Read Lelemi Lɛkpa Ulu 16 Bible Online

Lɛkpa Ulu 16 - Lelemi bible

Lɛkpa Ulu 16

¹Bise kɔbuli kɔni baalɔ Abib likpo na bataadi Kukpi Lili Bɔvia limeyi teete bina Unwoti Katɔti. Ɔsika Abib kɔbuli kɔmmɔ kemmo na ɔ́da-mii údie Egyipteƒuɔ kalɔ lɛlɔ usien unwi.

²Na Kukpi Lili Bɔvia limeyi bɔdi bɔmmɔ ni, bɛdu bina ɔmantɛ bakɔ ku baƒonu ku bese na biti-ma bɛkpa bite bina Unwoti na kesii kani na ɔdubudie use ute lɛlɔ mmɔ.

³Na si bɛɛdi Kukpi Lili Bɔvia adila ammɔ ni, biteti bɔnyi bɔni mɔɔyá na ɔlaaƒɔ uuƒu bitasala bodobodo ɔmmɔ kemmo. Biti emeyi maatɛ bɛdi bodobodo ɔni neeeƒu aani kalɛ kani na bɛ́bla limeyi lɛni na bɛ́babla na bɛ́tɔlɔ Egyipte kalɔ lɛlɔ mmɔ. Na si bɛɛdi bodobodo ɔmmɔ udu ni, bɛsia-nwu lɛnyi bɛnii Lɛbibo Adila Bɔdi kalɛ na biteenyimo na bina ngba bulie ƒui kemmo abi ani na bíbo uwi ɔni bɛ́kya Egyipte kalɔ lɛlɔ.

⁴Na emeyi maatɛ kemmo ɔdi biala uteti bɔnyi bɔni mɔɔyá na ɔlaaƒɔ uuƒu utese nwuna kaduli. Na ebuo ɔni na bɛ́du na Kukpi Lili Bɔvia limeyi lideedi useyi uwi ni, na bɛkun lɛna lɛmmɔ useyi ɔmmɔ kani. Bitebu ɔdi bitese lɛlɔ.

⁵Bebuo bani nse nte ka beti-ma bakpa bete Katɔti na Kukpi Lili Bɔvia limeyi lɛmmɔ lɛlɔ ni, bɛnu ka bɛ́du bebuo bammɔ ƒui na kesii kani na Katɔti ɔ́su úse ka bitaakpa-nwu mmɔ kani, na ɔɔɔdi lɛma lɛni na bina Unwoti Katɔti ɔ́su úse ka wete-mii. Bɛdu bebuo bammɔ na Kukpi Lili Bɔvia limeyi bɔdi useyi ɔmmɔ biti bɛtina uwi ɔni kemmo na bíti bɛɛlɛ́ Egyipte kalɔ lɛlɔ.

⁷Na biƒulo lɛna lɛmmɔ ƒui na kesii kani na Katɔti ɔ́su úse ka bitaakpa-nwu mmɔ. Na bɛkun-ni ƒui na mmɔ. Na bɛtɔlɔ nwuna lɛdigye bisie kɔduli.

⁸Na emeyi aku ani nébu ni, bitaadi bodobodo ɔni néteƒu kani. Na limeyi maatɛdi lɛlɔ ni, bɛsala lɛlɔ na bimwi bina Unwoti Katɔti, na ɔdi utabla kabla kadi limeyi lɛmmɔ lɛlɔ.

⁹Na kwasida maatɛdi lɛlɔ ɔ́si uwi ɔni na bíse kalɔ ku bina edula bɔƒɛ ni, bisie kesii kani na bina Unwoti Katɔti ɔ́su úse ka bitaakpa-nwu mmɔ na bitádi Edula Bɔƒɛ Limeyi. Na si bísela ni, biti edula ammɔ adi bɛda aani kalɛ na Katɔti úte-mii kusɛ kusɛ kenye, na biti bɛtina ka bɛɛbu-nwu.

