Read Lelemi Lɛkpa Ulu 12 Bible Online

Lɛkpa Ulu 12 - Lelemi bible

Lɛkpa Ulu 12

¹Ɔni na bísela bitélie kalɔ kani na bina bati kuuku Unwoti Katɔti úti uute-mii mɛni lɛlɔ ni, ɔmɛni ndi ɔda bubo bɔni lɛlɔ na ɔlɛka bɛdi uwi ɔni na bilie-ka lɛlɔ mmɔ. Anwuɔsu bise atu na binu ɔda bubo bɔmmɔ kaduɛ!

²Na kalɔ kani lɛlɔ na bísela bitélie mmɔ ni, bɛnu ka bɛyila baƒiɔ biala udu bani na bekyuli baakpá na kesi kesii na abi ku abinkpo lɛlɔ ku egyii ani mbo ɔyuli mmɔ ƒui kalɔ kede kede.

³Bibo bana akpabi ƒui bɛbwɛ. Na bibo bana atabi ani baalɔ atabi kedee lɛnɔ bɛbwɛ kpɛtɛ kpɛtɛ. Na bɛƒɛ bana lɛƒiɔgyii lɛni na bálɛ béte bana baƒiɔ beledi bani baalɔ Asera baƒiɔ. Na bibo bana baƒiɔ ƒui bɛkya ogya kemmo kalɛ na ukyuli ɔdi ulenyimo ka báakpa baƒiɔ badi na mmɔ kudii.

⁴Na ɔdi utakpa bina Unwoti Katɔti na ulu ɔni lɛlɔ na kadi bammɔ bekyuli baakpá bana baƒiɔ.

⁵Unwoti ɔlati ɔdubɔwia kesii kani námanku ute bina adua leevu-anyɔ ammɔ ƒui na bitaakpa-nwu.

⁶Na mmɔ na bɛdubuti bina akpala akyuladi ku akpala bamba ku bina etela ku bina akɛla lɛkpa leevudi ku etela ani bíse kenye ka bɛdubute Unwoti ku bina kaƒɔ ƒaa etela ku bina ɔmantɛ bakɔ ku baƒonu ku bese bebi bedeedi biboku na bɛkpa bite-nwu.

⁷Na bina Unwoti Katɔti ɔni néte amii ku bina bebi kusɛ kusɛ ɔsu na bɛ́kɛ ala ani na bíti bina enu bɛ́bla mɛni ni, bitaadi ala ammɔ na nwuna anumi mmɔ ku kubiti ku lɛlɔyɔ.

⁸Na si uwi ɔmmɔ údu ni, utalɛka bɛbla ala ani na bɛɛbla mɛni. Na úti úbedu ɔƒɛni ni, bɛɛkpá-nwu kalɛ na amii ɔlati bɛɛyɔ́.

⁹Ɔsika bíteduo tɔ bɔnwuna kalɔ kani na bina Unwoti Katɔti ɔ́su úse ka wete-mii mmɔ lɛlɔ.

¹⁰Na si bɛ́via Yordan Ketu bɛ́wɔlɔ ni, bina Unwoti ɔdubuti kalɔ kammɔ ute-mii na bɛsɔ bilie mmɔ. Na ɔdubo bunye butile bina bekisine ulu na bɛdubulie mmɔ ku atu bɔyɔ.

¹¹Na Unwoti ɔlati ɔdubudie kesii kadi use na bitaakpa-nwu. Na mmɔ na bɛdubuti bina akpala ani ƒui na úbo-mii ɔda biboku. Na akpala ammɔ ndi akpala akyuladi ku akpala bamba ku bina akɛla lɛkpa leevudi ku bina etela ku etela ani bíse kenye ka bɛdubute Unwoti.

¹²Na amii ku bina bebi ku bina kabla bablane banana ku beleku ku Lewiƒuɔ bɛdi limeyi na mmɔ na lɛlɔ litaayɔ-mii na Katɔti anumi. Na binyimo ka Lewiƒuɔ bammɔ beeebo kadikɔ kadi na mmɔ.

¹³Na biteti bina akpala akyuladi bitatákpa kesi kesii na bɛɛyɔ́.

¹⁴Mmomu biti-nya bisienku kesii kani na bina Unwoti ɔdubɔtina na bina adua leevu-anyɔ ammɔ kemmo. Na mmɔ kani na bɛdubuti bina akpala ku ala ani ƒui na úbo-mii ɔda biboku bibákpa.

¹⁵Nsu bibo kuƒi ka bɛdu bina bebuo na bɛkun bana lɛna na kesii biala na bilie aani kalɛ kani na bɛɛkun baƒɛ ku lɛku kemmo bakɔ ɔƒɛni. Bibo kuƒi ka bɛdi kalɛ na bɛkana aani kalɛ kani na Unwoti úte-mii. Ɔdi biala ubo kuƒi kɔmmɔ. Si ɔ́bla lɛlɔ kedee ɔdi iye útabla ni, ubo kuƒi ka ɔkun lɛna lɛmmɔ.

