Read Lelemi Lɛkpa Ulu 15 Bible Online

Lɛkpa Ulu 15 - Lelemi bible

Lɛkpa Ulu 15

¹Na lɛkwa maatɛdi biala lɛlɔ ni, si Israelni ɔdi ɔda ɔkpanadi kayu ni, na uti kayu kani na ɔda-nwu mmɔ ɔkyiɛ-nwu na lɛkwa lɛmmɔ kemmo.

²Ulu ɔmɛni lɛlɔ na ɔlɛka bɛbla ala amɛni bɛsiaku. Ukyuli biala ɔni névo egulabi úte nwuna Israelnikpana ni, uti kayu kammɔ ɔkyiɛ-nwu. Na utenye ukyuli ɔmmɔ lɛlɔ ka ɔɔwia nwuna lɛla lɛni na ɔda-nwu mmɔ. Ɔsika Katɔti ɔlati nése uwi ɔni na bekulo kayu biala nkya úse.

³Nsu si ukyuli ɔni naaadi Israelni ɔda ɔdi kayu kadi ni, ubo kuƒi ka ɔƒɔ lɛla lɛni na ɔda-nwu mmɔ ɔsiku-nwu kudɔ. Nsu ƒula Israelni ɔkpana anwu ni, ti kayu kammɔ kyiɛ-nwu lɛkwa maatɛdi lɛmmɔ lɛlɔ.

⁴Na bina akɔ ɔdi ulénwini ɔwabane. Ɔsika bina Unwoti Katɔti ɔdubute-mii kusɛ kusɛ geen na kalɔ kani lɛlɔ bísela bitélie mmɔ.

⁵Si bɛɛdi nwuna ɔda bubo bɔni na úte-mii mmɔ lɛlɔ na bɛɛbla taasiaku lɛla biala na ɔ́su-mii lɛlɔ kaduɛ ni, kusɛ kusɛ ɔmmɔ ɔdubɔsiaku-mii.

⁶Katɔti ɔdubute-mii kusɛ kusɛ aani kalɛ kani na úse kenye úse. Na bɛdubuvo egulabi bite kadi kadi bekyuli, nsu amii ni, bilésie bana kudɔ biletévo egulabi adi. Na bɛdubɔdi kadi kadi bekyuli lɛlɔ, nsu ɔdi biala ulakana-mii lɛlɔ bɔdi.

⁷Na si bina Unwoti Katɔti úti kalɔ kani lɛlɔ na bísela bitélie mmɔ úte-mii na bísie bilie-ka lɛlɔ na bina ɔnwa ɔdi ɔɔyaki lɛla lɛdi na lɛma lɛmmɔ ɔdi kemmo ni, bitabla-nwu lili ɔkplu.

⁸Mmomu ute-nwu kebunku kani na ɔɔwia ku kayi ƒaa.

⁹Na utasu ɔnii kayu butitaakyiɛ lɛkwa lɛdaku budu ɔsu, ulete ukyuli ɔmmɔ kebunku kani na ɔɔwia. Ɔdi utaya na kasusu kekpidi kammɔ udu keduo-nwu lili kemmo. Na si ukyuli ɔmmɔ ɔ́bla nwuna ɔnwani ulikplu na útete-nwu kevonkɔ kani na ɔɔwia mmɔ na ukyuli ɔmmɔ úwulo na ɔ́kpali Katɔti ni, Katɔti ɔdubɔni ulikplune ɔmmɔ kɔtu geen.

¹⁰Na bɛnu ka biite lɛlɔ ala ku kayi ƒaa ɔni na kasusu kekpidi kadi keeebo-nwu kemmo. Na si bɛɛbla lɛni ni, Katɔti ɔdubute-mii kusɛ kusɛ na lɛla biala bɛɛbla kemmo.

¹¹Na bawabane badubɔkya bina akɔ uwi ndi uwi na kalɔ kani lɛlɔ na bísela bitélie mmɔ. Anwuɔsu muubo-mii ɔda nnii, biteebunku bawabane bammɔ ku bekyuli bani ƒui mɔɔyáki lɛla lɛdi.

¹²Si Israelni biala ɔdi ɔnana iye uleku úti lɛlɔ úye úte ɔdi na ɔ́bla-nwu kabla utédu lɛkwa lɛkundi lɛlɔ ni, ɔlɛka banyonu ukyuli ɔmmɔ na lɛkwa maatɛdi kemmo na uteesie kesii kani na ɔ́si.

