Read Lelemi Lɛkpa Ulu 18 Bible Online

Lɛkpa Ulu 18 - Lelemi bible

Lɛkpa Ulu 18

¹Katɔti bakpane bani ndi Lewiƒuɔ beeebo kadikɔ kadi na Israelƒuɔ kalɔ lɛlɔ. Mmomu bana kadikɔ ndi etela ku akpala ani na bekyuli beeboku-ma ka bakyula bete Unwoti.

²Na Lewiƒuɔ bamɛni beeebo kuƒi ka bakɛ kalɔ kadi bete lɛlɔ aani kalɛ na adua bakladi bekyuli bebo kalɛ. Bana kɔsia kani ndi ka badi bakpane bete Unwoti aani kalɛ na anwu Unwoti úse kenye úse.

³Na uwi biala na Israelƒuɔ badubɔdu ɔmantɛ bakɔ ku baƒonu beti bakpa bete Unwoti ni, bedie bebuo bammɔ enu ku ɔnungla ku bana kaƒɔ ala bete Lewiƒuɔ bammɔ.

⁴Ɔƒɛni ni, bina edula edeedi ani na bɛ́ƒɛ ku ntɛ ku nnɔ ku bina baƒonu linwini lɛni na bíti bɛ́bla unwo ni, biti ala ammɔ bite Lewiƒuɔ bammɔ.

⁵Ɔsika na bina adua kemmo ni, Unwoti nédie kɔdua kunwi na ama ndi Lewiƒuɔ bamɛni ka benwini bakpane bete-nwu uwi ƒui.

⁶Na Lewini biala ɔni nlie Israel ɔma biala kemmo na ɔ́bla kasusu ka use utélie kesii kani na Unwoti ɔ́su úse ka bataakpa-nwu mmɔ, ubo kuƒi ka utélie mmɔ.

⁷Na ɔkana na utaabla nwuna ɔkpane kabla na Katɔti anumi mmɔ aani Lewiƒuɔ bakladi bani nlie mmɔ kalɛ.

⁸Na ɔlɛka bete-nwu adila aani kalɛ na beete bakpane bani nlie mmɔ adila ina ka nwuna kaduli bekyuli béte-nwu egulabi adi.

⁹Si bísie bítéduo kalɔ kani na bina Unwoti Katɔti ɔ́su úse ka wete-mii mmɔ kemmo ni, ɔdi utasiaku kadi bamba bekyuli bani nde-mii mmɔ ala ani muusé Katɔti lɛlɔ mmɔ kama.

¹⁰Na ɔdi uteti ubidi utatákya ogya kemmo ɔnii uuti-nwu ɔkpa. Na bitatɛya kalɛ na beesié teetéye ala teenu. Iye utenwini ukyuli ɔni muubó like iye unwini kabɔ ɔdune iye

¹¹bekyuli bani mɔɔwia ala bati na ayu bamba kudɔ iye bitesie bekpine kudɔ ka bitéye-ma ala binu.

¹²Na ukyuli biala na meti lɛlɔ mete ala amɛni udu bɔbla ni, ɔdubuse Katɔti lɛlɔ, ɔsika ala ammɔ udu adi ekisila ete bina Unwoti Katɔti. Na ɔmɛni ɔsu na ɔdubɔku kadi bammɔ bekyuli na bina anumi.

¹³Na bɛnu kaduɛ kalɛ na lɛla lɛdi lilada-mii na bina Unwoti anumi.

¹⁴Na kalɔ kani lɛlɔ na bísela bitélie ni, bekyuli basiaku bekyuli bani muubó like kama na baawia ama bani ndubɔsu-ma ala ani ndubo bɔlɛ. Nsu ami amu ni, bina Unwoti Katɔti ulayɔ ka bɛbla lɛni.

¹⁵Mmomu ɔdubuti kenye udiene ɔdi umene aani ami Mose kalɛ. Na ukyuli ɔmmɔ ɔdubɔsi bina kadi bekyuli akɔ. Na si úbo ni, na ɔdi biala unu-nwu litemi.

¹⁶Limeyi lɛni na amii Israelƒuɔ bɛ́sa na Sinai kɔbi kaƒɔna ni, bívele-mi bɛnii bɛsɔ bilayɔ ka bɛsɔ binu bina Unwoti lɛdi iye bɛnu kalɛ na ogya bonwu ɔmmɔ ɔɔda lɛnɔ. Ɔsika bɛkya bɛyia ka bɛdubukpi.

¹⁷Ɔmɛni ɔsu Unwoti ɔ́su-mi ɔnini, “Béti lɛnunda béye lɛla lɛbuni.

¹⁸Anwuɔsu Ami Katɔti ndubumene kenye udiene ɔdi aani awɔ Mose kalɛ lɛkya-ma. Na kenye udiene ɔmmɔ ɔdubɔsi ama alati kadi bekyuli akɔ. Na lɛla biala na líbo-nwu ɔda ni, anwu ndubɔsu-ma ana ƒui.

¹⁹Na si ubo ni, lɛla biala wasu-ma ni, ɔdubɔsu-ni na mina lɛnyi kemmo. Na ukyuli biala na ulénu-nwu litemi ni, Ami Katɔti ndubɔni-nwu kɔtu.

²⁰Nsu si kenye udiene ɔdi ɔ́su-ma litemi lɛdi na mina lɛnyi kemmo uwi ɔni na ɔɔɔdi Ami Katɔti nátala-nwu iye kenye udiene ɔdi ɔda baƒiɔ kɔyu ɔɔsu-ma lɛla lɛdi ni, na bayila bekyuli bammɔ udu.”

²¹Bɛdubuye lɛlɔ bɛnii, “Dɛ na wabla asa bɔnu bɔti ka kenye udiene ɔmɛni litemi lɛni na ɔɔsu mɛni lítasi Unwoti kudɔ?”

²²Binu kalɛ na bɛdubuti bɛnu ka litemi lɛmmɔ lɛ́si iye lítasi Katɔti kudɔ. Si kenye udiene ɔdi úti Katɔti lɛnyi na ɔ́su lɛla lɛdi na lɛla lɛmmɔ lítebo-nwu kemmo ni, na kenye udiene ɔmmɔ kenye kátasi Katɔti kudɔ. Mmomu kenye udiene ɔmmɔ ɔlati néti nwuna kasusu ɔ́su lɛla lɛmmɔ. Anwuɔsu bitayia ukyuli ɔmmɔ.