¹⁶Nsu ɔdi utadi bana ubugya. Na bɛya na bana ubugya ɔmmɔ uwi kalɔ aani kalɛ na beewilimi ntu teewi kalɔ kalɛ.

¹⁷Na ɔdi utadi lɛla lɛni na ɔdubuti ɔkpa ute Unwoti na kesii kani na ulie. Bitadi bina edula lɛkpa leevudi iye bina ntɛ bɔwɔdi iye bina nnɔ iye bina ɔmantɛ bakɔ ku baƒonu ku bese bebi bedeedi iye etela ani bíse kenye ka bɛdubuti bite Unwoti iye bina kaƒɔ ƒaa etela iye etela biala na bina kuliekɔ mmɔ.

¹⁸Bɛnu ka amii ku bina bebi ku bina kabla bablane banana ku beleku ku Lewiƒuɔ bani nlie bina lɛma ni, bɛ́di akpala ammɔ na Unwoti Katɔti anumi na kesii kani na ɔdubɔtina-mii. Na lɛlɔ litaayɔ-mii na ala ani bɛ́kɛ mmɔ ɔsu.

¹⁹Na ɔni bilie kalɔ kammɔ lɛlɔ ni, bɛnu ka bítenwini kama bítakya Lewiƒuɔ bammɔ.

²⁰Si uwi ɔni na bina Unwoti Katɔti ɔ́ya na bina lɛmii lɛ́bɛbɛ lítédu kalɛ na ɔ́su úse na bɛnii bɛɛkun lɛna ka lɛɛda-mii ɔkwɛ ɔsu ni, bibo kuƒi ka bɛkun lɛna uwi biala bɛɛyɔ́.

²¹Na si bɛ́nu ka kesii kani na bilie kágyunku nwuna kakpakɔ kani na ɔ́tina-mii mmɔ ni, bibo kuƒi ka bɛdu bina ɔmantɛ bakɔ iye baƒonu ku bese bani na bina Unwoti úte-mii mmɔ badi bɛkun na bina kɔduli aani kalɛ kani na lɛ́su-mii ḿbavi.

²²Na si ukyuli ɔdi ɔ́bla lɛlɔ kedee ɔdi iye útabla ni, ubo kuƒi ka ɔkun lɛna lɛmmɔ aani kalɛ kani na bɛɛkun baƒɛ ku lɛku kemmo bakɔ ɔƒɛni.

²³Nsu bitadi bana ubugya. Ubugya ɔmmɔ ndi bana ngba. Anwuɔsu biwilimi ubugya ɔmmɔ ƒui biwiakun asa bɛkun lɛna lɛmmɔ.

²⁵Na si bɛɛdi ɔda bubo bɔmɛni lɛlɔ ni, kaƒɔ kadubɔyɔ Unwoti na ɔdubɔya na amii ku bina bawɔ keyi kayɔ.

²⁶Na biti bina etela ku akpala ani bɛ́su bíse ka bɛdubute Unwoti bisienku kesii kani na Katɔti ɔ́su úse ka bitaakpa-nwu mmɔ.

²⁷Na biti bina akpala ani na ese ete ka bɛkyula ku lɛna ku ubugya bisienku Unwoti lɛkpabi lɛni na ɔ́tina-mii lɛlɔ na bɛbla akpala ammɔ mmɔ. Bibo kuƒi ka bɛkun lɛna lɛmmɔ, nsu ubugya ɔmmɔ anwu ni, biwilimi biwi bina Unwoti Katɔti lɛkpabi lɛmmɔ ɔƒɛnyi.

²⁸Na si bɛɛdi ɔda bubo bɔni na bina Unwoti Katɔti úte-mi mɛni lɛlɔ ni, ɔmɛni ndubɔya na uteebunku amii ku bina bawɔ na lɛla biala na bɛɛbla lɛtɛ lite-mii.

²⁹Bina Unwoti Katɔti ɔdubo bekyuli bani nlie lɛma lɛni bísela mmɔ udu bɔyila. Na si ɔ́yila-ma udu ɔ́wɔlɔ ni, na mmɔ unwini bina keliekɔ. Na ɔdi utasiaku bana lɛƒiɔkpa kama iye utawia utenu kalɛ na baakpá bana baƒiɔ taavinku kalɛ amii lɛnɔ bitaakpa bina Katɔti na ulu ɔmmɔ lɛlɔ. Na si bɛ́bla lɛni ni, ɔgbankpi ɔdubɔsiaku-mii.

³¹Na bitakpa bina Unwoti Katɔti na ulu ɔni lɛlɔ na baakpá bana baƒiɔ. Ɔsika ulu ɔni lɛlɔ na baakpá bana baƒiɔ ni, ɔdi lɛla lɛni muusé Katɔti lɛlɔ na uláwia ulanu. Ɔsika baakana na beeti bana bebi taakpa lɛgyavonku kemmo na bana akpabi lɛlɔ.

³²Na bɛnu ka bɛ́bla lɛla biala na líbo-mii ɔda nnii bɛbla. Na bitada ɔdi bitedie iye biteti ɔdi bitebunku.