¹¹Na si bísela ni, biti bina bebi ku bina kabla bablane banana ku beleku ku baƒɔ bani nkya-mii akɔ ku Lewiƒuɔ ku bekpinebi ku bekpinele bani nkya bina lɛma kemmo ƒui bɛda. Na biti kubiti bɛdi limeyi lɛmmɔ na Katɔti anumi.

¹²Na bɛnu ka bɛ́di ɔda bubo bɔmɛni lɛlɔ. Na bitayiƒala ka Egyipteƒuɔ bénye-mii lɛlɔ na bítaabla-ma kabla dii.

¹³Si bɛ́ƒɛ bina edula na bíti bina adingyii ebi bɛ́bla ntɛ bɛ́wɔlɔ ni, na bɛdi Kevo Kemmo Bulie Emeyi. Biti emeyi maatɛ bɛdi limeyi lɛmmɔ.

¹⁴Na si bísela bitádi limeyi lɛmmɔ ni, biti bina bebi ku bani mɔɔbla-mii kabla ku Lewiƒuɔ ku baƒɔ bani nkya-mii kudɔ ku bekpinebi ku bekpinele bani ƒui nkya bina lɛma kemmo bɛda na bitádi limeyi lɛmmɔ ku kubiti.

¹⁵Na bɛya na lɛlɔyɔ lɛƒɔ limeyi lɛmmɔ kaduɛ, ɔsika Unwoti néte-mii kusɛ kusɛ na ɔ́ya na bina enu kemmo kabla kammɔ kádia. Na bɛbla ɔmɛni na emeyi maatɛ kemmo na kesii kani na bina Unwoti ɔ́su ka bitaakpa-nwu mmɔ.

¹⁶Na lɛkwa biala kemmo ni, Israelƒuɔ ƒui banana ɔlɛka bebo Unwoti anumi kɔtɛ babakpa-nwu na kesii kani na ɔ́su úse ka bitaakpa-nwu mmɔ. Na emeyi ani badubɔdi mmɔ ndi Bodobodo Ɔni Néteƒu Limeyi ku Edula Bɔƒɛ Limeyi ku Kevo Kemmo Bulie Emeyi. Na ukyuli ɔdi utebo Katɔti anumi mmɔ ku enukplu.

¹⁷Na si ɔnana biala ɔdubo ni, uti etela uboku bina Unwoti Katɔti aani kalɛ na úte-mii kusɛ kusɛ na ɔ́kɛ edula ammɔ kenye. Na ukyuli ɔdi utebo Katɔti anumi mmɔ ku enukplu.

¹⁸Bidie litemi batɛne ku bakutine na ɔma biala kemmo. Na bekyuli bamɛni banu ka baatɛ bekyuli etemila na ulu lɛlɔ.

¹⁹Na beteƒu litemi geen lɛmmɔ batakya na batanu bekyuli anumi lɛnɔ. Na bataƒɔ egulabi na bɔbɛ kemmo, ɔsika etela ammɔ udu aabwɛ banundane ku bekyuli bani lɛlɔ mbo ɔbu anumi, na balátɛ litemi siin.

²⁰Na bɛnu ka litemi lɛlɔ bɔdi ulu lɛlɔ bɔ́ƒɔ bina ƒui akɔ. Na si bɛbla lɛni ni, anwu ndubɔya na bilie kalɔ kani na bina Unwoti Katɔti úti uute-mii lɛlɔ.

²¹Si bɛɛtú lɛkpabi lɛdi bite bina Unwoti Katɔti ni, biteti baƒiɔ beledi bani baalɔ banii Asera ɔƒiɔgyii bitalɛ Katɔti lɛkpabi lɛmmɔ kudɔ.

²²Na biteti lɛtabi lɛdi bitabla baƒiɔ na bitaakpa-ni. Ɔsika Katɔti ukisi ala ammɔ bene.