¹³Na si uwi údu ka bana ɔdi úsela ni, utalɛka ukyuli ɔni na ɔ́bla kabla úte mmɔ ɔnyonu-nwu na ɔtɔlɔ ku enukplu.

¹⁴Mmomu te-nwu lɛla lɛdi siku ala ani ƒui na Katɔti ɔ́ya na ákɛ ɔkɛnku kusɛ kusɛ ɔni na úte-ɔ ɔsu ku kaƒɔ ƒaa. Bite-ma baƒonu ku bese ku edula ani bɛ́ƒɛ ku ntɛ bɔni bídie bíse kalɛ na ɔ́manku.

¹⁵Na binyimo ka amii lɛnɔ bɛ́ɛbla bekyuli kabla na Egyipte kalɔ lɛlɔ dii. Nsu bina Unwoti Katɔti úbada-mii údie lɛbibo lɛmmɔ kemmo na bɛ́kɛ bɔnwuna. Anwuɔsu na uubó-mii ɔda ɔmɛni.

¹⁶Nsu si lɛkwa maatɛdi lɛmmɔ lídu na ukyuli ɔni mɔɔbla ukyuli bamba kabla mmɔ ɔ́bla kasusu ka wasɔ wakya nwuna unwoti kudɔ ka ɔɔyɔ́-nwu ku nwuna kaduli bekyuli na lɛlɔ lɛɛyɔ́-nwu ka ɔsɔ ɔkya ɔsu ni, kuƒi kɔtɛ.

¹⁷Na asa na wasɔ wakya ni, da ukyuli ɔmmɔ kɔtu tamana ƒula kayakun ɔpunu lɛlɔ na awia lɛla lɛdi eti aƒuaala-nwu kɔtu. Na si ábla ɔmɛni áwɔlɔ ni, na ukyuli ɔmmɔ únwini ukyuli ɔni ndubutaabla kabla teete-ɔ nwuna akwa ƒui. Lɛni kani na bɛdubɔbla beleku bani mɔɔyɔ́ ka basɔ bakya bana benwoti kudɔ lɛnɔ.

¹⁸Na si uwi údu ka bɛnyonu bekyuli bani mɔɔbla kabla mɛni ni, ɔdi utakyaku-ma unyeƒi ɔdi. Ɔsika akwa aku ani na bákya-mii kudɔ mmɔ kabla kani na bábla béte-mii ni, kétulo ama bani mɔɔƒɔ́ limeyi ndi limeyi lɛyuƒɔla kunyɔ. Na si bɛ́bla ɔmɛni ni, Katɔti ɔdubuteete-mii kusɛ kusɛ na lɛla biala bɛɛbla kemmo.

¹⁹Na bina ɔmantɛ bakɔ ku baƒonu ku bese ubi ɔgyani udeedi biala ni, bidie-nwu bise sɛsɛɛ bite Katɔti. Na biteti bakɔ bitesienku na batábla kabla kadi iye bikulo baƒonu bammɔ linwini bɛbla unwo uwi ɔdi.

²⁰Mmomu lɛkwa ndi lɛkwa ni, amii ku bina kaduli bekyuli biti bebuo bammɔ bisienku liku linwi pɛ lɛni na Katɔti ɔ́su-mii ka bitaakpa-nwu mmɔ. Na bitádu-ma bɛkpa bite-nwu na bɛkun-ma na Katɔti anumi mmɔ.

²¹Nsu si ebuo ɔmmɔ ɔdi ɔ́ƒɛ uwi kalɔ iye anumi abwɛ-nwu ni, iye lɛla bamba lɛdi lɛda-nwu ni, biteti ebuo ɔmmɔ udu bitakpa bitete bina Unwoti Katɔti.

²²Na bibo kuƒi ka bɛdu ebuo ɔmmɔ udu bɛkun na bina kɔduli. Na si ukyuli ɔdi úkisi lɛlɔ iye útekisi lɛlɔ ni, ubo kuƒi ka ɔkun lɛna lɛmmɔ aani kalɛ kani na bɛɛkun bete ku baƒɛ.

²³Nsu biteti bana ubugya bitabla adila na bɛdi. Mmomu biwilimi bana ubugya biwi kalɔ aani kalɛ na beebó ntu teewiakun.