unengudi Kaesare Augusto úte ɔyikun ɔnii benweni bekyuli bani ƒui nkya Roma lɛga bɔdi kalɔ anyi.

²Na bekyuli anyi bunweni budeedi bɔmɛni kemmo ni, aban unengu ɔni baalɔ banii Kirenio mɔɔdi Siria kalɔ lɛlɔ.

³Anwuɔsu ukyuli biala úsie nwuna ɔma úténweni lɛnyi.

⁴Amu na Yoseƒ lɛnɔ ɔ́ta ɔ́si Nasaret ɔma na Galilea kalɔ lɛlɔ úsie Betlehem na Yudea kalɔ lɛlɔ kesii kani na báwɔ Ɔga Dawid. Yoseƒ úsie mmɔ ɔsika ɔdi Dawid kaba kemmo ubi.

⁵Útiku Maria ɔni na bévele béte-nwu na ɔda kaƒɔ lɛnɔ.

⁶Na uwi ɔni na bakya Betlehem mmɔ ni, uwi úbedu Maria ka ɔwɔ.

⁷Ɔ́wɔ nwuna ubi ɔnanabi udeedi na ɔtɔ kakɛ kani na bebuo batɛ. Na únyimi-nwu ɔ́kya kɔdi kemmo, na úti-nwu ɔ́va lɛla lɛni kemmo na bebuo bammɔ baadi, ɔsika kakyakɔ kadi kasɔ keeebo na baƒɔ keduokɔ.

⁸Amu na likpo lɛmmɔ na kalɔ kammɔ lɛlɔ ni, baƒonu badane badi bakya baanu bana bebuo lɛlɔ usien ƒui.

⁹Katɔti ɔtu ɔdi ɔ́da ɔ́lɛ-ma lɛlɔ na Unwoti bukeye bɔdi búkeye búbewi-ma lɛlɔ. Ɔmɛni ɔsu báyia geen,

¹⁰nsu Katɔti ɔtu ɔmmɔ ɔ́su-ma ɔnini, “Bitayia. Líboku-mii linyesia lɛbuni lɛni ndubuti lɛlɔyɔ ku ebiti geen ute bekyuli ƒui.

¹¹Na ɔmwi limeyi lɛmɛni kani lɛlɔ ni, báwɔ Ɔƒɔne ɔni ndi Blɔti Kristo béte-mii na Ɔga Dawid ɔma kemmo.

¹²Na lɛla lɛni na bɛdubuti bɛnu bɛti ni, ani ndi ka bɛdubɔnu ubiwɔ ɔni bényimi bákya kɔdi kemmo na ɔtɛ bebuo kadikɔ.”

¹³Kɔnakunwi ni, Katɔti batu lɛkpa bonwu lɛdi lɛ́si kayaa lɛ́da lɛ́lɛ-ma lɛlɔ na líbebunku ɔtu ɔmɛni na bakya beemwi Katɔti banii,

¹⁴“Ɔbu ku bumwi ute Katɔti na katɔ kakaaka ƒui, na keyi buɛɛ kasiaku bayawine ƒui bani na Katɔti ɔɔyɔ́!”

¹⁵Na uwi ɔni na Katɔti batu bamɛni bátɔlɔ-ma kudɔ na básɔ bénwini bésie katɔ ni, baƒonu badane bamɛni básu lɛlɔ banii, “Bɛya na busie Betlehem butánu ala ani nálɛ na Unwoti údie ɔ́tina-bu mɛni.”

¹⁶Amu na bábabla bésie na bátánu Maria ku Yoseƒ ku ubiwɔ ɔni ntɛ bebuo kadikɔ mmɔ.

¹⁷Na ka bánu-nwu lɛni ni, básu ala ani ƒui na Katɔti ɔtu ɔmmɔ ɔ́su-ma ɔ́si ubi ɔmmɔ lɛlɔ.

¹⁸Amu na bekyuli bani ƒui nénu baƒonu badane bamɛni etemila ni, ɔ́bla-ma kalɛ kadi.

¹⁹Nsu Maria únyimo ala amɛni ƒui, na úti-nya lɛlɔ kasusu úsie ɔgyu.

