Read Lelemi Lɛkpa Ulu 1 Bible Online

Lɛkpa Ulu 1 - Lelemi bible

Lɛkpa Ulu 1

¹Etemila amɛni na Mose ɔ́kɔ lɛsa úte Israelƒuɔ uwi ɔni na bakya kalɔ kakwiidi kani na Yordan Ketu ɔƒɛ katukɔ kakɛ na kɔwɛ kemmo. Na mmɔ ɔkya Paran ku Totel ku Laban ku Haserot ku Di-Sahab ntɛ.

²Ɔ́si Sinai kɔbi úti útédu Kades-Barnea ɔdi emeyi leevu-unwi ulu busie si ásia Edom abi kalɔ ulu lɛlɔ.

³Ɔƒɛni na bana mmɔ bɔkya lɛkwa aavlenedi kemmo na kɔbuli leevu-unwi limeyi lideedi lɛlɔ ni, Mose ɔ́kɔ lɛsa úte Israelƒuɔ ala ani na Unwoti ɔ́su-nwu ɔ́siku-ma lɛlɔ.

⁴Na uwi ɔmmɔ kemmo ni, úukpo ɔ́di Amoriƒuɔ ɔga ɔni baalɔ Sihon na uli Hesbon ɔma kemmo lɛlɔ. Na ɔ́ɔdi Ɔga Og ɔni mɔɔnu Basan kalɛkɛ lɛlɔ na uli Astarot ku Edrei lɛma kemmo.

⁵Na Yordan Ketu ɔƒɛ katukɔ kakɛ na Moab kalɔ lɛlɔ ni, Mose úse kalɔ uudie Katɔti ɔda bubo etemila kalɔ teete-ma.

⁶Uwi ɔni kemmo na bɔ́kya Sinai kɔbi lɛlɔ ni, bula Unwoti Katɔti ɔ́su-bu ɔnini, “Bíilie kɔbi kɔmɛni lɛlɔ bítu uwi bɛ́gya.

⁷Anwuɔsu bɛta mɛni na biteesie Amoriƒuɔ abi lɛlɔ kɔlɔ kɔni nkya amadɔ mmɔ ƒui ku Yordan Ketu kɔwɛ kemmo ku abi lɛlɔ ku ɔkwalɛ ɔmmɔ kemmo ku kada kakɛ ku Mediterenia kalɔ ƒia lɛlɔ. Na bisie Kanaanƒuɔ kalɔ ku nwuna kama kakɛ útédu Lebanon abi lɛlɔ útédu Euƒrate Ketu bonwu kɔtu.

⁸Bɛnu bɛti ka kalɔ kamɛni ƒui na líti muute-mii. Biteesie na bitéti-ka binwini bina kadikɔ. Kalɔ kammɔ na Lɛ́su líse ka ndubuti lite bina bati kuuku bani ndi Abraham ku Isak ku Yakob ku nwuna bawɔ.”

⁹Na uwi ɔmmɔ kemmo ni, ami Mose lɛ́su-mii ḿbavi uwi ɔni na bɔ́kya Sinai kɔbi lɛlɔ ka bina bɔtɔnku kabla kétulo-mi. Na ami lɛti naaakana kabla kamɛni bɔbla.

¹⁰Na bina Unwoti Katɔti ɔ́ya na bíimomo aani katɔ ayabi.

¹¹Na muuvele nnii Katɔti ɔni ndi bina bati kuuku Unwoti ɔya na bɛsɔ bimomo mpim mpim bibu na ute-mii kusɛ kusɛ na lɛla biala kemmo aani kalɛ na ɔ́su úse.

¹²Nsu dɛ na wabla na ami lɛti mataatɛ bina ala ani muukpóku-mii ku unyeƒi si ɔdi ɔlɛku ɔdi?

¹³Ɔmɛni ɔsu amii ɔlati bɛƒuna bekyuli bani na báda anu na bebo ɔbu na báanu dii na kɔdua biala kemmo na ndubɔya na ama bataabla kabla kamɛni teete-mii.

¹⁴Amu na bɛ́su ka lɛla lɛni na lɛ́su mɛni ni, lɛdia.

¹⁵Anwuɔsu bekyuli bani náda anu na bebo ɔbu bani na amii alati bídie mɛni ni, lɛ́ya badi baanu bekyuli apim lɛlɔ na badi lɛnɔ baanu bekyuli eti anyɔ lɛlɔ na badi lɛnɔ baanu bekyuli liti lɛlɔ na badi lɛnɔ baanu bekyuli leevu lɛlɔ. Na ami lɛnɔ lɛ́sia-ma kɔnu ka batɔnku-mii.

