Read Lelemi Lɛkpa Ulu 17 Bible Online

Lɛkpa Ulu 17 - Lelemi bible

Lɛkpa Ulu 17

¹Biteti ɔmantɛ bakɔ iye koƒonu kɔni na kɔ́sɔ bitakpa bitete bina Unwoti Katɔti. Ɔsika Katɔti ukisi ala ammɔ bene.

²Na si úbo úte ka bina akɔ ɔdi únu ka ɔnana iye uleku ɔdi ɔda ɔvia Katɔti ɔda bubo bɔni na úte-mii lɛlɔ iye ɔ́bla likpidi lɛdi na útadi lɛla lɛni na Katɔti únyimiku-mii lɛlɔ

³na úsie utákpa baƒiɔ badi iye kɔbuli iye ɔƒɛ iye ayabi uwi ɔni na Katɔti ɔ́su ka ɔdi utabla lɛni kudii ni,

⁴na bínu litemi lɛmmɔ ni, biwi lɛlɔ na bɛwia-ni kemmo kaduɛ. Na si bɛ́wia-ni kemmo na litemi lɛmmɔ lɛdi sɔsɔ ka ukyuli ɔmmɔ ɔ́bla likyulikpi lɛla lɛmmɔ udu na Israel kalɔ lɛlɔ ni,

⁵na biti ukyuli ɔmmɔ udu bɛlɛku bisienku bina ɔma kabanye na bibo-nwu atabi bɛdu.

⁶Nsu asa na bɛdububo-nwu atabi ni, bɛya na nkyuli inyɔ iye ɛtɛ bebenye litemi lɛmmɔ kama ka sɔsɔ na ɔdi. Nsu si ukyuli unwi kani nnye litemi lɛmmɔ kama ni, na bitebo ukyuli ɔmmɔ atabi.

⁷Na asa na bɛdububo ukyuli ɔmmɔ atabi ni, bɛya na bekyuli bani nnye litemi lɛmmɔ kama baka-nwu atabi bubo asa na bekyuli bakladi beteebo-nwu atabi. Ɔmɛni ndi kalɛ na bɛda likpidi lɛmɛni udu bidie bina akɔ.

⁸Bɛya na buti-nwu bɔnii etemila adi akya na étulo-mii bɔtɛ aani ukyuli bɔdu na ulu ɔdi lɛlɔ litemi iye ukyuli bubo bɔkya ɔlɛ litemi ku etemila bɔni teenene na litemi katɛkɔ. Na si etemila amɛni udu álɛ ni, bisie kesii kani na bina Unwoti Katɔti ɔ́tina-mii ka bitaakpa-nwu mmɔ.

⁹Na biti etemila ammɔ bite Katɔti bakpane bani ndi Lewiƒuɔ ku litemi ɔtɛne ɔni nkya mmɔ na beduo etemila ammɔ kemmo na batɛ litemi lɛmmɔ bete-mii.

¹⁰Na si kalɛ biala bátɛ litemi lɛmmɔ bávinku ni, na binu kalɔ.

¹¹Bɛƒɔ bana litemi lɛmmɔ ku kalɛ biala bébo-mii ɔda bávinku.

¹²Na ukyuli biala na ɔnii ulénu litemi ɔtɛne iye Katɔti ɔkpane litemi lɛni bátɛ mmɔ kalɔ ni, na bebo-nwu badu. Na bitaada bekyuli likpidi lɛmɛni udu teedie bina akɔ.

¹³Na ɔmɛni ndubɔya na ukyuli biala unu lɛla lɛni nálɛ mɛni, na ɔya na ukyuli biala ɔyia na basɔ balata belenye litemi ɔtɛne litemi lɛlɔ.

¹⁴Si bísie na bitélie kalɔ kani na bina Unwoti Katɔti ɔ́su úse ka wete-mii mmɔ lɛlɔ na ɔmmɔ kama bíti kasusu na bɛ́nu ka bɛɛwia ɔga ɔdi na utaadi Israelƒuɔ lɛlɔ aani kalɛ na kɔlɔ bamba bebo bagadine ni,

¹⁵na bɛnu kaduɛ na bidie ɔga ɔni na Unwoti lɛnɔ ɔ́ƒuna. Ɔlɛka ɔbla ukyuli ɔni nási bina kadi bekyuli akɔ. Na biteti kadi bamba ukyuli ɔni naaadi Israelni ɔdi bitese lɛga.

¹⁶Na ɔga ɔni na bɛdubuse ni, utalɛka ɔwia bapɔnkɔ pii ute lɛlɔ. Na utalɛka ukyuli ɔdi use Egyipte kalɔ lɛlɔ utéye bapɔnkɔ badi ɔ́siku mmɔ uboku-nwu. Ɔsika Unwoti ɔ́su-mii ka ukyuli ɔdi ɔsɔ utesie Egyipte kalɔ lɛlɔ mmɔ lɛnɔ.

¹⁷Na ɔga ɔmmɔ lɛnɔ utawia beleku pii uteti, ɔsika si ɔ́bla lɛni ni, nwuna kasusu kadubɔlɛ nwuna Unwoti lɛlɔ. Na ɔga ɔmmɔ lɛnɔ utawia sika ugyiedi ku ɔƒualadi pii utese lɛlɔ.

¹⁸Na si ɔga ɔmmɔ úbo úbelie nwuna liboku lɛlɔ ni, ɔƒɔ Ɔda Bubo Ɔku Kedee ɔmmɔ na Katɔti bakpane bani ndi Lewiƒuɔ kudɔ na anwu lɛnɔ unweni etemila ammɔ ɔkya ɔku kemmo ute lɛlɔ.

¹⁹Na uti ɔku ɔmmɔ na utaaka-nwu teenu Katɔti ɔda bubo etemila teeti taada nwuna ngba emeyi ƒui. Mmɔ na ɔdubuteeti ɔbu teete Katɔti na ɔkana na uteemwi-nwu na ulu lɛlɔ. Na utaadi nwuna ɔda bubo bɔmmɔ lɛlɔ.

²⁰Na ɔmɛni ndubɔya na ulátaakɔliku lɛlɔ katɔ teetulo nwuna banwa Israelƒuɔ bakladi. Na ɔdububunku-nwu lɛnɔ na ulénwini kama ulakya Katɔti ɔda bubo. Na si ɔ́bla lɛni ni, ɔdubɔya na anwu ku nwuna kaba bekyuli belie liboku lɛmmɔ lɛlɔ badi lɛga na Israel kalɔ lɛlɔ bétu uwi.