Read Lelemi Lɛkpa Ulu 19 Bible Online

Lɛkpa Ulu 19 - Lelemi bible

Lɛkpa Ulu 19

¹Si uwi ɔni na bina Unwoti Katɔti ɔ́yila bekyuli bani nli kɔlɔ kɔni bɛdubo bulie mmɔ udu ɔ́wɔlɔ na bɛ́bɔku-ma na bɛ́ƒɔ-ma lɛma ku kɔduli bilie ni,

²bɛlɛ lɛma ɛtɛ anumi na ekpo ekpo bise bite lɛlɔ na kalɔ kani na bina Unwoti ɔ́su úse ka weti wete-mii mmɔ kemmo.

³Na bile kalɔ kammɔ akpa atɛ bɛmana lɛma lɛmmɔ na bɛbwɛ lilu bisienku-ni kemmo. Na lɛma lɛmmɔ linwini kesii kani na ukyuli ɔdune ɔdi ɔkana na ukeli usie utábɛ.

⁴Na ukyuli ɔdune biala ɔkana na ukeli usie lɛma lɛmmɔ ɔdi kemmo kalɛ na baládu-nwu, ɔsika ɔɔɔgyi uuuse asa na ɔ́du nwuna ɔkpana ɔni naaadi nwuna ukisine.

⁵Bɛya na buti-nwu bɔnii nkyuli inyɔ bésie lɛku kemmo na bésie baadá egyii. Na ka bakya baadá egyii ammɔ ni, ukyuli unwi kadadi ubi ɔ́lɛ ugyii ɔmmɔ kemmo na ɔ́vi útádu ɔkpanadi. Ukyuli ɔmmɔ ɔkana na ukeli usie lɛma lɛmmɔ unwi kemmo kalɛ na baládu-nwu.

⁶Na si ɔma unwi pɛ kani nkya na ɔgbankpi ɔ́siaku ɔdi na kesii kani nágyu ni, bekyuli bakana beƒie ukyuli ɔni na ɔgbankpi ɔmmɔ ɔ́siaku na badu-nwu na kɔnyi kɔni bákɛ ɔsu. Nsu ukyuli ɔmmɔ ɔɔɔgyi uuuse asa na ɔ́du ukyuli ɔni naaadi nwuna ukisine mmɔ.

⁷Ɔmɛni ɔsu na líbo-mii ɔda ka bidie lɛma ɛtɛ bise lɛlɔ.

⁸Ɔƒɛni si bina Unwoti Katɔti ɔ́ya na kalɔ kammɔ lɛmii lɛ́bɛbɛ lísie kama aani kalɛ na ɔ́su bina bati kuuku úse na ka wete-mii ni,

⁹na bidie lɛma ɛtɛ bibunku lideedi lɛmmɔ. Na si bɛɛdi ɔda bubo bɔni ƒui na líti muute-mii ɔmwi na bɛɛyɔ́ bina Unwoti Katɔti ni, ɔdubɔbla ɔmɛni ute-mii.

¹⁰Bɛbla ɔmɛni kalɛ na biládu bekyuli bani nátaƒiɔ. Na bilákɛ kɔtɔ bɔdu bɔdi na kukpi kɔmɛni udu lɛlɔ na kalɔ kani na bina Unwoti úti uute-mii mɛni kemmo.

¹¹Nsu si ukyuli ɔdi uukisi nwuna ukyuli ɔkpana na útábɛ ɔɔtú-nwu na ɔ́du-nwu na úkeli úsie lɛma lɛmmɔ lɛdi biala kemmo utátamiku-ma ni,

¹²benengu bani nkya ɔma ɔni kemmo na ukyuli ɔdune ɔmmɔ ɔ́si ɔlɛka batala na betétiku-nwu beboku, na beti-nwu bete ukyuli ɔni na ɔ́du mmɔ lɛlɔ bekyuli, na ama lɛnɔ badu-nwu.

¹³Bitanu ukyuli ɔmmɔ udu kɔnyana. Na bɛnu ka bɛ́da bekyuli badune bídie Israel kalɔ lɛlɔ kalɛ na lɛla biala lisieku-mii kaduɛ.

¹⁴Na ɔdi utavumana ɔmii ɔkukudi ɔni na básia bése na kalɔ kani na bina Unwoti Katɔti úti uute-mii mɛni lɛlɔ.

¹⁵Útalɛka ukyuli unwi kani udie lɛla likpidi lɛni na ɔdi ɔ́bla kenye. Bɛya na nkyuli inyɔ iye ɛtɛ benye-nwu litemi kama.

¹⁶Na si ukyuli ɔ́nyi ɔkɔ ɔ́sia ukyuli ɔdi ni,

¹⁷ukyuli ɔni na bányi ɔkɔ básia mmɔ ku ukyuli ɔni mɔɔnyi ɔkɔ mmɔ ƒui ɔlɛka besie kesii kani na baakpá Katɔti na batánu bakpane bani mɔɔbla akpala kabla mmɔ ku litemi batɛne bani nkya mmɔ na batɛ litemi lɛmmɔ.

¹⁸Na litemi batɛne bammɔ badubuduo etemila ammɔ kemmo kaduɛ na si bánu báti ka ɔkɔ na kenye udiene ɔmmɔ ɔ́nyi ɔ́sia nwuna ɔkpana Israelni ni,

¹⁹ɔlɛka beti kɔtu bɔni bɔmmɔ bani ɔkɔ ɔnyine ɔmmɔ. Lɛni na bɛdubudie likpidi lɛmɛni udu bɛlɛku bina akɔ.

²⁰Na ɔmɛni ndubɔya na ukyuli biala únu litemi lɛmmɔ na liƒu lɛda-nwu kalɛ ɔdi ɔsɔ ulabla lɛla likpidi lɛmmɔ udu.

²¹Na etemila ammɔ bene lɛlɔ ni, bitanu ɔdi kɔnyana. Na kɔtu kɔni na ɔlɛka bani-nwu ndi ka si ukyuli ɔ́du ni, ɔlɛka badu anwu lɛnɔ. Si ukyuli lɛnumi na ɔ́bwɛ ni, ɔlɛka babwɛ anwu lɛdi lɛnɔ. Na si lɛnyi na ɔ́kpa ni, ɔlɛka bakpa nwuna lɛdi lɛnɔ. Na si nwuna kɔnu na úkulo ni, ɔlɛka bekulo nwuna kɔdi lɛnɔ. Na si ɔgba na úkulo ni, ɔlɛka bekulo nwuna ɔdi lɛnɔ.