¹⁶Uwi ɔmmɔ kemmo ni, líbo-ma ɔda ka litemi biala na ɔdi weti weboku na badi Israelƒuɔ banwa lɛti lɛti iye Israelni ku ɔƒɔ ntɛ na ɔƒɔ ɔmmɔ ɔkya-mii akɔ ni, batɛ-ni ulu lɛlɔ.

¹⁷Na ɔdi utanu anumi utatɛ litemi lɛdi. Mmomu batɛ-ni ulu lɛlɔ. Ɔlakɛne na ɔdi o-o, ɔwabane na ɔdi o-o ni, batayia ɔdi biala. Batɛku ɔdi biala litemi kalɛ kani na ɔ́manku-nwu. Na mɔɔsu-mii nnii kalɛ biala na litemi lɛmmɔ lise ni, Katɔti ɔdubute-ma kasusu na batɛ-ni ulu lɛlɔ. Na lɛ́su-ma ka si litemi bɔtɛ bɔdi bútulo-ma ni, beti litemi lɛmmɔ beboku-mi na lɛtɛ lite-ma.

¹⁸Na uwi ɔmmɔ kemmo lɛ́su-mii lɛla biala na ɔlɛka bɛbla.

¹⁹Na bitayiƒala kalɛ na bɔ́ta Sinai kɔbi lɛlɔ na bɔkɛ kalɔ kakwiidi bonwu kani mɔɔda liƒu kemmo na bɔkɛ ulu búsela Amoriƒuɔ kalɔ lɛlɔ aani kalɛ na Katɔti úbo-bu ɔda, na bútédu Kades-Barnea.

²⁰Asa na bɔdubuduo Amoriƒuɔ abi kalɔ kammɔ kemmo ni, lɛ́ya-mii bɛ́ti kesii kani na Bula Katɔti ɔ́su úse ka weti wete-bu.

²¹Anwuɔsu bɛɛnu kalɔ kammɔ ka kewi mmɔ. Biteesie na bitéti-ka aani kalɛ na Unwoti ɔni ndi bina bati kuuku Katɔti ɔ́su-mii. Na bitayia ukyuli ɔdi, na enu ataƒɛ-mii lɛnɔ.

²²Nsu bínwini bíbo-mi kudɔ na bɛ́su-mi bɛnini, “Ya na bɔtala bekyuli badi na bagyu batɔ na betéyu kalɔ kammɔ banu. Na babasu-bu ulu ɔni ndia ntulo ka bɔsia, na basu-bu lɛnɔ lɛma libendi lɛni nkya amadɔ mmɔ.”

²³Na lɛ́nu ka lɛla lɛbuni na bɛ́su. Anwuɔsu lídie nkyuli leevu-inyɔ lɛ́siku kɔdua biala kemmo.

²⁴Na bekyuli bamɛni béti anumi bátina abi ulu útédu ka béduo Eskol Kɔwɛ kemmo na báka bámana na básia kalɔ kammɔ anu kaduɛɛ.

²⁵Na béti edula ani nkya mmɔ adi bábatina-bu, na básu-bu ka bula Unwoti Katɔti kalɔ kani na úti úte-bu mmɔ ni, kaadia edula geen.

²⁶Nsu bɛ́ta bínye nwuna ɔda ɔni na úbo-bu lɛlɔ, anwuɔsu kɔnu kútetuku-mii kalɔ kammɔ.

²⁷Lɛnɔ ni, bɛ́kya bina nvo kemmo bítaatɛmi taakya enwu kemmo. Na bɛ́su bɛnii, “Katɔti uukisi-bu, anwuɔsu na ɔ́ya na bɔ́ta bɔ́lɛ Egyipte kalɔ lɛlɔ kalɛ na uti-bu ute Amoriƒuɔ na bebo-bu badu.”

²⁸Na bɛ́sɔ bɛ́su bɛnii, “Wɛ bɔdubusie ɔƒɛni? Ɔsika bekyuli bani na bɔ́tala mmɔ básu-bu ka bekyuli bani nkya mmɔ bebo ɔlɔkplu na bákuku betulo-bu. Na belie lɛma libendi lɛni nina awodu ákuku ésie kayaa. Na bɔ́nu bekyuli bani na baalɔ-ma Anakƒuɔ lɛnɔ ka bakya mmɔ.”

²⁹Nsu lɛ́su-mii nnii, “Bitayia bekyuli bammɔ.

³⁰Ɔsika bina Unwoti ndubo-mii bɔtɔnku, na ɔdubo bina kekpo ƒui bukpo bute-mii aani kalɛ na bɛ́nu kalɛ na úkpo úte-mii na Egyipte kalɔ lɛlɔ

³¹ku kalɔ kakwiidi kemmo. Na bɛ́nu kalɛ na ɔ́da-mii na úti-mii úbedu kesii kani bɔkya mɛni aani kalɛ na ubi ɔti ɔɔda ubidi.”

