Read Lelemi Lɛkpa Ulu 13 Bible Online

Lɛkpa Ulu 13 - Lelemi bible

Lɛkpa Ulu 13

¹Binye kagyumana bite kenye bediene badi iye bekyuli bani muudie ana ani bégye kalɔ. Ɔdi ɔdubo ubese kenye kadi ka ɔdubo akɔla lidu lidu budie bɔtina,

²nsu kasusu kani na ɔda ndi ka ɔtɔlɔ-mii kalɛ na bitákpa baƒiɔ bani bítakpa kudii. Ina ka kenye kani na úse mmɔ kébo kéte lɛni ni,

³bitenu-nwu litemi. Ɔsika bina Unwoti Katɔti ɔɔsia-mii anu geen na ɔɔkɔ́ku-mii taanu si bɛɛyɔ́-nwu ku kayi ƒui.

⁴Bɛsiaku bina Unwoti lɛti pɛ kama na biti ɔbu bite-nwu. Na bɛdi nwuna etemila ku ɔda bubo bɔni ƒui na úte-mii lɛlɔ. Na bɛkpa-nwu na ulu ɔni na ɔɔwia lɛlɔ na bɛda-nwu kpakplaa.

⁵Bɛdu ukyuli biala ɔni ndi ɔkɔ kenye udiene iye ɔdi ukyuli ɔni mɔɔnyi ɔkɔ teedie ana ani bégye kalɔ. Ɔsika bekyuli bammɔ udu beenwíni bekyuli kasusu teedie Katɔti lɛlɔ anwu ɔni nédie-mii ɔ́lɛku Egyipte kalɔ lɛlɔ na kesii kani nka bénye-mii lɛlɔ na bɛɛbla kabla teete bekyuli bamba. Ukyuli ɔmmɔ udu ɔdi ukyuli ukpidi, na ɔɔyɔ́ ka ɔda-mii kasusu udie ngba bɔni na Unwoti ɔɔyɔ́ ka bilie lɛlɔ. Ɔlɛka bɛdu ukyuli ɔmmɔ udu kalɛ na bilasiaku nwuna udu ukpidi ɔmmɔ kama.

⁶Binye kagyumana bite bina ɔnwani iye bina ubidi ɔnanabi iye ulekubi iye bina beleku bani na bɛɛyɔ́ geen iye ƒula ɔkpana geen ɔni ndubo bɔbɛ bubasu-mii ka bibo na bitákpa baƒiɔ bani udu na amii iye bina bati kuuku bítakpa kudii.

⁷Na si bana akɔ ɔdi úbasu-mii ɔnii bibo na bitákpa baƒiɔ bani nkya lɛma lɛni nde-mii iye lɛma lɛni nkya ɔgyu kemmo ni,

⁸bitenu kalɔ na bitakpete ukyuli ɔmmɔ. Na bitanu ukyuli ɔmmɔ kɔnyana. Na nwuna lɛlɔ litakywi ɔdi kaƒɔ, na teti ukyuli ɔmmɔ tabɛla.

⁹Mmomu awɔ ni, bo ukyuli ɔmmɔ kudu kɔnakunwi, na ese kalɔ eteebo-nwu atabi asa na bekyuli bakladi bebebunku-ɔ.

¹⁰Bibo-nwu atabi bɛdu. Ɔsika ɔɔyɔ́ ka ɔtɔlɔ-mii na ɔda bina kasusu udie bina Unwoti Katɔti lɛlɔ anwu ɔni nédie-mii ɔ́lɛku Egyipteƒuɔ kalɔ lɛlɔ kesii kani nka bénye-mii lɛlɔ na bɛkya bɛɛbla bekyuli bamba kabla.

¹¹Na ɔmɛni ndubɔya na Israelƒuɔ ƒui benu lɛla lɛni nálɛ mɛni na liƒu lɛda ukyuli biala. Na ɔdi biala uleti lɛlɔ ulakya udu ukpidi ɔmmɔ kemmo kudii.

¹²Na si bínu bɛ́siku lɛma lɛni na bina Unwoti Katɔti úti uute-mii ka bitélie-ni kemmo mmɔ

¹³ka bekyuli bekpidi badi báta na bina akɔ na bátɔlɔ ama ɔlati ɔma bekyuli ka bitákpa baƒiɔ bani bítakpa kudii ni, bi na bɛdubo bɔbla?

¹⁴Si bínu etemila ammɔ bene udu ni, biwi lɛlɔ na bɛwia-nya kemmo bɛti kaduɛ. Na si bɛ́wia bɛ́ti ka sɔsɔ na etemila ammɔ adi ni,

¹⁵bɛdu bekyuli bani ƒui nlie ɔma ɔmmɔ kemmo. Na bɛdu bana bebuo ƒui lɛnɔ. Na bɛnu ka bɛ́yila ɔma ɔmmɔ udu ƒui.

¹⁶Na akɛla ani na ɔma ɔmmɔ bekyuli bebo ƒui ni, bɛla-nya ƒui bitéwi kuyeya na bɛkyula ala ammɔ ku ɔma ɔmmɔ ƒui. Na ala akyuladi ammɔ ƒui adubunwini akpala ete bina Unwoti Katɔti. Na ɔma ɔmmɔ unwini ɔma ɔni na úbie na ɔsɔ uladia bɔsɔku bɔda kudii.

¹⁷Na ɔdi uteti ala ani na ɔ́su-mii ka bɛkyula mmɔ adi utese lɛlɔ. Ɔmɛni ndubɔya na nwuna kɔnyi kati kati kɔyɔ na ɔnu-mii kɔnyana. Ɔdubɔnu-mii kɔnyana na ɔya na bimomo bibu aani kalɛ na ɔ́su bina bati kuuku úse.

¹⁸Ɔsika biinú bina Unwoti Katɔti litemi na bɛɛdi nwuna ɔda bubo bɔni na uute-mii ɔmwi mɛni lɛlɔ. Na bɛɛbla ala ani nse siin na nwuna anumi ɔsu.