²⁰Amu na baƒonu badane bammɔ básɔ bénwini na beemwi Katɔti na ala ani ƒui na bánu ku ani bénu lɛnɔ lɛlɔ, ɔsika ana ƒui ese pɛpɛɛpɛ kalɛ kani na Katɔti ɔtu ɔmmɔ ɔ́su-ma.

²¹Na emeyi maane kama ka uwi úbedu ka bekulo ubi ɔmmɔ lego ni, básia-nwu lɛnyi banii Yesu aani kalɛ kani na Katɔti ɔtu ɔmmɔ ɔ́su úse asa na badubɔda-nwu kaƒɔ.

²²Amu na uwi úbedu ka Yoseƒ ku Maria babla lɛlɔ bɔbla sɛɛn ɔdi aani kalɛ na Mose ɔda bubo bɔɔtina kenye. Na béti ubiwɔ ɔmmɔ lɛnɔ bésienku Yerusalem banii beeti-nwu bete Unwoti.

²³Lɛni na bénweni bákya Katɔti ɔda bubo ɔku kemmo banii, “Ɔnanabi udeedi biala ku ebuo ɔgyani udeedi biala ni, ɔdi ka bedie-nwu bese bete Unwoti.”

²⁴Na bésie bátábla akpala béte Unwoti, ɔsika ɔda bubo bɔmmɔ bɔ́tina ka beti babloduma inyɔ iye bamangbɛ inyɔ bakpa bete-nwu.

²⁵Na uwi ɔmmɔ kemmo ni, ɔnana ɔdi baalɔ banii Simeon ɔkya Yerusalem. Na ɔdi ukyuli ɔbuni ɔni na ɔɔyia Katɔti na unye ɔɔnu ulu ute Israel bɔƒɔ. Na Katɔti Kɔyu kɔsiaku-nwu

²⁶na kúse-nwu kayi ka ulekpi wetédu lebo lɛni na ɔ́nu ka báwɔ Ukyuli Ɔƒunadi ɔni kenye na Katɔti ɔ́su úse.

²⁷Amu na Kɔyu kɔmmɔ kɔ́tɔnku Simon kúsienku Yudaƒuɔ kakpakɔ mmɔ. Na ka bawɔne bamɛni béti Yesu ubiwɔ béboku banii bababla ala ani ƒui na ɔdi ka babla bete-nwu na ɔda bubo bɔmmɔ kenye ni,

²⁸Simon ɔ́ƒɔ ubiwɔ ɔmmɔ ɔ́da, na ɔ́gya Katɔti enu ɔnini,

²⁹“Unwoti, ɔƒɛni ni, ka ásia ƒula linyese anu ɔsu ni, akana na edie ami, ƒula kabla ɔblane, ulu na nteesie ku keyi buɛɛ.

³⁰Ami ɔlati mina anumi ánu Ɔƒɔne

³¹ɔni na áya na úbo na kadi bekyuli ƒui anumi.

³²Ɔdi bukeye bɔni ndubudie ƒula lɛyɔla keyi ute bekyuli bani naaadi Yudaƒuɔ. Na ɔdubuti ɔbu uboku ƒula kadi bekyuli Israelƒuɔ akɔ.”

³³Ala ani na Simon ɔ́su mɛni áya na ɔ́bla Yoseƒ ku Maria dɛye dɛye.

³⁴Na Simon úte-ma kusɛ kusɛ na ɔ́su Maria ɔnini, “Ubi ɔmɛni ɔdi Katɔti Ukyuli Ɔƒunadi. Na ɔdi bɔƒɔ iye bɔyii ute Israelƒuɔ pii na kalɛ na báƒɔ-nwu kenye. Ɔdi bɔnu bɔti bɔni nási Katɔti kudɔ na bekyuli pii badubɔta benye-nwu lɛlɔ.

³⁵Na ɔdubo bekyuli bamɛni kasusu kani nábɛ keyi budie. Na ɔkɛ ɔmɛni ɔsu ni, adubunu ɔlɛ aani kalɛ na kewii kaatu ukyuli kayi.”