³²Nsu ɔmɛni kama ƒui ni, bítaƒɔ bina Unwoti Katɔti bítadi,

³³ina ka anwu nágyu ɔtɔ-mii na útáwia ekpo ani na bɛdubulie na bɛnwuna úte-mii. Na anwu kani nátaawia ulu teete-mii. Anwu néteete-mii ogya na ɔɔtɔnku-mii usien na ɔɔyá na liƒlukutu lɛɛtɔnku-mii na limeyi kemmo.

³⁴Na ka bina ɔbladu ulayɔ Katɔti kaƒɔ ɔsu ni, ɔ́kɛ kɔnyi geen. Ɔmɛni ɔsu úse kenye na ɔ́su ɔnini,

³⁵“Bina kaba kekpidi kamɛni kadi biala ɔgba ɔɔɔdubo bɔnya kalɔ kabuni kani na lɛ́su líse ka meti mete bina bati kuuku mmɔ lɛlɔ

³⁶amu ntu Yeƒune ubidi ɔnanabi Kaleb lɛti. Anwu kani nwuna lɛgba ndubo kalɔ kammɔ bɔnya. Na anwu ku nwuna bawɔ lɛti ndubo kalɔ kammɔ bɔdi. Ɔsika ɔ́ƒɔ Katɔti ɔ́di ku nwuna kayi ƒui.”

³⁷Na ami Mose lɛnɔ mɔɔsu-mii nnii ɔ́si amii ɔsu na Katɔti úti kɔnyi ɔ́kya-mi na ɔ́su-mi ɔnini, “Ina awɔ Mose muedi ni, ƒula ɔgba ɔɔɔdubo kalɔ kammɔ bɔnya.

³⁸Nsu Nun ubidi ɔni baalɔ Yosua na unye-ɔ anumi mmɔ anwu ni, nwuna ɔgba ɔdubo kalɔ kammɔ bɔnya. Anwuɔsu kya-nwu ogya, ɔsika anwu ndubo Israelƒuɔ bɔtɔnku na betélie kalɔ kammɔ lɛlɔ.”

³⁹Amu na Katɔti ɔ́su bula ƒui ɔnini, “Bina bebi bani nátabi tɔ lɛlɔ kalɛ banu lɛbuni ku likpidi bati ni, bana lɛgba ndubɔnya kalɔ kammɔ lɛlɔ. Bebi bani bɛ́kya bítaasu bɛnii bina bekisine badubukpo bɔƒɔ ni, ama ndubo kalɔ kammɔ lɛlɔ bulie.

⁴⁰Nsu amii ni, binwini kama na bɛsia Ɛpugyie ulu ɔni ntɔ-mii anumi mmɔ lɛlɔ.”

⁴¹Amu na amii ɔlati bídie kenye bɛnii, “Mose, sɔsɔ bɔ́ta búnye bula Unwoti Katɔti ɔda bubo lɛlɔ. Nsu ɔƒɛni ni, bɔdubɔdi nwuna ɔda bubo lɛlɔ. Na bɔdubɔta busie abi ammɔ lɛlɔ na butékpo ku bekyuli bammɔ aani kalɛ na Katɔti ɔ́su-bu mmɔ.” Anwuɔsu bɛ́ta na bíti bina ekpola adala bɛ́kya na bɛ́tu akpagya. Amii bɛ́kali ka abi kalɔ lɛlɔ bɔkɔ busie bɔtɛ kalɔ.

⁴²Nsu Katɔti ɔ́su-mi ɔnini, “Bo-ma ɔda ka ɔdi biala utata utetékpo. Ɔsika lɛɛɛdubo-mii kama bunye. Na bina bekisine badubɔdi-mii lɛlɔ.”

⁴³Lɛ́su-mii ala ani na Katɔti ɔ́su-mi ka nsu-mii. Nsu bina ɔdi biala úteti nwuna litemi. Mmomu bɔta na bɛ́ta bínye nwuna litemi lɛlɔ. Na amii alati bíti bina ekpola na bɛ́ta na bina lɛkantakpi kemmo bísie abi lɛlɔ kalɔ kammɔ lɛlɔ ka bitékpo.

⁴⁴Na ɔmɛni ɔ́ya na Amoriƒuɔ bani nli abi lɛlɔ kalɔ kammɔ amadɔ báta bábabi básiaku-mii aani kalɛ banwɛnwɛ lisu bonwu lɛɛta. Na bábi básiaku-mii na bádu-mii kaduɛ básiku Edom abi lɛlɔ kalɔ mmɔ laa útédu Horma.

⁴⁵Anwuɔsu bɛ́va bɛ́kpali Katɔti ka ubebunku-mii. Nsu útakpete-mii.

⁴⁶Amu na bílie Kades uwi gyɔlɔɔ kalɛ bɛɛyɔ́.