Read Lelemi Lɛkpa Ulu 14 Bible Online

Lɛkpa Ulu 14 - Lelemi bible

Lɛkpa Ulu 14

¹Amii Israelƒuɔ bɛdi bekyuli bani na bina Unwoti Katɔti údie úte lɛlɔ. Anwuɔsu si bɛɛbla ukpine ɔdi kekwa ni, ɔdi uteti lɛla lɛdi utekulo nwuna ɔlɔna kakɛ kadi, na ɔdi utekpeyi nwuna lɛtɛntɛ na ukpine ɔdi ɔsu aani kalɛ na kadi bamba bekyuli baabla.

²Ɔsika amii bɛdi Unwoti Katɔti ɔdi na anwu náƒuna-mii ɔ́lɛku kadi bamba bekyuli akɔ na kalɔ lɛlɔ ƒui ka bɛbla nwuna ɔdi.

³Bitakun lɛna biala lɛni na Katɔti úbo-mii ɔda ka liisé-nwu lɛlɔ.

⁴Na bebuo bani na béte kuƒi ka bɛdu na bɛkun ndi bebuo bamɛni.

⁵Ɔmantɛ bakɔ ku baƒonu ku bete ku bese ku baƒɛ ku bana udu biala na lɛku kemmo bani muukpó taalɛku ɔkwɛ kemmo taakun na bana lɛgba agbanvuo kemmo kábwɛ inyɔ lɛnɔ bibo kuƒi ka bɛdu bebuo bammɔ bɛkun.

⁷Na bitakun ebuo ɔni neeekpo taalɛku ɔkwɛ kemmo taakun na uuubo agbanvuo ani kemmo nábwɛ inyɔ. Na bitakun bagbɛnɛgbɛnɛ bebuo bani na bana atu éne gyɔlɔɔ gyɔlɔɔ mmɔ ku bebuo ala betine benengudi ku keƒu bani nkya kalɔ kakwiidi mmɔ. Bebuo bamɛni beekpó taakun, nsu bana lɛgbanvuo kemmo lítabwɛ kemmo inyɔ.

⁸Na bitakun ɔplakuo. Ɔsika bebuo bamɛni beesé lɛlɔ. Bebo agbanvuo ani kemmo nábwɛ inyɔ, nsu belekpo taakun. Na ɔdi utakun bebuo bamɛni iye biteti bina enu bitetuku bana ukpine.

⁹Na lɛna biala na lɛkya ntukpa ku ɛpu kemmo na libo atula ku akpa ni, bibo kuƒi ka bɛkun-ni.

¹⁰Nsu lɛna biala na lɛkya ketu kemmo na liiibo akpa ku lɛƒɛnyi atula ni, bitakun. Ɔsika lɛna lɛmmɔ liisé lɛlɔ.

¹¹Bɛkana na bɛkun aasɛ biala ɔni neeese lɛlɔ.

¹²Nsu baasɛ bani anyi ndubo bɔlɔ mɛni ni, bitakun-ma. Kɔdigbo aasɛ, likuku, okum ku nwuna lidu lidu, ɔsansa, kasangbii ku nwuna lidu soholi, lɛkpaƒɛɛlɛ, ligbini, kwakwadabi, ɛpu kemmo kwakwadabi, likuku ku nwuna lidu lidu, ntu kemmo kɔdigbo aasɛ, aasɛ ku limɔ gyɔlɔɔ ku nwuna lidu lidu, lɛpan ku baƒelelee.

¹⁹Na kubweyi pii kɔkya na kuuveyi na lisu kemmo ni, bitakun-ku, ɔsika beesé lɛlɔ.

²⁰Na kɔni muuveyi na kulese lɛlɔ aku ni, bɛkana na bɛkun aku.

²¹Na bitakun ebuo biala na úkpi ɔtɛ. Mmomu bɛkana na biti ebuo ɔmmɔ bite baƒɔ bani nli-mii akɔ iye biti biye bite baƒɔ bani nási baaví. Ɔsika amii bɛdi bekyuli bani na Katɔti údie úse sɛsɛɛ úte lɛlɔ. Na biteti ese uni lɛnyi ntu biteƒulo nwuna ubi lɛna.

²²Lɛkwa ndi lɛkwa ni, ɔdi biala udie nwuna edula ani ƒui na ɔ́kɛ lɛkpa leevudi use sɛsɛɛ ute Katɔti.

²³Na si bɛ́bla ɔmɛni bɛ́wɔlɔ ni, na bisie kesii kani bina Unwoti Katɔti ɔ́ƒuna úse ka bitaakpa-nwu mmɔ. Na si bíduo mmɔ ni, ɔdi biala uti nwuna ala lɛkpa leevudi ani ndi edula ku ntɛ bɔwɔdi ku nnɔ bɔni na bídie ku bina ɔmantɛ bakɔ ku bina baƒonu ku bese bebi bedeedi bani na báwɔ na bɛdu-ma na bɛkun lɛna lɛmmɔ ku ala akladi ammɔ na Katɔti anumi. Na si bɛ́bla lɛni ni, ala amɛni ndubɔya na bɛtɛya kalɛ na biteeti ɔbu teete bina Unwoti Katɔti uwi biala.

²⁴Na si úte-mii kusɛ kusɛ na bɛ́kɛ ala pii na bilakana ala lɛkpa leevudi lɛmmɔ ƒui buti busienku mmɔ ka mmɔ kágyunku-mii ɔsu ni,

²⁵na biti ala ammɔ biye na kesii kani na bilie na biti egulabi ammɔ bisienku liku linwi pɛ lɛni na Katɔti ɔ́ƒuna úse mmɔ.

²⁶Na si bíduo mmɔ ni, biti egulabi ani bɛ́kɛ mmɔ biye lɛla biala na bɛɛyɔ́, aani ɔmantɛ bakɔ iye baƒonu iye ntɛ na amii ku bina kaduli bekyuli bɛni na bɛdi ala ammɔ na bina Unwoti Katɔti anumi mmɔ.

²⁷Na bitedie Lewiƒuɔ bani nkya bina lɛma mmɔ atu. Mmomu bite-ma ala ammɔ adi. Ɔsika ama beeebo kadikɔ kadi na kese kete-ma.

²⁸Na lɛkwa lɛtɛdi biala lɛlɔ ni, biti bina edula lɛkpa leevudi biboku na bɛkya-nya unwu kemmo bise bina lɛma.

²⁹Na edula ammɔ adi Lewiƒuɔ ku baƒɔ ku bekpinebi ku bekpinele bani nkya bina lɛma ɔdi. Na badubuteebo taabaƒɔ ala ani na baawia na badi bemo. Na si bɛɛbla ɔmɛni ni, bina Unwoti Katɔti ɔdubuteete-mi kusɛ kusɛ na bina kabla biala kemmo.