³⁶Amu na uleku ɔdi ɔni ndi Katɔti kenye udiene ɔkya mmɔ na baalɔ-nwu banii Hana. Na nwuna ɔti Ƒanuel ɔ́si Aser kaba kemmo. Akwa maatɛ kani na úlie kɔgya asa na ɔgyani úkpi. Na ɔdi ukpinele ɔni na ɔ́ɔbi lɛlɔ geen. Ɔbla akwa liti ku avlaatɛ-ine sɔɔn mɛni. Uusié Yudaƒuɔ kakpakɔ mmɔ uwi ndi uwi teetémwi Katɔti usien ku ɔƒɛ na ɔɔkpali katɔ na uulie kɔka lɛnɔ.

³⁷

³⁸Uwi ɔmmɔ kani kemmo ni, anwu lɛnɔ úbo na úti linugya úte Katɔti, na útemi ɔ́siku ubi ɔmmɔ lɛlɔ úte bekyuli bani ƒui nnye baanu Katɔti ulu ka waƒɔ Yerusalem.

³⁹Na ka Yoseƒ ku Maria báwɔlɔ bana ɔdi bɔbla aani kalɛ na Katɔti ɔda bubo ɔku ɔ́tina kalɛ ni, bénwini bésie bana ɔma Nasaret na Galilea kalɔ lɛlɔ.

⁴⁰Ubi ɔmmɔ ɔ́lɛ lili na ɔ́kɛ lɛlɔ ɔkplu, na ɔ́da anu geen. Na nwuna lɛlɔ lɛ́da Katɔti kubiti.

⁴¹Lɛkwa ndi lɛkwa ni, Yesu bawɔne beesié Yerusalem taatádi limeyi lɛni baalɔ banii Kukpi Lili Bɔvia Limeyi.

⁴²Amu ka Yesu ɔ́ƒɔ akwa leevu-anyɔ ni, básɔ bésie Yerusalem aani kalɛ na baabla kukuuku kalɛ.

⁴³Na ka limeyi lɛmmɔ bɔdi lɛ́sa na básɔ bénwini bésela ɔma ni, Yesu anwu ɔ́sɔ ɔ́kya kama na Yerusalem mmɔ. Na nwuna bawɔne bátati lɛni.

⁴⁴Ama bábu banii ɔkya bekyuli bammɔ akɔ ɔsu bésie ɔƒɛ umodi ulu asa na bése kalɔ baawia-nwu na bakpana ku nwuna lɛlɔ bekyuli akɔ.

⁴⁵Na ka bátanu-nwu ɔsu ni, básɔ bénwini bésie Yerusalem bakɛ baawia-nwu.

⁴⁶Na limeyi lɛtɛdi lɛlɔ ni, bátánu-nwu na Yudaƒuɔ kakpakɔ ka anwu ku Yudaƒuɔ ala batinane badi belie. Mmɔ na ɔkya uunú bana ala ani na baasu na uuye-ma etemila ekpo ekpo teenu.

⁴⁷Na bani nénu-nwu ala kenye budie ni, ɔ́bla-ma dɛye dɛye na lɛlati bonwu lɛni udu na ɔda uudie ala ani beeye-nwu kenye ɔsu.

⁴⁸Ɔtɔtɔ ɔ́gyu nwuna bawɔne ka bánu-nwu lɛni. Na uni úye-nwu ɔnini, “Ubi, bi ɔsu na ábla-bu lɛmɛni udu? Ami ku ƒula ɔti ƒui búduo lɛƒɛda kemmo na bɔkɛ bɔɔví taawia-a.”

⁴⁹Amu na Yesu údie kenye ɔnini, “Bi ɔsu na bɛkɛ bɛɛwia-mi taavi? Bɛɛɛgyi bɛnii mina Ɔti kesii na ɔlɛka lɛkya yoo?”

⁵⁰Nsu ama bétenu lɛla lɛni na ɔ́su-ma mɛni kalɔ.

⁵¹Amu na Yesu ɔ́siaku-ma na bátɔlɔ bésie Nasaret, na úboku lɛlɔ kalɔ úte-ma. Na ala amɛni ƒui éduo uni kasusu kemmo úsie ɔgyu.

⁵²Na Yesu úbalɛ lili na lɛnunda ku ɔlɔna kemmo, na ɔ́ƒɔ lɛnyi na bekyuli ku Katɔti ƒui anumi.